Арктика туруктаахтык сайдарын торумнааһын

Саха сирин бар дьонун депутаттара киин куоракка балаҕан ыйын 24-28 кк. ыытыллар норуоттар икки ардыларынааҕы Хотугу форум тэрээһиннэригэр кытталлар.

Парламентарийдар семинардарга, научнай-практическай конференцияларга, төгүрүк остуолларга, секцияларга, дьүүллэһиилэргэ кытталлар.

Чуолаан, Ил Түмэн бэрэссэдээтэлэ Петр Гоголев, бэрэссэдээтэл бастакы солбуйааччыта Александр Жирков, вице-спикер Виктор Губарев, Хоту сир аҕыйах ахсааннаах төрүт олохтоох норуоттарын боппуруостарыгар уонна Арктика дьыалаларыгар сис кэмитиэт бэрэссэдээтэлэ Елена Голомарева балаҕан ыйын 25 к. форум аһыллыытыгар анаммыт пленарнай мунньахха  сырыттылар.

Ыспыраапка

Хотугу форум 1991 сылга төрүттэммитэ, тэрилтэ сыалынан тымныы климаттаах регионнар нэһилиэнньэлэрин олоҕун хаачыстыбатын тупсарыы уонна туруктаах сайдыыларын өйөөһүн буолаллар. Билиҥҥэ диэри бу тэрилтэ Арктикаҕа бүтүннүүтүгэр “Хоту-Соҕуруу”, бастатан туран, Азия-Чуумпу акыйаан регионун дойдуларын кытта санаа атастаһыытын олохтоон, регионнар икки ардыларыгар бииргэ үлэлээһини өйөөһүҥҥэ туһуланар Хоту сир уонна Арктика норуоттар икки ардыларынааҕы соҕотох бырайыагынан буолар.

Бу тэрээһиҥҥэ СӨ Ил Дархана Айсен Николаев эҕэрдэ тылы эттэ, кини аан дойду таһымнаах учуонайдары уонна экспердэри кытта Арктика сайдыытын бары боппуруостарын  кэлимник уонна ымпыктаан-чымпыктаан дьүүллэһэллэригэр эрэнэрин биллэрдэ.

Туруктаах сайдыыга Хотугу форум кыттыылаахтарын аадырыһыгар эҕэрдэлэрин РФ бырабыыталыстыбатын бэрэссэдээтэлин солбуйааччыта – Уһук Илиҥҥи федеральнай уокурукка РФ Президенин боломуочунай бэрэстэбиитэлэ Юрий Трутнев, Федерация Сэбиэтин федеративнай тутулга, регион политикатыгар, олохтоох салайыныыга уонна Хоту сир дьыалаларыгар кэмитиэтин бэрэссэдээтэлин солбуйааччыта, ФС иһинэн Арктикаҕа уонна Антарктикаҕа Сэбиэт бэрэссэдээтэлэ Александр Акимов, “Полярниктар ассоциациялара” регионнар икки ардыларынааҕы уопсастыбаннай тэрилтэ президенэ, РФ Президенин Арктикаҕа уонна Антарктикаҕа норуоттар икки ардыларынааҕы бииргэ үлэлээһиҥҥэ анал бэрэстэбиитэлэ Артур Чилингаров, Альберта (Канада) провинция премьер-миниистирэ Джейсон Кенни, «АЛРОСА» АХ президенэ Сергей Иванов уо.д.а. эҕэрдэлэрин ыыттылар.

Туруктаах сайдыыга Хотугу форуму Саха сирэ аан бастаан тэрийээччинэн буолар. Ол курдук “Хотугу форум” норуоттар икки ардыларынааҕы хотугу регионнар тэрилтэлэригэр чилиэн быһыытынан экспердэр дьүүллэһэр былаһааккаларын көҕүлээбитэ.

Бастакы форум үлэтигэр Россия Федерациятын 14 регионуттан уонна 13 дойдуттан: Россияттан, Канадаттан, АХШ-тан, Исландияттан, Финляндияттан, Норвегияттан, Швецияттан, Кытайтан, Кореяттан, Японияттан, Великобританияттан, Германияттан, Францияттан бэрэстэбиитэллэр кытталлар.