II Съезд — кэлэр сыл кулун тутарыгар

Саха сирин муниципальнай тэриллиилэрин бэрэстэбиитэллээх уорганнарын депутаттарын II Съеһин бэлэмнээһиҥҥэ уонна ыытыыга тэрийэр кэмитиэт мунньаҕа Ил Түмэн спикерэ Петр Гоголев уонна олохтоох салайыныы боппуруостарыгар сис кэмитиэт бэрэссэдээтэлэ Василий Местников салайыыларынан балаҕан ыйын 25 к. буолан ааста.

Мунньах бэбиэскэтин сүрүн боппуруоһунан өрөспүүбүлүкэ муниципальнай тэриллиилэрин бэрэстэбиитэллээх уорганнарын депутаттарын IІ Съеһигэр бэлэмнэнии үлэтэ буолла. Спикер Петр Гоголев бэлиэтээбитинэн, 2017 сылга ыытыллыбыт бастакы съеһи делегаттар улаханнык сэҥээрбиттэрэ.

Ол тэрээһин чэрчитинэн 6 төгүрүк остуол, семинар уонна квалификацияны үрдэтэр куурустар ыытыллыбыттара. Куурустарга истээччилэр бырайыактары салайыы төрүттэригэр үөрэммиттэрэ, бырайыагы салайыыга нуормалыыр докумуоннары, о.д.а. кытта билсибиттэрэ.

Спикер съезд ис хоһоонугар болҕомтону уурарга, форум үлэтиттэн муҥутуур түмүктэри ылар туһугар ханнык сытыы боппуруостары дьүүллэһэри, чопчу хайысхалары быһаарарга ыҥырда.

Съезд быһа барыллаан 2020 сыл кулун тутар 26-28 кк. ыытыллара быһаарылынна. Съезд сүрүн тэрээһиннэринэн баһылыктарга уонна депутаттарга семинардар, төгүрүк остуоллар, пленарнай мунньах уонна муниципальнай тэриллиилэр бэрэстэбиитэллээх уорганнарын спартакиадата буолуохтара.

Ураты болҕомто кэлэр съезд делегаттарыгар квотаны тыырыы боппуруоһугар, делегаттары туруоруу болдьохторугар уонна оройуоннар, куораттар делегацияларын састаабыгар сүбэлэргэ уурулунна. Итини сэргэ съеһи ыытыы миэстэтин, ороскуоттар сметаларын боппуруостара көрүлүннүлэр.

2019 с. сэтинньи 1 к. болдьоххо диэри тэрийэр кэмитиэккэ этиилэр киириэхтээхтэр.

Санатар буоллахха, І Съезд үлэтигэр Саха сирин бары нэһилиэктэриттэн уонна оройуоннарыттан 511 депутат кыттыбыта. Бу бэлиэ тэрээһиҥҥэ Федерация Сэбиэтиттэн сенатордар, Госдума депутаттара, олохтоох салайыныы боппуруостарыгар экспердэр кыттыбыттара.