782
21 октября 2016 в 10:43
Чэбдигирдии Концепцията олоххо киирэр
Алтынньы 13 күнүгэр Ил Түмэҥҥэ «Саха Өрөспүүбүлүкэтигэр оҕолор сайыҥҥы дьарыктарын уонна сынньалаҥнарын тэрийии туһунан» тиэмэҕэ «төгүрүк остуол» буолан ааста. Мунньаҕы Ил Түмэн наукаҕа, үөрэххэ, култуураҕа, сонуну киэҥник тарҕатар ситимнэргэ уонна общественнай тэрилтэлэр дьыалаларыгар сис кэмитиэтин бэрэссэдээтэлэ Антонина Григорьева салайан ыытта.
Оҕолор, сайын аайы мэлдьи буоларын курдук, араас лааҕырдарга, сынньалаҥ базаларыгар, өрөспүүбүлүкэ тас өттүгэр сынньанар, үлэлиир эбэтэр эмтэнэр кыахтаахтар. Онуоха төрөппүттэргэ суолталаах боппуруоһунан ити сынньалаҥнары тэрийии буолар.
«Төгүрүк остуолга» Ил Түмэн бэрэссэдээтэлин солбуйааччы Ольга Балабкина, өрөспүүбүлүкэ норуотун депутаттара Марфа Филиппова, Александр Уаров, Василий Местников, Алексей Еремеев, Дмитрий Саввин, Алина Винокурова, Петр Аммосов, Иван Шамаев, министиэристибэлэр, биэдэмистибэлэр бэрэстэбиитэллэрэ, уопсастыбаннас кытыннылар.
Мунньах саҕаланыытыгар кэмитиэт бэрэссэдээтэлэ Антонина Григорьева оҕолор сайыҥҥы сынньалаҥнарын тэрийии боппуруоһа өрөспүүбүлүкэ бары нэһилиэнньэтин долгутарын бэлиэтээтэ. Кини сайыҥҥы сынньалаҥ оҕолор айар уонна интеллектуальнай ис кыахтарын сайыннарыыга, олоххо киллэриигэ, оҕолору култуура сыаннастарыгар, актыыбынай сынньалаҥҥа уонна чөл олоххо кытыарыыга саамай тоҕоостоох кэминэн буоларын ыйда. «Бүгүҥҥү күҥҥэ өрөспүүбүлүкэҕэ биэдэмистибэлэр икки ардыларыгар хардарыта үлэлээһини, үбүлээһин бэрээдэгин сүрүннүүр федеральнай уонна регионнааҕы докумуоннарга олоҕурбут биир кэлим нормативнай-правовой база оҥоһулунна. Итиэннэ 2012 сыллаахха муус устар 12 күнүгэр СӨ Бырабыыталыстыбатын Экономическай сэбиэтигэр бигэргэммит 2012-2016 сс. оҕолор төгүрүк сыл сынньалаҥнарын уонна чэбдигириилэрин сайыннарыы Концепцията олоххо киирэр», — диэтэ кэмитиэт бэрэссэдээтэлэ.
Итини таһынан Антонина Афанасьевна ааспыт үйэ 60-70-с сс. тутуллубут муниципальнай лааҕырдар дьиэлэригэр, сынньалаҥ кэмигэр оҕолорго куттал суох буолуутун хааччыйыы боппуруостарыгар болҕомто ууруллара наадатын ыйда.
Антонина Григорьева РФ Федерация Сэбиэтэ оҕо сынньалаҥын туһунан сокуон барылын Госдума көрүүтүгэр киллэрбитин санатта: «Биһиги бүгүҥҥү көрсүһүүбүт сүрүн сыала-соруга диэн ити сокуон барылыгар бэйэбит көҕүлээһиммитин, этиилэрбитин бэлэмнээһин буолар».
Саха сиригэр оҕолор сайыҥҥы дьарыктарын уонна сынньалаҥнарын тэрийии туһунан сиһилии СӨ үөрэх миниистирин солбуйааччы Эдуард Кондратьев иһитиннэрдэ. Кини туһааннаах боппуруос төрүтүнэн «Оҕо сынньалаҥын уонна кинилэри чэбдигирдиини тэрийии уонна хааччыйыы туһунан» СӨ бырабыыталыстыбатын уурааҕа буоларын эттэ. Онно олоҕуран муниципальнай оройуоннарга уонна куорат уокуруктарыгар субсидиялар индексацияланаллар. 2015 сыллаахха ити сыалларга 235 мөл. солк. көрүллүбүт, ол иһигэр 225 мөл. солк. – аска-үөлгэ, хоту уонна арктическай улуус оҕолоро чэбдигирдэр тэрилтэлэргэ сынньалаҥҥа барыыларыгар, педагогтар, иитээччилэр, баһаатайдар уонна медицинскэй үлэһиттэр хамнастарыгар эбии төлөбүргэ субсидиялар. 13 сайыҥҥы лааҕырга өрөмүөн үлэтин ыытыыга 10 мөл. солк. субсидия көрүллүбүт, ол иһигэр 2 250 тыһ. солк. – Булуҥҥа, Муомаҕа, Орто Халымаҕа.
Миниистири солбуйааччы Эдуард Кондратьев былырыын өрөспүүбүлүкэ туруорсуутунан, олох уустук балаһыанньатыгар түбэспит оҕолор сынньалаҥнарын өйүүргэ 39 мөл. солк. кээмэйдээх федеральнай субсидия сөргүтүллүбүтүн эттэ. Ити суума суотугар 944 оҕо сынньанар кыахтаммыт.
