Үлэ миэстэтин үөскэппит хампаанньаларга – сертификат

Санатан эттэххэ, Мииринэй куоракка «Саха Өрөспүүбүлүкэтин сиригэр-уотугар үлэлиир промышленнай тэрилтэлэргэ үлэһиттэри тардыы уонна сыһыарыы» диэн темаҕа Саха сирин парламенын көһө сылдьар истиилэрин сүбэлэригэр баар балаһыанньалары олоххо киллэрии туһунан 2016 с. тохсунньу 19 к. Мэҥэ-Хаҥалас улууһун Аллараа Бэстээх бөһүөлэгэр буолбут парламент көһө сылдьар мунньаҕар киин уонна өрүс уҥуор оройуоннар бэрэстэбиитэллэрин кытта дьүүллэспиттэрэ.
Саха сиригэр үлэ­һитинэн хааччыллыыны үрдэтии миэрэлэриттэн биирдэстэринэн Гаврил Харлампьев олохтоох үлэһиттэри тардааччыларга сертификаттары туттарыыны ааттаата. РФ-ҕа 2014-2018 сс. гражданнар үлэни булууларын үрдэтиигэ тэрээһиннэр былааннара бигэргэммитэ, ол быһыытынан Федерация субъектарыгар дойду атын регионнарыттан үрдүк квалификациялаах специалистары бастайааннай үлэҕэ тардыыга федеральнай үп ананар.
Бу программаны Саха сирэ бэйэтэ олоххо киллэриэҕэ. Өрөспүүбүлүкэҕэ атын регионнартан гражданнары тардар оннугар, олохтоох каадырдары үлэнэн хааччыйары ордордулар. Маннык быһаарыыны, дакылаатчыт эппитинэн, Чукотка эмиэ ылынна. «Бэйэ регионнарын иһигэр үлэтэ суох буолууга проблемалар баалларын, олору быһаарыы эрэйиллэрин биһиги дакаастаатыбыт. Саха Өрөспүүбүлүкэтигэр гражданнар үлэ булууларыгар программа оҥоһуллубута, ол быйылгыттан саҕалаан олоххо киирэр», — диэн кэпсээтэ Гаврил Харлампьев.
Кини этэринэн, программа чэрчитинэн үс туһаайыыга үлэ барыахтаах. Бастакытынан, гражданнар тыа сириттэн үлэ миэстэтэ ирдэнэр промышленнай оройуоннарга көһүүлэригэр. «Бу туһаайыыга сертификаттары оҥорор былааннаахпыт, олору улуустартан специалистары бастайааннай төрүккэ үлэҕэ тардар промышленнай хампаанньаларга биэриэхпит», – диэн иһитиннэрдэ кини.
Иккис туһаайыы өрөспүүбүлүкэҕэ вахта ньыматынан сезонунан үлэҕэ аҕалыллар оробуочайдары солбуйууну кытта сибээстээх. «Биллэн турар, онно дьон ахсаана улахана суох, ол да буоллар бу хайысхаҕа эмиэ олохтоох каадырдары тардыыга үлэлэһиэхпит», — диэтэ кини уонна программа үһүс туһаайыыта эдэр специалистар стажировкаларын кытта сибээстэнэрин эбэн эттэ, – өрөспүүбүлүкэ судаарыстыбаннай бюджетын суотугар эдэр специалиһы аҕалыыга тэрилтэ тырааныспарга ороскуоттарын, айан төлөбүрүн уонна бастакы кэмҥэ олорор ороскуоттарын бэйэбитигэр ылынабыт». Ону таһынан, эдэр специалистары үөрэтэр, сүбэ-ама биэрэр наставниктар институттарыгар харчы көрүллүөҕэ. «Ханнык баҕарар эдэр специалиһы бэлэмнээһиҥҥэ наставник баара эрэйиллэр. Ыччаты үөрэтиигэ маастардары сүрүн оҥорон таһаарыыттан аралдьытыыны тэрилтэлэр сөбүлээбэттэр, онон сибээстээн биһиги эдэр специалистары үөрэтии иһин эбии төлүүргэ этии оҥоробут», — диэн быһаарда кини.
Гаврил Харлампьев биир специалиска сертификат сыаната 200 тыһ. солк. чэрчитинэн буолуоҕун эттэ. «Бастакы уочаратынан чугас сытар улуустартан дьону тардыахпыт. Күн сарсын «Якутцемент» ААУо Производственнай холбоһук салалтатын кытта көрсөбүт», – диэн иһитиннэрдэ кини.
Онон 2015 сыл сэтинньи 23-24 күннэригэр Мииринэйгэ буолбут парламент көһө сылдьар истиилэрин сүбэлэрэ олоххо киириилэрэ саҕаланна.

Ил Түмэн пресс-сулууспатын, о.д.а. матырыйаалларынан Елена БАИШЕВА бэлэмнээтэ.