804
28 октября 2016 в 10:15
Гражданскай турук аакталарын регистрациялааһыҥҥа уларытыылар
«Саха Өрөспүүбүлүкэтин куорат уокуруктарын, куораттааҕы уонна тыа сиринээҕи поселениеларын олохтоох салайыныыларын уорганнарыгар гражданскай турук аакталарын судаарыстыбаннай регистрациялааһыҥҥа сорох судаарыстыбаннай боломуочуйалары аныыр туһунан» Саха Өрөспүүбүлүкэтин Сокуонугар уларытыылары киллэрэр туһунан» өрөспүүбүлүкэ сокуонун барылын СӨ Бырабыыталыстыбата ыйыллыбыт сокуон сорох нуормаларын билигин үлэлиир федеральнай уонна өрөспүүбүлүкэтээҕи сокуоннарга сөп түбэһиннэрэр сыалтан оҥорбута. Ити туһунан парламент пресс-сулууспатын иһитиннэриитэ таҕыста.
Сокуон барыла алтынньы 25 к. Ил Түмэн XXIV (уочараттаах) пленарнай мунньаҕар көрүлүннэ. Бастатан туран, сокуон барылынан «куораттааҕы уокуруктар» диэни «куорат уокуругар» диэн тылларга уларытыы киллэриллэр. Бу уларытыы сокуон барылын сыһыарыытыгар биир эрэ куорат уокуруга – «Жатай» КУо ыйыллыбытынан сибээстээн оҥоһуллар.
Сокуон барылын быһыытынан, көрүллэр сокуон 4-с ыстатыйатын 3-с пуунун күүһүн сүтэрбитинэн билинэргэ этиллэр. Ити пууҥҥа уларытыы ыал буолар киһи сокуоннай сааһын туола илик буоллаҕына, кини сааһын ситэ илигинэ ыал буоларыгар көӨүлү биэрии өрөспүүбүлүкэ куораттааҕы уокуруктарын, куораттааҕы уонна тыа сиринээҕи поселениеларын олохтоох салайыныы уорганнарын сорох боломуочуйатыгар киирэринэн быһаарыллар. Аахсыллар биричиинэ баар буоллаҕына, ыал буолар баҕалаах дьон көрдөһүүлэринэн, 16 саастарын туолбут дьон кэргэннии буолалларын олорор сирдэринэн олохтоох салайыныы уоргана көҥүллүүрүн туһунан РФ Дьиэ кэргэн кодексыгар суруллар. Оттон федеральнай сокуонунан, ыйыллыбыт боломуочуйа олохтоох салайыныы уорганнарын боломуочуйатыгар сыһыаннаах буолан, өрөспүүбүлүкэ сокуонугар ити нуорманы ыйар наадата суох.
Гражданскай турук аакталарын судаарыстыбаннай регистрациялааһыҥҥа боломуочуйалар анаммыт муниципальнай тэриллиилэр олохтоох салайыныыга уорганнара ыйыллыбыт сыалларга үбү туһаныыларын хонтуруоллааһын чааһыгар билигин үлэлиир сокуон 5-с ыстатыйатыгар уларытыылары киллэрии туһунан сокуон барылыгар көрүллэр. Олохтоох салайыныы уорганнара гражданскай турук аакталарын регистрациялааһыҥҥа сорох судаарыстыбаннай боломуочуйаларын хайдах толороллорун туһунан отчуоттарын сүрүннүүр 15-с ыстатыйаҕа уларытыылар киллэриллэллэр.
Олохтоох салайыныы уорганнара кинилэргэ бэриллибит сорох судаарыстыбаннай боломуочуйаларын тохтотоллорун эбэтэр ыйыллыбыт боломуочуйалары болдьоҕун иннинэ тохтотоллорун туһунан балаһыанньалары сүрүннүүр сокуон 18-с ыстатыйатын күүһэ сүппүтүнэн билинэргэ этиллэр.
Сокуон барылын редакциятын быһыытынан, олохтоох салайыныы уорганнарыгар бэриллибит гражданскай турук аакталарын судаарыстыбаннай регистрациялааһын боломуочуйалара төттөрү ылыллыахтарын эрэ сөп. Манан сибээстээн «Олохтоох салайыныы уорганнарыгар бэриллибит сорох судаарыстыбаннай боломуочуйалары төттөрү ылыы усулуобуйалара уонна бэрээдэгэ» диэн 18.1 ыстатыйа саҥалыы бэриллэр. Боломуочуйаны төттөрү ылыы икки түгэнэ быһаарыллыбыт: бастакытынан, олохтоох салайыныы уорганнара ыйыллыбыт боломуочуйаларын мөлтөхтүк толороллорунан сибээстээн; иккиһинэн, гражданскай турук аакталарын суруйар уорганнары тэрийиинэн сибээстээн.
Онон 18.1 ыстатыйа саҥа редакциятыгар боломуочуйалары төттөрү ылыы бэрээдэгэ быһаарыллар, ол иһигэр төттөрү ылар туһунан туһааннаах сокуону оҥоруу уонна ылыныы туһунан. Бэриллибит боломуочуйалары төттөрү ылар түгэҥҥэ олохтоох салайыныы уорганнара ити боломуочуйалары олоххо киллэриигэ анаммыт үбү уонна материальнай сириэстибэлэри төннөрүөх тустаахтар.
Дьүүллэһии кэнниттэн норуот депутаттара сокуон барылын бастакы ааҕыыга ылыннылар.
