Иккис мунньахха тугу дьүүллэстилэр?

Пенсия сокуонун тупсарыыга үлэлиир бөлөх салайааччыта, Госдума Бэрэссэдээтэлин солбуйааччыта Ольга Тимофеева иһитиннэрбитинэн, бөлөх сүрүн соруктарыттан биирдэстэрэ – элбэх сокуон барылларын сөп түбэһиннэрии.

«Хас биирдии этиллэр нуорманы бары өттүттэн көрөбүт, бөлөххө этиилэр дойдуттан бүтүннүүтүттэн киирдилэр, биһиги сорукпут – Госдума хас биирдии кэмитиэтэ бэйэтин боломуочуйаларын чэрчитинэн барытын ырытыахтаах», — диэтэ кини.

Ольга Тимофеева санаппытынан, оробуочай бөлөххө дьыалабыай эйгэ бэрэстэбиитэллэрэ уонна предпринимателлэр, Россия идэлээх сойуустарын холбоһуктарын лидердэрэ, биллэр экспердэр киирэллэр.  «Сокуон барылын тупсарыыга биһиги кинилэр санааларын истэргэ бэлэммит»,  — диэтэ кини.

Госдума Бэрэссэдээтэлин солбуйааччы ылыллыбыт сокуоннары туһаныыга хонтуруол ирдэнэригэр болҕомтону тарта. Кини итини сэргэ номнуо 65 субъектан гражданнар сорох категорияларыгар пенсияҕа болдьоҕун иннинэ тахсыыны хаалларарга туруорсубуттарын туһунан иһитиннэрдэ.

Үлэҕэ, социальнай политикаҕа уонна ветераннар дьыалаларыгар Кэмитиэт бэрэссэдээтэлэ Ярослав Нилов: «Кэмитиэт этиилэри түмүүнү салгыыр», — диэтэ. «Балаҕан ыйын 19 күнүгэр буолуохтаах мунньах чэрчитинэн пенсияҕа тахсыан иннинээҕи  саастаах дьоҥҥо диспансеризацияны баралларыгар икки күнү анааһын туһунан нуорманы дьүүллэһии ыытыллыаҕа”, — диэн бэлиэтээтэ. Бюджекка уонна нолуокка Кэмитиэт бэрэссэдээтэлэ Андрей Макаров РФ Нолуогун кодексыгар көннөрүүлэр тустарынан кэпсээтэ, чуолаан, пенсияҕа тахсар саас уларыйарын үрдүнэн, аҕа саастаах гражданнарга нолуокка чэпчэтиилэр оннунан хаалаллара мэктиэлэнэр.

«Кэлэр сыл тохсунньу 1 күнүттэн сокуон күүһүгэр киирэрин курдук, ити сокуон барылын бастакы ааҕыы алтынньы 18 к. ыытыллара былааннанар», — диэн эбэн эттэ кэмитиэт баһылыга.

Кини сокуон барылын көрүү кэнниттэн оробуочай бөлөх салгыы үлэлиирэ суолталааҕын, дойду бүтүннүүтүн сиригэр-уотугар нуормалар олоххо киириилэрин кэтээн көрүөхтээҕин бэлиэтээтэ.

Бюджеты нулевой ааҕыыга көрүү туһунан этэригэр, Андрей Макаров пенсия кээмэйэ сарбыллыа суоҕун иһитиннэрдэ: «Федеральнай бюджеттан Пенсионнай фондаҕа 0,5 трлн солк. аһарар үп ыытыллыаҕа».

Россия тутулуга суох идэлээх сойуустарын Федерациятын бэрэссэдээтэлэ Михаил Шмаков сокуоҥҥа нуорманы бигэргэтэн, ол быһыытынан страховой усунуостар бары 22% Пенсионнай фонда счетугар түһүөх тустаахтар диэн этии киллэрдэ.

Итини таһынан, кини Хоту сир аҕыйах ахсааннаах норуоттарыгар эрэ буолбакка, хотугу сирдэргэ олорор дьоҥҥо барыларыгар пенсияҕа тахсар сааһы оннунан хаалларары сөптөөҕүнэн ааҕар.

«Үлэ биэрээччи хамнаһы төлүүрүгэр “бороҥ” схемалары ту­һам­мытын уонна үлэ дуогабарыгар илии баттаабатаҕын иһин холуобунай эппиэтинэһи кытаатыннарар наадалаах, оттон пенсияҕа тахсыан иннинээҕи саастаах дьон бырааптарын кэһии түгэнигэр этиллибит холуобунай эппиэтинэс оннугар административнай эппиэтинэһи киллэриэххэ», — диэн санаалаах Михаил Шмаков.

Россия Уопсастыбаннай палаататын сэкирэтээрэ Валерий Фадеев идэлээх сойуустар бэрэстэбиитэллэрин санааларын өйөөтө, маныаха кини үлэ биэрээччилэргэ холуобунай эппиэтинэһи олохтооһуҥҥа сэрэнэн сыһыаннаһар, бизнес бэрэстэбиитэллэрин интэриэстэрин болҕомтоҕо ылар наадалааҕын бэлиэтээтэ.

Оттон судаарыстыбаннай тутууга уонна сокуону оҥорууга Кэмитиэт бэрэссэдээтэлин солбуйааччыта Александр Грибов пенсия иннинээҕи саастаах дьон бырааптарын кэһии иһин үлэ биэрээччилэргэ холуобунай эппиэтинэһи киллэриигэ Россия Президенин көннөрүүлэрэ суолталаахтарын уонна көдьүүстээхтэрин ыйда. «Нуорма сэрэтии быһыытынан үлэлиэҕэ диэн эрэллээхтик этиэххэ сөп», — диэтэ Александр Грибов, итиэннэ уларытыылар пенсияҕа тахсыан иннинээҕи саас – пенсияҕа тахсыах иннинээҕи 5 сыл – диэн өйдөбүлү киллэрэллэрин чопчулаата.

Культура Кэмитиэтин бэрэссэдээтэлэ Елена Ямпольская кэккэ айар идэлээх дьоҥҥо пенсияҕа болдьоҕун иннинэ тахсар сааһы оннунан хаалларыы сиэрдээх буолуоҕа диэн эттэ.

«Үс категория туһунан умнар табыллыбат – балет артыыстарын, цирк артыыстарын уонна духовой инструменнарга оонньуур музыканнары. Ити идэлэр бэрэстэбиитэллэрин үлэтэ киһи этэ-хаана кэбирээһинин кытта сибээстээх итиэннэ үрдүк психофизическэй ноҕуруускалаахтара биллэр», — диэтэ кини.

Доруобуйа харыстабылыгар Кэмитиэт бэрэссэдээтэлэ Дмитрий Морозов эппитинэн, пенсия сокуонун тупсарыыга кэмитиэт аҕа саастаах көлүөнэҕэ диспансеризацияны ыытыыны хааччыйар көннөрүүлэри киллэрбитэ. «Биһиэхэ тыа сиригэр 25 сыл уонна куоракка 30 сыл үлэ ыстаастаах медицинскэй үлэһиттэргэ болдьоҕун иннинэ пенсияҕа тахсыыны оннунан хаалларары өйүүр үгүс туруорсуу киирдэ. Ону таһынан, биһиги туһааннаах министиэристибэни кытта ординатураны барыы болдьоҕун уопсай үлэ ыстааһыгар киллэрии кыаллыан сөбүн туһунан дьүүллэһиэхпит», — диэн бэлиэтээтэ Кэмитиэт баһылыга.