597
11 декабря 2017 в 13:28
Ленинграды көмүскээччилэргэ ытыктабыл бэлиэтэ
Ил Түмэн пресс-сулууспата иһитиннэрбитинэн, ахсынньы 6 күнүгэр Санкт-Петербурга Саха сирэ Россия судаарыстыбатын састаабыгар киирбитэ 385 сылыгар, Саха АССР тэриллибитэ 95 сылыгар уонна Саха Өрөспүүбүлүкэтин Төрүт Сокуонун 25 сылыгар анаммыт Саха Өрөспүүбүлүкэтин Күннэрэ аһылыннылар.
Саха сирин Күннэрин кыттыылаахтара Иккис аан дойду сэриитин сиэртибэлэрэ көмүллэн сытар аан дойдуга саамай улахан Пискаревскай кылабыыһаҕа Аҕа дойду Улуу сэриитин сылларыгар өлбүт дьоҥҥо ытыктабылларын биллэрдилэр.
“Мать-Родина” монумеҥҥа уонна Саха сириттэн буойуннар билиитэлэригэр веноктары, сибэккилэри ууруу сиэригэр-туомугар Саха Өрөспүүбүлүкэтин Ил Дархана Егор Борисов, Санкт-Петербург Бырабыыталыстыбатын чилиэнэ – Санкт-Петербуру тупсаран оҥорууга Кэмитиэт бэрэссэдээтэлэ Владимир Рублевскай, СӨ бастакы Президенэ, Судаарыстыбаннай сүбэһитэ Михаил Николаев, Ил Түмэн Бэрэссэдээтэлин бастакы солбуйааччыта Анатолий Добрянцев, парламент сис кэмитиэттэрин бэрэссэдээтэллэрэ Алексей Еремеев, Владимир Прокопьев, Елена Голомарева, норуот депутаттара Василий Власов, Александр Кошуков, Сергей Ларионов, СӨ Бырабыыталыстыбатын чилиэннэрэ, Санкт-Петербург Бырабыыталыстыбатын, Санкт-Петербурга саха диаспоратын бэрэстэбиитэллэрэ, о.д.а. кыттыыны ыллылар.
Кинилэр олохторун толук ууран Аҕа дойдуну көмүскээбит дьону биир мүнүүтэ саҥата суох туран кэриэстээтилэр.
Ил Дархан Егор Борисов уонна Санкт-Петербург Бырабыыталыстыбатын аатыттан Владимир Рублевскай “Мать-Родина” монумеҥҥа веноктары уурдулар.
Саха сирин Күннэрин кыттыылаахтара “Мать-Родина” монумеҥҥа уонна Ленинграды көмүскээбит биир дойдулаахтарын өйдөбүнньүк билиитэтигэр сибэккилэри уурдулар.
Өрөспүүбүлүкэ Баһылыга Егор Борисов Бочуоттаах ыалдьыттар Кинигэлэригэр маннык суругу хаалларда: “От имени благодарных якутян в память защитникам Ленинграда”.
Салгыы өрөспүүбүлүкэ делегацията Петропавловскай кириэппэскэ сырытта. Манна Ил Дархан Егор Борисов Саха сирэ Россия судаарыстыбатын састаабыгар киирбитэ 385 сылын чиэһигэр күн ортото Нарышкин бастионун истиэнэтин өттүттэн пушканан биир ытыыны оҥордо.
