Александр Жирков үгүс этиилэрэ учуоттаннылар

Парламеннар икки ардыларын­ааҕы холбоһук мунньаҕын “Россия Хотугулуу-Арҕаа Парламентскай Ассоциациятын” бэрэссэдээтэлэ Сергей Бебенин уонна “Дальнай Восток уонна Забайкалье” Парламентскай Ассоциация бэрэссэдээтэлэ Виктор Чудов астылар.

Кинилэр парламеннар икки ардыларынааҕы холбоһук састаабыгар киирэр 22 региоҥҥа элбэх майгыннаһар өрүттэр баалларын, регионнар икки ардыларыгар “туруору” сибээстээҕэр “сытыары” сибээстэр ор­дук суолталаахтарын бэлиэтээтилэр.

Мунньах муус устар 27 күнүгэр – Саха Өрөспүүбүлүкэтин Күнүгэр итиэннэ Россия Парламентаризмын Күнүгэр – түбэспитэ бэлиэ түгэн. Кыттыгас мунньахха Парламеннар Ассоциацияларын салайааччылара хотугу сирдэргэ тирээн турар суолталаах боппуруостары дьүүллэһээри аан бастаан бииргэ муһуннулар. Ити дьүүллэһиигэ Сир, Ойуур Кодекстарыгар уларытыылары киллэрии, Российскай Федерацияҕа инбэлииттэр социальнай көмүскэллэрин, судаарыстыбаннай уонна муниципальнай бас билиигэ баар тыа хаһаайыстыбатын сирин туһаныы курдук федеральнай таһымҥа көрүүнү-истиини эрэйэр экономическай хайысхалаах боппуруостар киирдилэр.

Ил Түмэн спикерэ Александр Жирков тыл этиитигэр Ассоциациялар көтөхпүт этиилэрин хайдах олоххо киллэриэххэ сөбүгэр тохтоото. Кини бу кыттыгас мунньахха Российскай Федерация субъектарын сокуону оҥорор былааһын чиэппэриттэн бэрэстэбиитэллэр, ол аата Россия хоту өттүн бүтүннүүтүттэн кэлбиттэрэ федеральнай таһымҥа үөһэ ахтыллыбыт боппуруостары көрүүгэ “хонтуруоллуур пакетынан” буолуохтарын бэлиэтээн эттэ. Александр Жирков үгүс этиилэрэ учуоттанан, мунньах бэбиэскэтигэр киирдилэр.

Сокуону оҥорооччулар бииргэ үлэлээһин хайысхаларынан итинтэн да атын боппуруостары дьүүллэстилэр. Кыһалҕалаах боппуруостарга санаалары атастаһыыга, этиилэри хомуйууга уонна олору уопсай сүбэнэн ырытыы түмүгэр ылыллыбыт этиилэри Российскай Федерация Федеральнай Мунньаҕын икки палататыгар ыытарга, Ассоциациялар кыттыгас мунньахтарын сылга икки төгүл ыытарга быһаардылар.

Саха Өрөспүүбүлэкэтин Судаарыстыбаннай Мунньаҕын Бэрэссэдээтэлэ Александр Жирков РФ субъектарын сокуону көҕүлүүр этиилэрин федеральнай таһымҥа ылыныыга тиэрдии тэрээһин боппуруостарыгар уонна ньымаларыгар киллэрбит этиилэрин уонна этиилэри олоххо киллэриини “Россия Хотугулуу-Арҕаа Парламентскай Ассоциациятын” уонна “Дальнай Восток уонна Забайкалье” Парламентскай Ассоциация парламеннар икки ардыларынааҕы холбоһук чугастааҕы кэмнэргэ ыытыллыахтаах мунньаҕар сиһилии көрөргө быһаарыы ылыннылар.