Ититии сезонугар бэлэм — ураты хонтуруолга

Ойуур баһаарын туһунан иһитиннэрии оҥоһулунна. Тырааныспар уонна олоҕу-дьаһаҕы хааччыйыы департаменын салайааччыта Александр Каминскай иһитиннэрбитинэн, атырдьах ыйын 17 күнүнээҕи туругунан, Алдан уонна Ньурба улуустарыгар турбут 71 гаа уопсай иэннээх ойуур баһаара умуруоруллубут. Бу күҥҥэ атын ойуур баһаара суох.
Хотугу навигация бигэ туруктаахтык ыытылла турар. Таһаҕаһы тиэрдии, былааннаах эрэсиимигэр сөп түбэһиннэрэн, толоруллар. Суудуналар боростуойдааһыннара таһаарылла илик.

АПК департаменын иһитиннэриитинэн, сүөһү аһылыгын бэлэмнээһин былаана быһа барыллаан 57 бырыһыан туолбут. Аартыкатааҕы уонна хотугу улуустарга уһун ардахтар тураннар, оттооһун үлэтэ олох ыараханнык ыытыллар. Тэрээһин боппуруостар кыайан быһаарыллабаттарыттан, Бүлүү сүнньүн улуустара оттооһун графигыттан хаалан иһэллэр. Маныаха Егор Борисов муниципальнай тэриллиилэр баһылыктарын кытта үлэни күүһүрдэргэ эттэ.

Каадыр бэлиитикэтин, судаарыстыбаннай уонна муниципальнай сулууспалар департаменын салайааччыта Андрей Мартынов салалта эрэсиэрбэтин олохтооһун хаамыытын туһунан информациялаата. Сайаапкалары ылыы балаҕан ыйын саҥатыгар бүтүөхтээх, билиҥҥитэ 160 претендент докумуона киирбит. Сүүмэрдээһин аһаҕас буолуутун хааччыйар инниттэн, хамыыһыйалар үлэлэригэр СМИ уонна уопсастыбаннай сэбиэттэр бэрэстэбиитэллэрэ кыттыахтара. Ону тэҥэ, видео-уһулуу тэриллиэ.

Түмүккэ Егор Борисов Үөһээ-Халыма уонна Үөһээ-Бүлүү улуустарыгар сырыыларын түмүгүн билиһиннэрдэ. Ыксаллаах сезоннааҕы үлэлэр, ол иһигэр ититии боппуруостарын ураты болҕомтоҕо тутарга эттэ.