712
03 февраля 2017 в 12:26
Бииргэ үлэлэһии түмүктэри аҕалыаҕа
Бу күннэргэ Ил Түмэн депутаттара Александр Уаров, Дмитрий Саввин, Иван Андросов Красноярскайга баран, кэлэр өттүгэр туһалаах хамсааһыны таһаарар кэпсэтиигэ кыттан кэллилэр. Кинилэр тыа хаһаайыстыбатын комплекстарын көдьүүстээхтик үлэлэтии, олохтоох бородууксуйаны оҥорон таһаарыы уонна Саха Өрөспүүбүлүкэтэ, Красноярскай кыраай социальнай-экономическай сайдыыга алтыһар хайысхаларыгар аналлаах кэпсэтиилэри ыыттылар. Ол сырыыларын туһунан Ил Түмэн депутаттара – парламент Хонтуруоллуур кэмитиэтин бэрэссэдээтэлэ Александр Уаров, тыа сиригэр уонна аграрнай политикаҕа сис кэмитиэтин бэрэссэдээтэлэ Дмитрий Саввин «Ил Түмэн» хаһыакка анаан кэпсээтилэр.
«Россия олохтоохторо буоларбыт быһыытынан, бары биир сыалы-соругу тутуһабыт. Дойдубутугар, норуоппутугар туһалаах үлэни ыытар баҕалаахпыт. Красноярскайга улахан сугулаан буолла, онно федеральнай тэрилтэлэр бэрэстэбиитэллэрэ, Красноярскай кыраай Судаарыстыбаннай Мунньаҕын сис кэмитиэттэрин бэрэссэдээтэллэрэ, депутаттар, Красноярскай кыраай тыатын хаһаайыстыбатын миниистирин солбуйааччы Сергей Брылев, айылҕа ресурсаларыгар уонна экологияҕа миниистири солбуйааччы Владимир Званцев, Ааҕар-суоттуур палаата бэрэссэдээтэлэ Виктор Астраханцев, «Агропромышленнай сойуус» тэрилтэ директора Николай Рыжков уонна да атыттар кыттыыны ыллылар. Мунньах түмүгүнэн бииргэ үлэлэһэр туһунан сөбүлэһии түһэрсэр докумуон оӨоһуллуохтаах. Онно Красноярскай кыраай Судаарыстыбаннай Мунньаҕын бэрэссэдээтэлэ Александр Усс, Ил Түмэн спикерэ Александр Жирков уонна Ил Дархан Егор Борисов илии баттыахтаахтар. Ыаллыы Россия субъектара – Саха сирэ уонна Красноярскай кыраай биир санаанан үлэлээтэхтэринэ, көдьүүстээх үлэ тахсыаҕа диэн эрэл баар», — диэн Александр Уаров эттэ.
Кини, бастатан туран, Красноярскай кыраай депутаттара Саха сиригэр тыа хаһаайыстыбатын бырагыраамаларын үбүлээһин кээмэйэ улаханын сөхпүттэрин биллэрдэ.
Красноярскай кыраай кыһалҕата биһиги билбэт кыһалҕабыт буолбатах. Ол курдук, аҕыйах ахсаннаах омуктар бэрэстэбиитэллэрэ, Красноярскай депутата Валерий Вэнго ыраах сытар пууннарга оттук, сүөһү аһа тиийбэтин, ас-таҥас сыаната ыараханын уонна таһыыта уустугун туһунан кэпсээн туран, бу өттүгэр бииргэ үлэлиир сөптөөҕөр тохтообут.
Депутаттар Красноярскай кыраайга таба иитиитин, балыктааһын үлэтин билсибиттэр. «Кинилэргэ балыгы бултааһын эрэ диэн сорук турбат, искусственнайдык элбэтии күүскэ ыытыллар эбит. Ол үлэтин кытары билистибит», — диэн кэпсээтэ депутат.
Делегация чилиэнэ, Ил Түмэн тыа сиригэр уонна аграрнай политикаҕа сис кэмитиэтин бэрэссэдээтэлэ Дмитрий Саввин Красноярскай кыраайга Арассыыйаҕа биир саамай аныгы технологиялаах сибиинньэ иитэр комплекс үлэлиирин бэлиэтээтэ. «Хатас» сибиинньэ иитэр комплексын директорын солбуйааччыта Сергей Шестаков биир күнү быһа бу комплекс үлэтин кытары билсибитин кэпсээтэ. Аныгы технологиянан тыыннаах сибиинньэни биир тиһиккэ киллэрэн, харыстабыллаахтык өлөрөн, сүлэн, эттээн, сонно тута маҕаһыыҥҥа атыыга тахсар бородууксуйа оҥорон таһаараллар эбит.
Онон Красноярскай кыраайы кытары бииргэ үлэлэһии үтүө өрүттээҕэр депутаттар саарбахтаабаттар. Икки субъект бэйэ-бэйэлэрин баай уопуттарын атастаһыахтара турдаҕа.
