Оҕолор доруобуйаларыгар куттал тириэ суохтаах

Ил Түмэн наукаҕа, үөрэххэ, култуураҕа,сонуну тарҕатар сириэстибэлэргэ уонна общественнай тэриллиилэргэ кэмитиэтин бэрэссэдээтэлэ Антонина Григорьева салайыылаах бөлөх Дьокуускай куорат 5№, 9№, 24№-дээх орто оскуолаларыгар, Жатай муниципальнай тэриллии 1№, 2№-дээх оскуолаларыгар сылдьан, тэрилтэлэр үөрэнээччилэри көрсөргө бэлэмнэрин көрдүлэр-иһиттилэр. Инициативнай бөлөх үөрэх дьылыгар бэлэмнэнии үлэтин хас да көрүҥүнэн сыаналаата. Холобур, оскуола таһынааҕы суол-иис туругун, спортивнай былаһаакка оҕо дьарыктанарыгар төһө тупсаҕайын, үөрэх кыһатын таһыгар массыына турар сир тэриллибитин, оскуола тиэргэнэ бөҕө-саҕа суоҕун уонна да атыны көрдүлэр.
Антонина Григорьева сылдьыбыт куорат оскуолаларын туругун бэлэминэн сыаналаата. “Ол гынан баран, Дзержинскэй аатынан уулуссаҕа турар 9№-дээх оскуола тиэргэнигэр биир эрэ массыына турар парковка миэстэлээх. Үлэһиттэр да, оҕолорун аҕала, көрсө кэлбит төрөппүттэр да, массыыналарын тохтото түһэр сирдэрэ суох. Билэргит курдук, бу оскуола таһынааҕы уулусса олус сырыылаах. Онон парковка сирин тэрийэллэрин ирдиир этии киллэриэхпит”, — диэтэ.

Жатай оскуолалара үөрэх дьылыгар бэлэмэ суохтарын бары бэлиэтээбиттэр. “Спортивнай былаһааккаларын туруга мөлтөх, оскуола таһынааҕы суол туһунан этэ да барыллыбат. Биһигини кытары Суолга куттала суох буолуу судаарыстыбаннай инспекция үлэһиттэрэ сырыттылар уонна суол-иис балаһыанньатын, суол бэлиэлэрин көрдүлэр”, — диэн депутат бэлиэтээтэ.
Ол курдук, Ил Түмэн, Дьокуускай куорат думатын депутаттарыттан турар оскуолалар үөрэх дьылыгар бэлэмнэрин бэрэбиэркэлиир инициативнай бөлөх салгыы куорат уонна куорат таһынааҕы оскуолалары бэрэбиэркэлиир былааннаах.
Антонина Григорьева улуус депутаттара эмиэ инициативнай бөлөх тэрийэн, олохтоох оскуолалары бэрэбиэркэлииллэригэр этии киллэрбиттэрин туһунан иһитиннэрдэ. “Бэлиэтэммит итэҕэстэри туоратыыга дьаһал ылыахпыт”, — диэн эттэ кини.