Бүддьүөтү дьүүллэһии: Юкагирга оскуола тутуллуо дуо?

Тыа хаһаайыстыбатын хайысхатынан киирбит көннөрүүлэри ылынар туһунан норуот депутаттара бары куоластаатылар. Көннөрүү тыа хаһаайыстыбатын бырагыраамаларын үбүлээһини таарыйда. Холобур, табаһыттары, сылгыһыттары өйүүр тэрээһиннэргэ, экологияны харыстааһыҥҥа, ойуур хаһаайыстыбатын сайыннарыыга, тыа хаһаайыстыбатын салаатын үлэһиттэрин үлэлиир уонна олорор усулуобуйаларын тупсарыыга эбии үп көрдөөһүн туһунан көннөрүүлэр киирбиттэр. Бу боппуруоска санаа хайдыһыыта тахсыбатах эбит буоллаҕына, норуот депутаттара Елена Голомарева, Виктор Губарев уонна да атыттар туруорсубут Усуйаана улууһун Юкагир сэлиэнньэтигэр 35 миэстэлээх оскуола-уһуйаан тутуутун туһунан этиилэригэр утарсыылар киирдилэр. Депутаттар сүрүннээн этиллэр бырайыак олус ороскуоттааҕыттан иҥиннилэр. Лаптевтар муораларын кытылыгар баар 120 киһилээх сэлиэнньэҕэ 20 миэстэлээх оскуола, 15 миэстэлээх оҕо саадын сыста туруохтаах дьиэтин уонна онно сэргэ хочуолунай тутуута 207 мөл. солк. буолан тахсар. Ороскуот сүрүн чааһа Юкагирга сылга биирдэ аһыллар айан суолунан тутуу матырыйаалын тиэрдиигэ тиксэр. 2011 сыллаахха «Сахам сирэ 21 үйэҕэ» үтүө дьыала хамсааһынынан оскуола-саад акылаата түһэн сытар эбит. СЈ бырабыыталыстыбатын бэрэссэдээтэлин бастакы солбуйааччыта  Алексей Колодезников оскуола-саад бырайыага эрдэттэн хочуолунайдаах оҥоһуллубутун, ол эрээри 1 мВт кыамталаах хочуолунай сэлиэнньэни толору хааччыйар кыаҕа суоҕун бэлиэтээн, бырайыагы хаттаан оҥорор туһунан этии киллэрдэ. Кини этиитин депутаттар өйөөтүлэр. Ол эрээри, норуот депутаттара Евгения Михайлова, Елена Голомарева бу быһаарыныыны кытаанахтык утардылар. «2011 сылтан Юкагирга оскуола-саад тутуутун туруорсабыт. Сылын аайы көһөрүллэр. Билигин төһө эмэ үбү аныахха уонна тутатына тутуу матырыйаалын атыылаһан саҕалыахха!» — диэн Елена Голомарева эттэ. Маныаха Алексей Колодезников бырабыыталыстыба отчуотугар Юкагир олохтоохторо ордук хочуолунайы туруорсубуттарын туһунан бэлиэтээтэ. Ол иһин кыамтата кыра хочуолунайы тутартан туттунан, саҥаттан бырайыак оҥорор тоҕоостооҕор тохтоото. Маныаха Евгения Михайлова бу сыллар тухары бырайыак сөбө суоҕун быһаарбакка сылдьыбыттарын иһин бырабыыталыстыбаҕа сэмэ этэр туһунан этии киллэрдэ. «Кэлэр сыл бастакы кыбартаалыгар бу хочуолунай бырайыагын сметатын оҥороллорун тус бэйэм хонтуруоллуом», — диэн эттэ кини. Инньэ гынан, Юкагирга тутуллуохтаах оскуола-саад кэлэр сыллааҕы былааҥҥа көһөрүлүннэ.

Иккис мөккүөрдээх бырайыагынан Евгения Михайлова, Владимир Федоров, И.Никитин, Ольга Балабкина уонна да атыттар киллэрбит Дьокуускай куорат Марха микрооройуонугар 240 миэстэлээх оҕо саадын дьиэтин саҥалыы уларытан оҥоруу буолла. Бырайыак олоххо киириитигэр 104 мөл. солк. ирдэнэр. Бу бырайыакка толору үп көрүллэрэ ыараханын бэлиэтээтилэр. Боппуруоһу салгыы көрөргө быһаардылар.

Маны таһынан, 2017 сыллаах инвестиция бырагырааматыгар Булуҥ улууһун Күһүүр сэлиэнньэтигэр хочуолунай уонна оскуола, Усуйаана Хайырыгар хочуолунай тутуута, Сунтаар Элгээйитигэр гериатрическай салаалаах эмп тэрилтэтин түмүктүүр тутуу, улуустарга 17 фельдшерскай-акушерскай пуун, Алдаҥҥа оскуола, Муома улууһун Хонуу сэлиэнньэтигэр уонна Јймөкөөн Томторугар оскуолалар, Уөһээ Бүлүүгэ гимназия үөрэнээччилэрин интернатын тутуутун саҕалааһына, Дьокуускай куорат 35№-дээх оскуолатын тутуута уонна да атын социальнай уонна култуурунай объектары киллэрэргэ быһаарылынна. Маныаха судаарыстыбаннай бүддьүөттэн араас кээмэйдээх үбү көрүүнү ылыннылар.