660
07 марта 2018 в 11:18
Максим Аммосов кыргыттарын туһунан кинигэ тахсыаҕа
Парламент пресс-сулууспата иһитиннэрбитинэн, Саха Өрөспүүбүлүкэтин Ил Түмэнин Бэрэссэдээтэлэ Александр Жирков Москваҕа Россия Федерациятын Президенин иһинэн Саха сирин Бастайааннай бэрэстэбиитэлистибэтигэр уһулуччулаах судаарыстыбаннай, политическай деятель Максим Кирович Аммосов уонна Раиса Израилевна Аммосова-Цугель төрөппүт кыргыттарын Яна Максимовна, Аэлита Максимовна уонна Лена Максимовна тустарынан кинигэни таһаарыы боппуруоһугар анаммыт мунньаҕы ыытта.
Мунньахха Лена Максимовна Аммосова кэргэнэ, профессор Владимир Гольдберг, Лена Максимовна уонна Владимир Михайлович уолаттара – Михаил Аммосов кэргэнэ Мария Аммосованы, Максим Аммосов кэргэнэ Ольга Аммосованы уонна кыыһа Елизаветаны кытта, СӨ Бастайааннай бэрэстэбиитэлистибэтин отделын сүбэһитэ Наталья Колодезникова, “Север” ХЭТ генеральнай директора Александр Шубин, “Нам улууһа” МО баһылыгын солбуйааччы Инна Сивцева, “Саха-Арт” Национальнай гуманитарнай култуура киинин директора Мария Космолинская, Москваҕа “Саха” НКИХ редактора Наталья Сазонова, Нам улууһун “Эҥсиэли” хаһыатын суруналыыһа Иннокентий Иванов кытыннылар.
Ил Түмэн спикерэ Александр Жирков Максим Кирович Аммосов кыргыттарыгар Яна Максимовнаҕа, Аэлита Максимовнаҕа уонна Лена Максимовнаҕа анаммыт хас биирдиилэрин туһунан толору өйдөбүлү ааҕааччыга биэрэр хаачыстыбалаах таһаарыыны бэлэмниир наадатыгар болҕомтону туһаайда. Онуоха анаан эбии матырыйаалы хомуйууга уонна бэлэмнээһиҥҥэ, ону тэҥэ бастакы илиинэн суруйууга киирбиккэ болҕомто ууруллуохтаах.
Максим Кирович Аммосов төрөөбүтэ 120 сылыгар анаммыт тэрээһиннэр былааннарыгар Лена Максимовна Аммосова “Свет души” диэн бэйэтин ахтыы-кинигэтин эбии ситэрэн, хаттаан таһаарыыны киллэрэр туһунан эппитин кэннэ кинигэни оҥоруу идеята балтараа сыллааҕыта үөскээбитин Инна Сивцева санатта.
Мунньах кыттыылаахтара кэнэҕэски кинигэ тутулун уонна ис хоһоонун ырытан көрдүлэр, Аммосовтар дьиэ кэргэннэрин олоҕун туһунан ахтыылары уонна чахчылары үллэстээччи дьону тардыыга салгыы үлэни ыытар туһунан дьүүллэстилэр.
Александр Жирков Москваҕа уонна Саха сиригэр кинигэни хомуйан таһаарааччылар бөлөхтөрүн, ону сэргэ кинигэ тексин кытта үлэлииргэ редактордар бөлөхтөрүн тэрийэргэ этии оҥордо.
“Нам улууһа” муниципальнай оройуон баһылыгын солбуйааччы Инна Сивцева “Нам улууһугар М.К.Аммосов сылын ыытыыга кылаатын иһин” өйдөбүнньүк сувениры Владимир Гольдберга итиэннэ Максим Аммосов үбүлүөйүн көрсө тахсыбыт кинигэлэри Лена Максимовна кэргэнигэр, уолаттарыгар, Саха сирин Бастайааннай бэрэстэбиитэлистибэтин музейыгар бэлэхтээтэ.
Номоххо киирбит Максим Кирович Аммосов кыргыттарыгар аналлаах кинигэ быйыл күһүн тахсыаҕа.
