Александр Жирков: «Итиинэн хааччыллыы Саха сиригэр тыын суолталаах»

Бу боппуруоһу пленарнай мунньахха көтөҕүү «Сумма» хампаанньалар бөлөхтөрүгэр сыһыаннаах айдааны кытта сибээстээх. Ол курдук, бас билээччилэр бырааттыы Зиявудин Магомедов уонна Магомед Магомедов үбү-харчыны уорууга уорбаланан хаайылыннылар. Бу хампаанньалар бөлөхтөрүн састаабыгар Саха сирин киин өттүн гааһынан хааччыйар соҕотох предприятие — «Саха сирин оттук-энергетическэй хампаанньата» (ЯТЭК) ААУо киирэр. Бүгүн өрөспүүбүлүкэ сиригэр-уотугар айылҕа гааһын хостооһуҥҥа бу тэрилтэ өлүүтэ — 86% кэриҥэ.

Парламентарийдарга буола турар быһыы-майгы туһунан Саха Өрөспүүбүлүкэтин Бырабыыталыстыбатын Бэрэссэдээтэлин бастакы солбуйааччыта Михаил Осипов иһитиннэрдэ. Боппуруоһу дьүүллэһиигэ бар дьон дьокутааттара Леонид Владимиров, Иван Шамаев, Алиш Мамедов, уо.д.а. кыттыыны ыллылар. Боппуруоһу көрүү түмүгүнэн Саха Өрөспүүбүлүкэтин уонна “ЯТЭК” аһаҕас акциялаах хампаанньа икки ардыларыгар хардарыта дьайсыы боппуруоһугар СӨ парламенын уонна Бырабыыталыстыбатын холбоһуктаах үлэлиир бөлөҕүн тэрийэр уонна ол бөлөх састаабыгар өрөспүүбүлүкэ бар дьонун дьокутааттарын киллэрэр туһунан быһаарыы ылынылынна.

Александр Жирков саҥа тэриллибит холбоһуктаах бөлөххө, бастатан туран, хотугу улуустарга таһаҕаһы тиэйиигэтаһыыга, оттугу тиэрдиини хонтуруоллааһыҥҥа, иэстээх тэрилтэлэри кытта үлэҕэ уонна да атын туһаайыыларга ирдэбили туруорда.

«Хампаанньаҕа аймалҕан таҕыста. Кинилэр миллиардынан кредиккэ ыйана сылдьаллар. Салалтатын сорҕото силиэстийэҕэ сылдьар, сорҕото ыһылынна», — диэтэ Александр Жирков. «Быһыы-майгы араастаан уларыйыан сөп, онуоха өрөспүүбүлүкэ бэлэм буолуохтаах. Тэрилтэни моҥкуруут ыытыы да, хампаанньа акциятын үллэстии да буолуон сөп. Оннук түбэлтэҕэ өрөспүүбүлүкэ бэйэтин интэриэһин бүтүннүү тутуһуохтаах. Нэһилиэнньэни итиинэн хааччыйыы биһиэхэ тыын суолталаах. Манан оонньуур, көтүмэхтик дьаһанар сатаммат. Бу тэрилтэ хайдах да буолбутун иһин», — диэн Саха сирин парламенын спикерэ бэлиэтээн эттэ.

Дьүүллэһии түмүгүнэн Саха Өрөспүүбүлүкэтин Ил Түмэнэ Россия Федерациятын Бырабыыталыстыбатыгар туһаайан этиини ылынна. Онуоха өрөспүүбүлүкэни гааһынан хааччыйыыга хампаанньа аҥаардастыы баһылыыр балаһыанньатыгар уонна ону кытта сибээстээх боппуруостары сытыытык туруорда.