Ил Түмэн сүрүн тутулун чопчулаатылар

РФ Федеральнай Мунньаҕар Федерация Сэбиэтин чилиэнин боломуочуйатын анааһын боппуруоһа көрүллэн, СӨ Судаарыстыбаннай Мунньаҕыттан (Ил Түмэнтэн) бэрэстэбиитэли таллылар. Ил Түмэҥҥэ “Биир ньыгыл Арассыыйа” баартыйа фракциятын салайааччыта Владимир Чичигинаров сенатор дуоһунаһыгар норуот депутата Александр Акимов кандидатуратын киллэрдэ. Александр Акимов үлэтин-хамнаһын туһунан кэпсээтэ. Кини Федерация Сэбиэтигэр Вячеслав Штыровтуун Уһук хотугу сиргэ олорор дьон доруобуйатын көрүүгэ-истиигэ сытыы боппуруостары көтөҕөн, гражданнар доруобуйаларын харыстабылын туһунан РФ сокуонугар уларытыыны киллэрэр этиилээх  тахсыбыттарын, хотугу оройуоннарга аччыгый авиацияны сайыннарар туһунан боппуруоһу көтөхпүттэрин иһитиннэриитигэр бэлиэтээтэ.

Өрөспүүбүлүкэттэн Федерация Сэбиэтин чилиэнигэр “Сиэрдээх Арассыыйа” партия регионнааҕы салаатыттан Михаил Эверстов кандидатурата эмиэ көрүлүннэ. Ол гынан баран, кини кандидатуратын бэйэтин баҕатынан уһулла. Онон кистэлэҥ куоластааһын кэнниттэн, Александр Акимов Федерация Сэбиэтигэр Саха Өрөспүүбүлүкэтин Судаарыстыбаннай Мунньаҕын бэрэстэбиитэлинэн 60 куолаһы ылан талылынна.

Пленарнай мунньахха Ил Түмэн сис кэмитиэттэрин уонна хамыыһыйатын тэрийии боппуруоһун быһаардылар. Ол курдук, 14 сис кэмитиэт уонна биир хамыыһыйа тэрилиннэ. VI ыҥырыы икки саҥа кэмитиэттэннэ. V ыҥырыыга  Виктор Федоров салайбыт Ил Түмэн инвестиция уонна бырамыысыланнас политикатыгар, предпринимательствоҕа, туризмҥа уонна инфраструктура сайдыытыгар сис кэмитиэтин оннугар Ил Түмэн экономикаҕа, инвестиция уонна бырамыысыланнас политикатыгар сис кэмитиэтэ уонна Предпринимательствоҕа, туризмҥа уонна инфраструктураҕа сис кэмитиэт тэрилиннилэр.

Бэһис ыҥырыыга Юрий Баишев салайбыт Ил Түмэн дьиэ кэргэн, оҕо аймах, физическэй култуура уонна спорт сис кэмитиэтин эмиэ икки тус-туспа кэмитиэккэ араардылар — дьиэ кэргэн уонна оҕо аймах кэмитиэтэ итиэннэ   ыччат дьыалаларыгар, чэгиэн олоххо уонна спортка кэмитиэт. Кэмитиэттэри чопчулааһын кэнниттэн норуот депутаттара кэмитиэттэр бэрэссэдээтэллэрин талыыга киирдилэр. Ол курдук, норуот депутаттара куоластаабыттарын кэннэ, кэмитиэт бэрэссэдээтэллэрэ кимнээх буолаллара билиннэ.

Бюджекка, үпкэ, нолуок уонна сыана политикатыгар, бас билии уонна приватизация боппуруостарыгар сис кэмитиэт бэрэссэдээтэлинэн Юрий Николаев, судаарыстыбаннай тутууга уонна сокуону оҥорууга сис кэмитиэт бэрэссэдээтэлинэн Алексей Еремеев, олохтоох салайыныы боппуруостарыгар кэмитиэт бэрэссэдээтэлинэн Василий Местников, сир сыһыан­наһыыларыгар, айылҕа ресурсаларыгар уонна экологияҕа сис кэмитиэт бэрэссэдээтэлинэн Владимир Прокопьев, Хоту сир аҕыйах ахсааннаах төрүт норуоттарын боппуруостарыгар уонна Арктика дьыалаларыгар сис кэмитиэт бэрэссэдээтэлинэн Елена Голомарева буоллулар, манна бэлиэтиир буоллахха, кинилэр урукку миэстэлэригэр хааллылар. Оттон саҥа талыллааччылар: тутууга уонна ОДьКХ кэмитиэтин бэрэссэдээтэлинэн Яков Ефимов, саҥа тэриллибит экономика, инвестиция уонна бырамыысыланнас политикатыгар сис кэмитиэт бэрэссэдээтэлинэн Павел Петров, предпринимательствоҕа, туризмҥа уонна инфраструктураҕа сис кэмитиэт бэрэссэдээтэлинэн Игорь Григорьев, доруобуйа харыстабылыгар, социальнай көмүскэлгэ, үлэҕэ уонна дьарыктаах буолууга сис кэмитиэт бэрэссэдээтэлинэн Владимир Чичигинаров, тыа сиригэр уонна аграрнай политикаҕа сис кэмитиэт бэрэссэдээтэлинэн Андрей Находкин, наукаҕа, үөрэххэ, култуураҕа, сонуну тарҕатар сириэстибэлэргэ уонна общественнай тэрилтэлэргэ кэмитиэт бэрэссэдээтэлинэн Феодосия Габышева, дьиэ кэргэн уонна оҕо аймах дьыалаларыгар кэмитиэт бэрэссэдээтэлинэн Алена Атласова, ыччат дьыалаларыгар, чэгиэн олоххо уонна спорка кэмитиэт бэрэссэдээтэлэ Михаил Гуляев, Хонтуруоллуур кэмитиэт бэрэссэдээтэлинэн Евгений Перфильев, мандаакка уонна регламеҥҥа хамыыһыйа бэрэссэдээтэлинэн Андрей Николаев буоллулар.