Көҕөрдүүгэ – күргүөмнээхтик!

Сыл аайы дойду үрдүнэн «Маһы олордуу Бүтүн Россия­тааҕы күнэ» экологическай акция чэрчитинэн мас олордуутугар субуотунньуктар ыытыллаллар. Бу акция аан бастаан 2011 сыллаахха ыам ыйын 14 күнүгэр Ойуур хаһаайыстыбатын федеральнай агентствотын көҕүлээһининэн буолбута уонна үтүө үгэскэ кубулуйда.
Быйыл норуот депутаттара Петровскай уонна Белинскай уулуссалар быһа охсуһууларыгар сири-уоту хомуйдулар уонна эдэр хатыҥ мастары олортулар.
Спикер Александр Жирков Дьокуускай куоракка олорор кэмин устата балайда элбэх маһы олордубутун, ол эрээри хас да сыл ааспытын кэннэ биир сиргэ иккистээн тиийэн мас олорпутун бэлиэтээтэ. “Олордуллубут мас акция да кэнниттэн салгыы көрүллүөхтээх, харайыллыахтаах, үүнэ, чэлгийэ туруохтаах. Ол куорат хас биирдии олохтооҕун кыһамньылаах сыһыаныттан тутулуктаах. Оччоҕо эрэ куораппыт өрүү күөх туруоҕа”, – диэтэ спикер.

Александр Жирков бүгүн норуот дьокутааттара университекка тиэрдэр уулуссаҕа мастары олордубуттарын бэлиэ түгэнинэн сыаналаата. «Бүгүн олордуллубут мастар аҕыйах сылынан силистэрэ бөҕөргөөн, кэрэ көстүүлэринэн оҕолорбутун уонна сиэннэрбитин, биһигини кэрэхсэтиэхтэрэ диэн эрэнэбин», — диэтэ.
Ил Түмэн бастакы вице-спикерэ Анатолий Добрянцев биһиги куораппыт Россия биир көҕөрдүллэ илик куоратынан буоларын бэлиэтээтэ: “Хаһыс да сылын куораты көҕөрдүүгэ үлэ ыытыллар да, маһы үүннэриигэ технология, агрономия өттүттэн болҕомтолоох сыһыан, көрүү-харайыы суох. Ол иһин мастар, ордук хатыҥ мас, ситэн-хотон испэттэр. Дьиҥинэн, сиргэ хара буору кутан, бастакы биир-икки сыл устата уу куттахха мас үчүгэйдик үүнэр кыахтаах. Куорат хаһаайыстыбатын үлэһиттэрэ бу боппуруоска үчүгэйдик, үрдүттэн ылсан, анал идэлээх агрономнары, садоводтары, ойуур үлэһиттэрин, наука бэрэстэбиитэллэрин кытта сүбэлэһэн үөрэтиэхтэрин наада”.

Ил Түмэн бэрэссэдээтэлин солбуйааччы Ольга Балабкина маннык хабааннаах акциялар куорат олохтоохторун сомоҕолуулларын уонна Дьокуускай куорат ыраас туруктаах, күөх сирин-уотун элбэтиигэ ыччат болҕомтотун туһаайалларын бэлиэтээтэ. Ольга Валерьевна маһы үүннэриини эдэр сааһы, кэрэни, саҥа тыыны кытта ситимниирин эттэ.
Ил Түмэн сир сыһыан­наһыыларыгар, айылҕа ресурсаларыгар уонна экологияҕа сис кэмитиэтин бэрэссэдээтэлэ Владимир Прокопьев быйыл дойду үрдүнэн Экология сыла биллэриллибитин санатта. Кини итинэн сибээстээн өрөспүүбүлүкэ бар дьонун итэҕэллээхтэрэ Кыайыы күнүн иннинэ ыытыллыбыт улахан субуотунньукка кыттыыны ылбыттарын, инникитин да сири-уоту көҕөрдүүттэн, ыраастааһынтан туора турбат санаалаахтарын эттэ. «Аҕа саастаах көлүөнэ өйдүүрүнэн, сэбиэскэй кэмҥэ субуотунньук көмөтүнэн элбэх үлэ ыытыллар этэ. Хас биирдиибит маннык тэрээһиннэргэ кыттан тулалыыр эйгэҕэ харыстабыллаахтык сыһыаннаһарга сэмэй кылааппытын киллэрэбит», – диэтэ Владимир Прокопьев.

Дьокуускай куорат Октябрьскай уокуругун баһы­лыга Александр Ильин быйыл үлэ икки түһүмэҕинэн – күһүҥҥү уонна сааскы кэмнэри хабан ыытылларын эттэ. Уокурукка быйыл уопсайа 1200 мас олордуллара былааннанар эбит. Уокурук баһылыга куораты көҕөрдүүгэ кытталларыгар нэһилиэнньэни көҕүлүүргэ Александр Жирков салайааччылаах норуот дьокутааттара үтүө холобур буолалларын иһин махталын биллэрдэ.
Ил Түмэн дьокутааттара күргүөмүнэн тахсан мас олордуутугар көхтөөх кыттыыны ылбыттара куорат олохтоохторун, ыччаты батыһыннарар холобур буолуон сөп.

Василий Кононов
хаартыскалара.