Эдуард Кондратьев иһитиннэрбитинэн, федеральнай сокуону оҥорууга уларытыылар, ол курдук, 2017-2018 сс. саҥа нуормалар уонна өйдөбүллэр күүстэригэр киирэллэр.
«Рекреационнай үөрэхтээһин өйдөбүлэ киириэҕэ. Лицензиялааһын чааһыгар элбэх боппуруос үөскүүр, ол иһигэр биһиэхэ эмиэ. Үөрэххэ анамматах сайыҥҥы холбоһуктар тустарынан ыйытыылар бааллар», — диэн бэлиэтээтэ Эдуард Кондратьев.
Эдуард Кондратьев оҕо сайыҥҥы дьарыгын уонна сынньалаҥын эйгэтигэр ыытыллар үлэ туһунан этэригэр, Саха сиригэр сүрүн көрдөрүүлэр ситиһиллибиттэрин иһитиннэрдэ. Миниистир солбуйааччыта бэлиэтииринэн, биһиги республикабыт оҕо сайыҥҥы лааҕырдарын тэрийиигэ Уһук Илиҥҥэ инники күөҥҥэ иһэр.
Өрөспүүбүлүкэ 17 оройуонугар табаһыттар оҕолорун ыстаадаҕа тиэрдиигэ, аҕалыыга миэрэлэр ылыллыбыттар: 2015 сылга 567 оҕоҕо – 16 598,3 тыһ. солк., 2016 сылга 576 оҕоҕо – 17 291,8 тыһ. солк.
Быйыл 800 оҕо Сочига Хара муораҕа сынньаммыт. Оттон «Артек», «Океан», «Орленок», «Смена» уонна «Сириус» Бүтүн Россиятааҕы оҕо кииннэригэр быйыл Саха сириттэн уопсайа 663 оҕо сынньанан кэлбит. «Сириус» лааҕырга анал путевканан олимпиадалар, конференциялар кыайыылаахтара ыҥырыллыбыттар.
«Артек» – 2015- 142, 2016 – 234
«Океан» – 2015- 280, 2016- 334
«Орленок» – 2015- 75, 2016- 50
«Смена» 2015- 25, 2016 – 25
«Сириус» 2015- 20, 2016- 20
Барыта 2015 -542, 2016- 663
Дьокуускайдааҕы үөрэх управлениетын начальнигын солбуйааччы Егор Охлопков быйыл киин куоракка анаан сайыҥҥы сынньалаҥы тэрийиигэ өрөспүүбүлүкэ бюджетыттан 35 мөл. солк. көрүллүбүтүн иһитиннэрдэ. Егор Охлопков биир сүрүн кыһалҕанан лааҕырдар материальнай-техническэй базалара олус эргэрбитин ааттаата.
«Спутник» лааҕыр начальнига Вера Левина Дьокуускай куорат таһынааҕы лааҕырдар начальниктарын ааттарыттан үбүлээһин боппуруоһун туруоруста. Кини этэринэн, билигин төрөппүттэр үксүлэрэ оҕолор сайыҥҥы сынньалаҥнарын бэйэлэрэ уйунарга бэлэмнэр. 2012 сылтан ыла куорат таһынааҕы биэс лааҕыр Дьокуускай куорат оскуолаларыгар бэриллибит. Холобур, «Спутник» Дьокуускай куораттааҕы 2 №-дээх оскуола бас билиитигэр киирбит. «Төрөппүттэр путевканы төлүүллэрин туһугар, биһиги материальнай-техническэй базабыт толору эппиэттиэхтээх, бары тоҕоостоох усулуобуйа тэриллиэхтээх. Холобур, былырыын «Спутник» лааҕырга 2 нүөмэрдээх оскуола кэмчилээбит үбүн суотугар сайыҥҥы бассейн тутулунна. Быйыл итинник бассейн «Радуга» лааҕырга тутулунна. Биһиги оҕолор сайыҥҥы сынньалаҥнарын туох да итэҕэһэ суох атааралларыгар кыһанабыт», — диир Вера Левина. Итиэннэ кини куорат таһынааҕы оҕо лааҕырдара билигин уустук балаһыанньалаахтарын, дьиэлэрэ-уоттара олус эргэтин сүрүн кыһалҕа быһыытынан хатылаан эттэ. Аны дойду таһымнаах судаарыстыбаннай бырагыраамаларга, бырайыактарга кыттар кыахтара суох эбит. Тоҕо диэтэр, ити куонкурустар сүрүн усулуобуйаларынан лааҕыр сирэ-уота лааҕыр бас билиитигэр сылдьар буолуохтаах эбит. Онон Вера Левина куорат таһынааҕы лааҕырдар сирдэрин муниципалитет бас билиитигэр биэрэргэ этии киллэрдэ.
Биир сонун этиини мунньахха норуот депутата Василий Местников киллэрдэ. Кини сайын оҕолору өрөспүүбүлүкэ тас өттүгэр ыыта сатаабакка, бэйэбит сирбитигэр-уоппутугар, холобур, кэрэ айылҕалаах Өймөкөөҥҥө баар лааҕырга сынньатар туһунан эттэ.
«Төгүрүк остуолга» кыттыбыт норуот депутаттара оҕо сайыҥҥы сынньалаҥын туһунан чопчулуур ыйытыылары биэрдилэр, этиилэри киллэрдилэр. Түмүккэ Антонина Григорьева оҕолор сайыҥҥы сынньалаҥнарын тэрийии тула кэпсэтии манан тохтооботун, инникитин өссө парламент истиилэрин ыытар наадатын туһунан эттэ.