806
17 апреля 2015 в 12:41
Депутаттар, аппараат үлэһиттэрэ биир күннээх хамнастарын Хакасияҕа ыытарга быһаардылар
Ил Түмэн Бэрэссэдээтэлэ Александр Жирков Российскай Федерация регионнарыгар - Хакасия Республикатыгар, Забайкальскай, Красноярскай уонна Алтайскай кыраайдарга - айылҕа алдьатыытыттан үөскээбит ыксаллаах быһыынан-майгынан сибээстээн сүбэ мунньаҕы ыытта. Сүбэ мунньахха Ил Түмэн сис кэмитиэттэрин уонна хамыыһыйаларын бэрэссэдээтэллэрэ кытыннылар. Ити туһунан Ил Түмэн пресс-сулууспата иһитиннэрдэ.
Парламент спикерэ Александр Жирков депутаттарга Саха Республикатын салалтата баһаартан эмсэҕэлээбит Хакасия дьонугар-сэргэтигэр көмөнү оҥорор туһунан быһаарыы ылыммытын иһитиннэрдэ. Россия Ыксаллаах быһыыга-майгыга сулууспата иһитиннэрэринэн, Хакасия Республикатыгар муус устар 12 күнүгэр оту көҥүлэ, көрүүтэ-истиитэ суох өртөөһүн итиэннэ кураан күн-дьыл, сөкүүндэҕэ 25 м түргэннээх күүстээх тыал түмүгэр барбыт баһаар олорор дьиэлэри, уһаайбалары сиэбит. Хакасия Республикатыгар 7 муниципальнай тэриллиигэ (Алтайскай, Аскизскай, Бейскай, Боградскай, Ширинскэй, Орджоникидзевскай, Усть-Абаканскай оройуоннарга) 38 нэһилиэнньэлээх пууҥҥа 1294 ыал олорор чааһынай дьиэтэ уокка былдьанна уонна уоттан эмсэҕэлээтэ.
Хакасия Республикатыгар муус устар 14 күнүгэр уокка былдьанан суорума суолламмыттары кэриэстиир траур биллэрилиннэ. Ити быһылаанынан сибээстээн, Ил Түмэн Бэрэссэдээтэлэ Александр Жирков күн бастакы аҥарыгар Хакасия Республикатын Үрдүкү Сэбиэтин Бэрэссэдээтэлин Владимир Штыгашевы кытта төлөпүөнүнэн кэпсэтиитигэр Хакасия сиригэр буолбут улахан баһаарга дьон өлбүтүнэн бэйэтин кутурҕанын тиэртэ. Икки регион парламеннарын спикердэрэ айылҕа алдьархайын содулларын туоратыыга уонна баһаарга туга да суох хаалбыт дьоҥҥо көмөнү оҥорууга туох дьаһаллары ылынар туһунан кэпсэттилэр. Александр Жирков Алтай Государственнай Мунньаҕын – Эл Курултайын Бэрэссэдээтэлин Иван Белековы, Тыва Республикатын Үрдүкү Хуралын Бэрэссэдээтэлин Кан-оол Давааны уонна Бурятия Народнай Хуралын Бэрэссэдээтэлин Матвей Гершевиһы кытта кэпсэтиилэригэр айылҕа сааскы кэмҥэ тахсар алдьархайдарыттан көмүскэниигэ бэлэмнэнии боппуруоһун тумнубата.
Маны сэргэ сүбэ мунньахха Саха сиригэр сааскы халаан уонна баһаар барар кутталлаах кэмигэр бэлэмнэнии боппуруоһа дьүүллэһилиннэ. Александр Николаевич Ил Түмэн сис кэмитиэттэрин бэрэссэдээтэллэригэр Саха Республикатын Правительствотын туһааннаах хамыыһыйаларын састаабыгар киирэллэригэр, ыксаллаах быһыы-майгы үөскүүр түгэнигэр ыытыллар үлэлэргэ кытталларыгар сорудахтаата.
Сүбэ мунньах кыттыылаахтара тыа хаһаайыстыбатын сирдэригэр сааскы өртөөһүнү тэрээһиннээхтик, кытаанах хонтуруолунан ыытар сөптөөҕүн этэн туран, Ил Түмэн депутаттарын уонна аппараатын үлэһиттэрин биир күннээх хамнастарын Хакасияҕа баһаартан эмсэҕэлээбиттэргэ ыытан көмөлөһөргө быһаарыы ылыннылар.
