Александр Жирков улуус социальнай объектарыгар сырытта

Спикер Кэптэнигэ тутулла турар Лөгөй орто оскуолатын 220 миэстэлээх таас объегын көрдө. Былаан быһыытынан бу тутуу 2017 сыл бастакы кварталыгар бүтүөхтээх. «Норд Инжиниринг” тэрилтэ бэрэстэбиитэлэ – тутуу учаастагын начальнига Игорь Федоров иһитиннэрбитинэн, бүгүҥҥү күҥҥэ иккис мэн­диэмэҥҥэ үлэни ситэрэ-хоторо сылдьаллар, муостатын оҥороллор. Дьиэ тас өттүн бүрүйэллэр. Витражтары, баһаарынай сигнализацияны, сибээс оборудованиетын туруораллар. «СӨ Судаарыстыбаннай сакаасчыга» ГКУ генеральнай дириэктэрэ Дмитрий Поисеев бу тутууга 75 киһи үлэлии сылдьарын, объект кулун тутар бүтүүтэ туттарыллыаҕын эттэ.

Салгыы Александр Жирков Баатаҕай нэһилиэгэр 50 миэстэлээх «Күнчээн» оҕо саадын дьиэтин үөрүүлээх аһыллыытыгар кытынна. Аалай лиэнтэни Ил Түмэн спикерэ Александр Жирков, Уус-Алдан улууһун баһылыга Алексей Федотов, Баатаҕай нэһилиэгин баһылыга Игнатий Готовцев, оҕо саадын сэбиэдиссэйэ Тамара Босикова, оҕо саадын иитиллээччитэ Илья Аманатов быстылар. Ыалдьыттарга саҥа, сырдык, сылаас дьиэ устун экскурсия оҥордулар. Кырачааннар хоһоон эҕэрдэлээх көрүстүлэр.
Нэһилиэк баһылыга Игна­тий Готовцев историяттан билиһиннэрбитинэн, нэһилиэккэ оҕо саада 1960 сыллаахха чааһынай дьиэҕэ аһыллыбыт. Бу «Мин Сахам сирэ – ХХI үйэҕэ» хамсааһынынан саҥа объект киириэр диэри тэрилтэ 1972 сыллаахха тутуллубут дьиэҕэ үлэлээн кэлбит. Баһылык уһуйаан үлэҕэ киириитигэр бары көмө буолбут дьоҥҥо, чуолаан Ил Түмэн спикерэ Александр Жирковка, улуус баһылыга Алексей Федотовка, «Мин Сахам сирэ – ХХI үйэҕэ» хамсааһын салайааччыта Иван Емельяновка, улуус депутаттарыгар махтанна. Итиэннэ нэһилиэк дьоно-сэргэтэ, ыччат,төрөппүттэр, түөлбэлэр хамсааһыны таһаарбыттарын бэлиэтээтэ.

