760
17 апреля 2015 в 13:16
Авиациянан тиэйии — болҕомто киинигэр
2015 сыл бюджетын барылыгар тутаах көннөрүүлэр киирдилэр: тыа хаһаайыстыбатын оҥорон таһаарааччыларын өйөөһүҥҥэ, импорт солбуллуутугар эбии үбү анааһын. Чуолаан кризиһи утары фондаттан 20,5 млрд солк. тыа сирин сайдыытыгар, өссө 21 млрд солк. сөмөлүөттэр уонна вертолеттар двигателлэригэр сыһыаннаан импорты солбуйууга ыытыллыахтара.
Госдума вице-спикерэ, Дальнай Восток сайдыытын Фондатын чилиэнэ Сергей Неверов манан сибээстээн санаатын эттэ:
— Дальнай Востокка салгынынан сибээстэһии стратегическай экономическай уонна социальнай суолталаах. Россия олохтоохторугар авиациянан тиэйии тииһимньилээх буолуута өрүү болҕомто киинигэр турар. Быйыл муус устар саҕаланыытыгар РФ Президенэ этии киллэриитинэн, Дальнай Восток регионнарыгар, ону сэргэ Крымҥа, Калининградка авиациянан тиэйиигэ «плоские тарифы» диэни олохтооһун туһунан быһаарыы ылыллыбыта. Ол аата Дальнай Востокка сыаналар урукку таһымынан — 18 тыһ. солк. хаалаллар. «Аэрофлот» — бу судаарыстыба кыттыылаах авиакомпания бастакынан сыаналары намтаппыта, регионнары кытта тырааныспарынан сибээстэһиини тииһимньилээх оҥорор. Ити боппуруоһу быһаарыыга наадалаах барыта оҥоһулунна.
Ону сэргэ биһиги социальнай пособиелары билгэлэммит инфляциянан буолбакка, дьиҥнээх баарынан индексациялыыры туруорсубуппут. РФ Бырабыыталыстыбатын кытта сүбэлэһии кэмигэр партия уонна гражданнар социальнай пособиелары 2015 сыл түмүгүнэн баар инфляция таһымыгар ситэри индексациялыыр наадалааҕын туһунан санааларын тиэртибит. Ити 2016 сыл саҕаланыытыгар оҥоһуллуоҕа, ол эрээри 2016 сыл бюджетыттан. Онуоха ирдэниллэр үбүлээһин билгэлэнэр сыыппарата – 60 млрд солк. кэриҥэ. Ити миэрэ инфляция таһымыгар дьайыа суоҕа.
Индексация Аҕа дойду Улуу сэриитин кыттыылаахтарын, инбэлииттэрин, бойобуой дьайыылар ветераннарын, Сэбиэскэй Сойуус Геройдарын, РФ Геройдарын, «Слава» уордьан толору кавалердарын, Социалистическай Үлэ Геройдарын, РФ Үлэҕэ Геройдарын, Үлэ Албан Аата уордьан толору кавалердарын, «Блокадаҕа түбэспит Ленинград олохтооҕо» бэлиэнэн наҕараадаламмыттары, сокуоннай саастарын туола иликтэринэ фашизм хаайыытыгар түбэспиттэри, сэриигэ өлбүт Аҕа дойду Улуу сэриитин кыттыылаахтарын, инбэлииттэрин дьиэ кэргэттэрин, радиацияҕа түбэспит дьону уонна да атын ый аайы төлөбүр ылааччылары, ол иһигэр оҕолору, ону сэргэ байыаннай эбээһинэстэрин толоро сылдьан өлбүттэри уо.д.а. таарыйыаҕа.
Госдума сайтыттан.
