Балаҕан ыйын 8 күнүгэр Ленинград былакаадата саҕаламмыта

Тэрээһиҥҥэ Ил Түмэн спикерин солбуйааччы Виктор Губарев, киин куорат баһылыга Айсен Николаев, Эдэр ыччат дьыалатыгар уонна дьиэ кэргэн политикатын миниистирэ Афанасий Владимиров, үлэ уонна социальнай сайдыы миниистирэ Александр Дружинин, Дьокуускай дууматын бэрэссэдээтэлин солбуйааччы Семен Филиппов, СӨ бырабыыталыстыбатын чилиэннэрэ, депутаттар, бэтэрээннэр кытыннылар.

Виктор Губарев балаҕан ыйын 8 күнэ оччотооҕу дьон тулуурдарын, эр санааларын туоһулуур күнүнэн буолар диэн бэлиэтээтэ.

«Биһиги төгүрүктээһиҥҥэ хаайтарбыт Ленинградка тыыннара быстыбыт дьон сырдык кэриэстэригэр сүгүрүйэбит. Сүгүрүйэбит бу ыарахан сыллары эрдээхтик туораабыт күүстээх санаалаах дьоҥҥо. Гитлер хара маҥнайгыттан бу куораты суох гынарга соруктаммыта. Ол эрээри, Сэбиэскэй аармыйа куораты тугу да кэрэйбэккэ туран кімүскээбитэ. Иэдээннээх сору-муҥу, өлүүнү кыайбыт Ленинград олохтоохторун геройдуу быһыылара хаһан да өлбөөдүйүө суоҕа!», — диэн эттэ.

Виктор Губарев үүнэр көлүөнэ сэрии алдьархайын умнубатыгар ыҥырда. «Хас оскуола аайы Сэбиэскэй аармыйа хабыр өстөөҕү кыайбытын санатар Кыайыы былааҕа тэлимниэхтээх, оҕолорбутугар дойдуларын таптыыр ботуруйуоттуу өйгө-санааҕа олох быыкаа саастарыттан иитиэхтээхпит», — диэн бэлиэтээтэ.
Айсен Николаев, Александр Дружинин бу ыарахан кэмҥэ өлбүт уонна бу сыллары тулуурдаахтык ааспыт дьоҥҥо бэйэлэрин ытыктабылларын биллэрдилэр. Ол ынырык сылларга тыыннаах ордон хаалбыт, Ленинград урукку олохтооҕо Антонина Тюменцева оччотооҕу кэми ахтан ааста.

Ленинград былакаадата – бу дойду историятын биир саамай иэдээннээх, ону тэҥэ норуот эрдээх санаатын туоґулаабыт өрөгөйдөөх ыстараныыссата буолар. Былакаадаламмыт Ленинградка саҥа күнү тыыннаах көрсүү — дьолго тэҥнээҕэ уонна геройдуу быһыы үрдүк холобура этэ.
Бүгүҥҥү күҥҥэ Дьокуускай куоракка былакаадаламмыт Ленинграды көмүскээһиҥҥэ кыттыбыт 3 киһи уонна 25 куорат урукку төрүт олохтооҕо олорор.
Оксана Дьячковская.