Күлүмнүүргэ пааматынньык парламент иннигэр туруоҕа

Манна Ил Түмэн спикерэ Александр Жирков, өрөспүүбүлүкэ народнай депутаттара Михаил Габышев, Семен Иванов, СӨ идэлээх сойуустарын Федерациятын бэрэссэдээтэлэ Николай Дегтярев, министиэристибэлэр уонна биэдэмистибэлэр эппиэттээх үлэһиттэрэ Уус-Алдан улууһун баһылыга Алексей Федотовы, депутаттар улуустааҕы Сэбиэттэрин бэрэссэдээтэлэ Иван Колодезниковы, муниципальнай оройуон дьаһалтатын үлэһиттэрин, депутаттары, тэрилтэлэр салайааччыларын кытта көрүстүлэр.
Бэйэтин эҕэрдэ тылыгар Ил Түмэн бэрэссэдээтэлэ Александр Жирков Уһук Илин гражданнарга сир учаастактарын биэрии уратыларын уонна Саха Өрөспүүбүлүкэтигэр тыа хаһаайыстыбатын сайдыытын туһунан сокуон барылларыгар болҕомтону уурда, 2016 сыллааҕы өрөспүүбүлүкэ бюджетын туһунан кэпсээтэ.
Улуус баһылыга Алексей Федотов 2015 сыл түмүктэрин таһаарда уонна чугастааҕы кэмҥэ былааннары үллэһиннэ. Ааспыт сылга Аҕа дойду Улуу сэриитигэр Кыайыы 70 сылын чиэһигэр 70 үтүө дьыала оҥоһуллубут. Оройуон балыыһатын, Бээрийэҕэ ФАП саҥа дьиэлэрэ, Дүпсүҥҥэ уонна Суоттуга модульнай сыахтар үлэҕэ киирбиттэр. Найахыга бизнес-киин, Сыырдаахха саҥа оҕо саада үлэлээн эрэллэр, оттон Баатаҕайга «Арчы» култуура киинэ аһыллыбыт.
Уус-Алдан улууһун депутаттарын Сэбиэтин үлэтин туһунан Иван Колодезников сырдатта.
Кэккэ министиэристи­бэлэр уонна биэдэмистибэлэр салайааччылара тыл эппиттэрин кэннэ, мунньах түмүгүн таһаарарыгар, Ил Түмэн бэрэссэдээтэлэ Александр Жирков 2016 сылы Уус-Алдан оройуонугар В.В.Никифоров-Күлүмнүүр сылынан биллэрбиттэрин биһирээтэ уонна: «Өрөспүүбүлүкэ общественноһа бүтүн­нүүтэ Саха сирин уһулуч­чулаах общественнай уонна политическай деятелин, бастакы талыллыбыт салайааччы төрөөбүтэ 150 сылын бэлиэтииргэ бэлэмнэнэр. Саха губерниятын земскэй быраабатын бэрэссэдээтэлин быһыытынан, киниэхэ пааматынньык биһиги парламеммыт дьиэтин иннигэр туруоруллуоҕа. Василий Васильевич олохтоох салайыныы, норуот үөрэҕириитэ атаҕар туруутугар, экономика, литература уонна искусство сайдыытыгар улахан оруоллаах», – диэтэ.
СӨ Судаарыстыбаннай Мунньаҕын уонна «Уус-Алдан улууһа (оройуона)» МО икки ардыларыгар илии баттаммыт сөбүлэһиигэ олоҕуран салгыы таһаарыылаахтык үлэлииллэригэр эрэннэрэн туран, Александр Жирков Ил Түмэн үлэтин икки стратегическай хайысхатын – муниципальнай тэриллиилэри уонна федеральнай киини кытта үлэни бэлиэтээтэ: «Билигин судаарыстыба бюджетын сүрүн үбэ быһаччы оройуоннарга уонна нэһилиэктэргэ ыытыллар. Онон өрөспүүбүлүкэ парламена муниципальнай тэриллиилэри кытта өссө ыкса үлэлиэх тустаах. Тирэх, системалаах федеральнай сокуоннары оҥоруу кэмигэр федерация субъектарын санаатын уонна интэриэстэрин кэмигэр учуоттааһыҥҥа анаан РФ Федеральнай Мунньаҕын кытта күүскэ үлэлиирбит наадалаах».