Күһүүрдэр туруорсаллар

Хоту сир аҕыйах ахсааннаах төрүт норуоттарын боппуруостарыгар уонна Арктика дьыалаларыгар Ил Түмэн сис кэмитиэтин бэс ыйын 11 күнүнээҕи мунньаҕар Булуҥ улууһун Күһүүр нэһилиэгин кыһалҕаларын көрдүлэр. Ол курдук, бэбиэскэҕэ биэс боппуруос турда.

Күһүүргэ Сбербанк үлэлиир кэмэ уһуоҕа

Төһөтүн да иһин тыһыын­чаттан тахса нэһилиэнньэлээх бөһүөлэккэ нэдиэлэҕэ иккитэ эрэ баан өҥөтүнэн туһанар тутах. Билиҥҥи глобализация, цифровизация үйэтигэр элбэх операцияны баан нөҥүө аһардар буоллулар. Күһүүр олохтоохторо бу боппуруоһу туруорсубуттара быданнаата.

Күһүүргэ Сбербанк филиала бэнидиэнньиккэ уонна чэппиэргэ 10.00 – 14.00 ч.үлэлиир. Олохтоох нэһилиэнньэ, бүддьүөт тэрилтэлэрэ бүтүннүү, кредитнэй операциялар уо.д.а. барыта баан нөҥүө эргийэр буолан, олохтоохторго бу кэм кырыымчыга үгүс кыһалҕаны үөскэтэрэ саарбахтаммат.

Хоту сир аҕыйах ахсааннаах төрүт норуоттарын боппуруостарыгар уонна Арктика дьыалаларыгар Ил Түмэн сис кэмитиэтин бэрэссэдээтэлэ Елена Голомарева бу боппуруоһу тус хонтуруолга ылан, үөрэтэн, бырабыыталыстыба көрүүтүгэр ыыппыта. Салгыы уопсай мунньах тэриллэн, маннык кыһалҕалаах нэһилиэктэргэ баан үлэтин бириэмэтин уһатар сорук турар.

Күһүүр — Булуҥ улууһун Булуҥ нэһилиэгин киинэ. Нэһилиэнньэтин ахсаана 1345 киһи (2010 с дааннайдарынан). Тиксииттэн 150 км. сиргэ Өлүөнэ кытылыгар турар. Олохтоохтор дьарыктара таба иитиитэ, булт, балыктааһын. Уруккута Тиксии төрүттэнэ илигинэн 1957 с диэри улуус киинэ этэ. Транспорт сайын ууннан, кыһын массыына.

Буоста үлэтин тупсарар кэм кэллэ

Буоста үлэтэ эмиэ үгүс боппуруостары үөскэтэр.

Нэһилиэк баһылыга Николай Чемезов: “Оптимизация диэн ааттаан, буоста үлэһиттэрин: начаалынньык уонна оператор хамнаһын 0,5 көһөрөргө диэн сурах кэлэн улаханнык долгутта”, – диир.

“Почта России” тэрилтэ операционнай управлениетын дириэктэрин солбуйааччы Жанна Грицкан: «Биллэн турар, бүтүн Арассыыйа үрдүнэн ыытыллыбыт унификация түмүгэр ордубут харчынан бу Арктика оройуоннарын хааччыйабыт. Биһиги үлэбитигэр аҕыйах нэһилиэнньэлээх кытыы нэһилиэктэр суолга-иискэ, ОДьКХ өттүгэр үгүс ороскуоту таһаараллар, ол гынан баран уларыйыы киирбэт, оптимизация ыыппаппыт, барыта оннуна хаалар», – диэн эрэннэрдэ.

Норуот дьокутаата Виктор Губарев буоста үлэтин тэтимин сөбүлээбэтин эттэ: “Арктика курдук ыарахан усулуобуйалаах дойдуга, кытыы нэһилиэктэргэ дьону үлэтэ суох хаалларар төрдүттэн сыыһа. Ону ааһан буоста үлэтин тэтимин номнуо түргэтэтэр кэм кэллэ. Оннооҕор 100 сыл анараа өттүгэр биир ый иһигэр буостаны тиэрдэр сорук кытаанахтык турара. Оттон билиҥҥи туругунан буоста тэтимэ сир өппөтө. Дьон суруйтарбыт хаһыата ыйы ыйдаан аналлаах сиригэр тиийбэтэ хомолтолоох. Бу өттүгэр сыһыан уларыйыан наада. Ханнык баҕарар тэрилтэ үлэни дьон кыһалҕатын өйдөөн-төйдөөн туран ыытыахтаах”, – диэн тоһоҕолоон эттэ.

Саҥа оскуола саҥалыы тутуллуохтаах

Булуҥ оскуолата тутууга киирбитэ ыраатта. Ол эрээри үгүс күчүмэҕэйдэрдээх буолан, олоххо киирэ илик, кыраапыктан хаалан иһэр. Нэһилиэк баһылыга Николай Чемезов оскуола тутуутун хаамыытын иһитиннэрдэ: “Билиҥҥи туругунан оскуола тутуута этэҥҥэ баран иһэр, уопсайа 44 киһи үлэлии-хамсыы сылдьар. Сотору кэминэн уу суолунан матырыйаал устан кэллэҕинэ, үлэ күргүөмнээхтик барыа», — диэтэ. Кини оскуола олоххо киирдэҕинэ, урукку бырайыакка уонна сметаҕа киирбит оборудование, миэбэл саҥа страндартка эппиэттээбэт буолуо диэн сабаҕалыыр.

Бу боппуруоһу дьокутааттар хонтуруолга ыллылар, үлэни салгыы Минстрой нөҥүө ыытар ирдэнэр диэн бэлиэтээтилэр.

Күһүүргэ икки уу таһар массыына барыахтаах

Төрдүс боппуруос ОДЬКХ тула барда. Чуолаан Күһүүргэ иһэр ууну уонна техническэй ууну таһар массыына тиийбэтэ эмиэ урут-уруккуттан көтөҕүллэр кыһалҕа буолар.

ОДьКХ хомунаалынай комплексын руководителэ Валентин Чан бүддьүөтү тыырыыга икки массыына көрүллүбүтэ номнуо ылыллан Дьокуускайга “Урал” баазатыгар тураллар диэн үөрүүлээх сонуну иһитиннэрдэ. Онон мантан инньэ бу икки массыына этэҥҥэ Күһүүргэ тиийэрэ күүтүллэр.

Балыыһа тутуутун ситиһэргэ

Салгыы саҥа балыыһа тутуутун тула кэпсэтии буолла.

Доруобуйа харыстабылын министиэристибэтин үлэтин сүрүннүүр салалта дириэктэрэ Альберт Жирков маннык эттэ: “Балыыһа тутуллуохтаах диэн былааҥҥа киирбитэ. Ол эрээри бырайыактыыр-сметалыыр докумуон ирдэнэр. Ол докумуон силигин ситтэҕинэ, саҥа балыыһа тутуута 2025 сылтан саҕаланыаҕа».

Ити курдук Ил Түмэн дьокутааттара тустаах министиэристибэ, биэдэмистибэ бэрэстэбиитэллэрин кытта олох-дьаһах сытыы боппуруостарын ситимнээхтик үлэлэһэн, үгүс сытыы боппуруостары быһаараллар. Күһүүр нэһилиэгин баһылыга Николай Чемезов үүйэ-хаайа тутар боппуруостарыгар дьэҥкэ хоруйу истэн, оруннаахтык быһаартаран, үөрэн-көтөн туран, дьокутааттарыгар, тэрилтэлэр бэрэстэбиитэллэригэр махтанна.

Ирина Ханды