Быраабылалары кэһиигэ эппиэтинэс олохтонор

Сокуон барылыгар быһаарыы сурукка этиллэринэн, административнай буруй туһунан өрөспүүбүлүкэ Кодексын 6.12 ыстатыйата сири-уоту тупсарыы быраабылаларын кэһии иһин административнай эппиэтинэһи олохтообутун үрдүнэн, 2015 сылга административнай хамыыһыйалар административнай буруй туһунан 1 787 боротокуолу көрбүттэр. Көрүү түмүгэр ыстараабы түһэрэр туһунан 556 уураах таһаарыллыбыт, ол көрүллүбүт дьыалалар уопсай ахсааннарыттан 31,1% тэҥ, 1 194 дьыалаҕа сэрэтии оҥоһуллубут.
Сири-уоту тупсарыы быраабылаларын сүрүн кэһиилэр – бөҕү мунньуу, чугастааҕы сир-уот мөлтөх туруга. Маныаха ити чахчылар 50%-гар сыл устатыгар хаттаан кэһии бэлиэтэммит. Оттон административнай буруй туһунан Саха Өрөспүүбүлүкэтин Кодексынан муниципальнай тэриллии сиригэр-уотугар сири-уоту тупсарыы быраабылаларын хаттаан кэһии иһин административнай эппиэтинэс олохтоммотох.

Итинэн сибээстээн өрөспүүбүлүкэ Бырабыыталыстыбата Саха сирин туһааннаах Кодексын 6.12 ыстатыйатыгар уларытыыны киллэрэргэ этиилээх, чуолаан сири-уоту тупсарыы быраабылаларын аан бастаан кэһии иһин ыстарааптары аччатыы уонна хаттаан кэһии иһин административнай эппиэтинэһи олохтооһун чааһыгар, ол эрэн урут олохтоммут ыстараап кээмэйиттэн үрдүгэ суох буолуохтаах. Ыстараап уопсай суумата улааппат.
Сокуон барылын быһыытынан, куораттааҕы уонна тыа сиринээҕи, куорат уокуругунааҕы олохтоох салайыныы уорганнарынан бигэргэммит сири-уоту тупсарыы быраабылаларын кэһии иһин сэрэтии бэриллэр эбэтэр административнай ыстараап түһэриллэр: гражданнарга – 1-тэн 3 тыһ. солк. диэри; дуоһунастаах сирэйдэргэ – 10-тан 30 тыһ. солк. диэри; юридическай сирэйдэргэ – 50-500 тыһ. солк. Административнай буруйу хаттаан оҥорууга административнай ыстараап олохтонор: гражданнарга 3-тэн 5 тыһ. солк. диэри; дуоһунастаах сирэйдэргэ – 30-50 тыһ. солк.; юридическай сирэйдэргэ – 500 тыһ. солкуобайтан 1 мөлүйүөн солк. диэри.
Оҥоһуллубут буруй төһө ыараханыттан көрөн Саха сирин административнай хамыыһыйалара санкциялары туттуохтара, хаттаан сокуону кэһиигэ гражданнарга, дуоһунастаах сирэйдэргэ, юридическай сирэйдэргэ ыстарааптар кээмэйдэрэ улаатыахтарын сөп.
«Административнай буруй туһунан Саха Өрөспүүбүлкэтин Кодексын 6.12 ыстатыйатыгар уларытыы киллэрэр туһунан» сокуон барылын өрөспүүбүлүкэ бар дьонун депутаттара бүтэһиктээх ааҕыыга ылыннылар.