Литература сылын аһыы туһунан

Мунньаҕы аһарыгар Саха сирин баһылыга общественность, чуолаан айар түмсүүлэр уота-күөһэ суох үлэлииллэрин туһунан эттэ.

«Сайын суруйааччылары кытта көрсөн, актыыбынайдык үлэлииллэригэр, общественнай дьыалаларынан дьарыктаналларыгар көрдөспүтүм. Чиэһинэйдик эттэхпинэ, чопчу хамсааһын суох. Бары тугу эрэ күүтэллэр. Олорон эрэ былаастартан күүттэххэ, бэйэ актыыбынаһын көрдөрбөтөххө, Литература сыла итинник ааһан хаалыаҕа. Социальнай сакаас баар, дьон аныгы кэм проблемаларын туһунан ааҕыахтарын баҕараллар. Литература – киһи уонна уопсастыба ис туругун, эйгэтин арыйар искусство көрүҥэ. Онон социальнай сакааһы толоруҥ. Итини мин эһиги эппиэтинэһи өйдүүргүт туһугар этэбин. Биһиги талааннары өйүөхпүтүн баҕарабыт уонна айар дьону хааччахтыыр санаабыт суох», – диэтэ кини.

Мунньах кэмигэр өрөспүүбүлүкэ баһылыга бүгүн аныгы саха литературатыгар баар проблемалары бэлиэтээтэ. Ити тылбаас проблемата, анал үөрэх, литературнай кириитикэ, суруйааччылары өйөөһүн механизма суохтарын, билигин таһаарыллар маассабай литература намыһах таһымын, үүнэр көлүөнэ ааҕыыга интэриэһэ сүтүүтүн уо.д.а. проблемалара. Ону сэргэ Егор Борисов бырабыыталыстыба чилиэннэригэр туһаайан, былааннаммыт тэрээһиннэри чуолкайдык толорорго сорудахтаата.

Литература сылын ыытыы өрөспүүбүлүкэтээҕи былааныгар 85 тэрээһин киллэриллибит: классиктар кинигэлэрин хаттаан таһаарыы, гонорар кээмэйин үрдэтии, куонкурустары ыытыы, суруйааччылар үбүлүөйдэрин, фестиваллары, поэзия күннэрин, быыстапкалары, экспедициялары тэрийии уо.д.а. Итиннэ өрөспүүбүлүкэ бюджетыттан 107 мөл. солк. көрүллүбүт.

Баһылык хамыыһыйа чилиэннэригэр тэрээһиннэр испииһэктэрин ситэрэргэ уонна эбии үбү буларга сорудахтаата. Кини литературнай порталы сайыннарыыга, литература учууталларын оруолун үрдэтиигэ болҕомтону уурарга көрдөстө. Егор Борисов литератураҕа олимпиадалары, бырааттыы өрөспүүбүлүкэлэргэ Саха сирин литературатын күннэрин, түөрт суруйааччы төрөөбүттэрэ 100 сылларын бэлиэтээһини ыытарга, ити тэрээһиннэргэ оскуолалары, библиотекалары, культура дьиэлэрин уонна сонуну тарҕатар ситимнэри маассабайдык кытыннарарга сорудахтаата.

Литература сылыгар, ыйыллыбыт тэрээһиннэри таһынан, литература кириитиктэрин, тылбаасчыттары бэлэмнээһиҥҥэ, кинигэлэри хаттаан таһаарыыга, тыбаастааһыҥҥа, эдэр ааптардары өйөөһүҥҥэ сүрүн болҕомто ууруллуоҕа.

Мунньахха народнай суруйааччылар Наталья Харлампьева, Иван Мигалкин уонна Николай Лугинов тыл эттилэр.

Литература сылын аһыы тохсунньу 28 күнүгэр былааннанар. Бу киэҥ хабааннаах, уопсастыба бары араҥатын түмэр литература биэчэрэ буолуоҕа.

Ангелина ВАСИЛЬЕВА, СИА.
Виктор ЭВЕРСТОВ түһэриитэ.