«Мин сокуону көҕүлээһиним»

Куонкурус түмүктэрин таһаарыыга Ил Түмэн сис кэмитиэтин бэрэссэдээтэлэ А.А. Григорьева, мандаат уонна регламент хамыыһыйатын бэрэссэдээтэлэ М.С. Филиппова, Ил Түмэн аналитическай управлениетын начальнига – аппараат салайааччытан солбуйааччы А.И. Антонен, куонкурус финалистара, кинилэр учууталлара, преподавателлэрэ кытыннылар.
Куонкурус түмүктүүр түһүмэҕэр эрдэттэн талыллыбыт 25 кыттааччы киирбитэ.
Манна ордук көхтөөхтүк оскуола оҕолоро кытыннылар. Үлэлэрин темалара олох араас эйгэтин таарыйаллар – Арктика уонна Хоту сир проблемалара, промышленнай политика, тулаайах оҕолору өйөөһүн уо.д.а.
Жюри саастарынан икки категорияҕа арааран кыайыылаахтары быһаарда: бастакыга Петров Айсен Андреевич «Уопсастыбаҕа коррупцияны утары эйгэни үөскэтии» үлэтинэн, Северьянов Георгий Васильевич «Российскай Федерацияҕа үөрэхтээһин туһунан» Федеральнай сокуоҥҥа уларытыылары киллэрии туһунан», Тастыгин Герман Петрович «Арктика усулуобуйаларыгар олорор дьиэ субсидияларын уратылара» үлэлэринэн.
Аҕа саастаах бөлөххө кыайыылаахтарынан буоллулар: Эляков Александр Львович «Арктикаҕа научнай чинчийиилэр» үлэтинэн, Новикова Диана Иосифовна «Саха Өрөспүүбүлүкэтигэр «сэрии оҕолорун» социальнай өйөбүлүн туһунан» бырайыагынан, Эверстов Артем Николаевич «Арктикаҕа балыктааһын правовой өрүттэрэ» үлэтинэн.
Куонкурус чэрчитинэн социальнай бырайыактар көрүллүбүттэрэ уонна олоххо киириэхтэрин сөп. Ол «Табахтыыр кабинкалары туһанан Дьокуускай куорат сирдээҕи-салгыннааҕы эйгэтин харыстааһын» диэн Кузьмин Василий Андреевич, Васильев Николай Николаевич уонна Куприянов Кристиан Евгеньевич «Тулууровцы» бырайыактара.
Уопсай түмүгүнэн кыайыылааҕынан Эляков Александр Львович ааттанна. Чуолаан кини Бүтүн Россиятааҕы «Мин сокуону көҕүлээһиним» куонкуруска кыттыаҕа.

Ыччат парламенын пресс-сулууспата.