Ил Түмэн Бэрэссэдээтэлэ Александр Жирков эҕэрдэ тылыгар бу тутуу барыытыгар олохтоох дьон-сэргэ бэйэтин кыһамньытынан, туруорсуутунан төһүү буолан үлэлэспитинэн сүргэтэ көтөҕүллүбүтүн, оттон оҕо саадын дьиэтэ сылаас, сырдык, үчүгэй тутуу буолбутунан эҕэрдэлээтэ. «Кэлиҥҥи сылларга нэһилиэккэ социальнай объектар саҥардыллаллар. Спортивнай саала, Арчы дьиэтэ, хочуолунай тутуллубуттара, кулууп өрөмүөн­нэннэ. Онон үлэлииргэ-хамсыырга усулуобуйа тэриллэр, тупсар. Эһиэхэ сорук турар – төрөөбүт түөлбэҕитин, өбүгэлэргит сирин тутаҥҥыт, олохсуйан, кэҥээн иһиҥ, Баатаҕай аатын ааттатыҥ. Эһиги нэһилиэктэн учуонай-историк, Аҕа дойду Улуу сэриитин сылларыгар Саха сирин историятын чинчийбит Дмитрий Пет­ров, өрөспүүбүлүкэҕэ спортивнай, физкультурнай хамсааһыны төрүттээбит Николай Тарскай курдук үтүө дьон үөскээбит сирдэрэ. Бу көрсүһүүнэн туһанан, Н.Н.Тарскай аатын үйэтитиигэ нэһилиэк дьоно, биир дойдулаахтар көмөлөспүккүт, кыһамньыгыт иһин махтанабын. Эһиги дьиҥнээх патриот, үлэһит дьоннордооххут. Үлэни өрө тутуҥ, салгыы үчүгэйдик, этэҥҥэ олорон ситиһиилээхтик үлэлээҥ-хамсааҥ», — диэн баҕа санаатын тиэртэ.
Салгыы Александр Жирков I Өспөх нэһилиэгэр сылдьан, Уһун Күөл сүрүн оскуолатын коллективын кытта көрүстэ. Олохтоохтор орто оскуола статуһун бэрдэриини уонна оскуола дьиэтигэр салҕааһыны туттарыыны туруорсаллар. Ол курдук кэлиҥҥи сылларга нэһилиэнньэ ахсаана, оҕо төрөөһүнэ эбиллэр. Быйыл саҥа үөрэх дьылыгар 10-11 кылаастары астардахха,бу кэлэр өттүгэр эдэр ыаллар олохсуйууларыгар, дьон көһөн барбат буолуутугар төһүү буолуо. Билиҥҥи туругунан оскуолаҕа µірэнэр саастаах 128 оҕо баар. Бу боппуруос быһаарыллыытын Александр Жирков өйүүрүн биллэрдэ уонна улуус салал­татыгар оскуола статуһун уларытыыны бары өттүнэн ааҕан-суоттаан, материальнай-техническэй хааччыйыыны көрөргө сүбэлээтэ.
Александр Жирков Хомустаах нэһилиэгэр урукку өттүгэр саҕаланан баран, тутуута тохтообут спортивнай саала объегын көрдө уонна улуус салалтатын кытта тутууну үбүлээһин боппуруоһун дьүүллэстэ.
Улуус киинигэр, Бороҕоҥҥо, Александр Николаевич үөрэх управлениета уонна култуура управлениета көһөн киириэхтээх элбэх хайысхалаах административнай дьиэлэрэ тутулла турарын көрдө. Итиэннэ сэлиэнньэ илин өттүгэр 240 миэстэлээх үс мэндиэмэннээх таас оҕо саадын дьиэтин тутуутун көрдө. “РусСтрой-89» ХЭТ директора Руслан Алибеков график тутуһулларын, объект сыл бүтүүтэ үлэҕэ киириэхтээҕин туһунан иһитиннэрдэ.
Спикер улуустааҕы киин балыыһа 2015 сыллаахха киирбит дьиэтэ хайдах үлэлии турарын, усулуобуйаны көрдө, быраастары, эмтэнээччилэри кытта кэпсэттэ.
Улуус киинигэр Ил Түмэн Бэрэссэдээтэлэ «Өркөн» оҕолорго эбии үөрэхтээһин киинин үлэтин билистэ. Бу кииҥҥэ 2015 сыллаахха урукку таас кинотеатр дьиэтин биэрбиттэрэ. Манна эбии иккис мэндиэмэн тутуллубута, капитальнай өрөмүөн ыытыллыбыта. Билигин 19 куруһуокка 450 оҕону хабан дьарыктыыллар. Оҕолор бэйэлэрин оҥоһуктарын көрдөрдүлэр, кэпсээтилэр. Киинэ саалата техническэй өттүнэн саҥардыллыбыт, 150 миэстэлэммит.
Өлтөх нэһилиэгэр спикер оскуола коллективын кытта көрсөн, Бэйдиҥэ орто оскуолатын 85 сыллаах үбүлүөйүгэр бэлэмнэнии үлэтин дьүүллэстилэр.