714
22 января 2016 в 15:43
Үөһээ таҥара дьаһайар, аллараа сокуон салайар
Судаарыстыба сайдыытыгар, холобурга, экэниэмикэ, оҥорон таһаарыы инники күөҥҥэ турар дуу эбэтэр наука, үөрэх, култуура ордук улахан суолталаахтар дуу диэн ыйытыыны туруордахха, ол акаарыттан атыннык сыаналаныа суоҕа. Тоҕо? Эппиэти биэрээччи чыпчырынан баран, оройун тоҥсунуоҕа, сапсыйан кэбиһиэҕэ: «Экэниэмикэ диэн экэниэмикэ буоллаҕа! Култуураҥ ханна турарый!?»
Бииргэ биири эптэххэ икки буоларын кэриэтэ, туох барыта бэйэ-бэйэтиттэн ситимнээҕэ, биирэ быһыннаҕына атына кыайан силигилээбэтэ биллэр суол. Науката уонна үөрэҕэ суох экэниэмикэ сайдыылаах буолуон табыллыбат, оттон норуот үлэтэ-хамнаһа намыһах таһымнаах култууралаах буоллаҕына, кини тоҕор көлөһүнүн баара-суоҕа кулут кыһалаҥ сыратыгар тэҥниэххэ сөп буолуо.
Дойдубут экэниэмикэтэ чаастатык «доҕолоҥнуур» биир төрүөтэ, арааһа, култуураны үрдүк таһымҥа таһаара иликпитигэр, өссө оннук соругу туруоруна да сатаабаппытыгар сытар буолуон сөп. Култуура – киэҥ киэлилээх өйдөбүл. Сайдыы ол элбэх култуура төһө үрдүк таһымҥа туралларынан кэмнэнэр. Холобурга, үлэ култуурата диэн үрдүк өйдөбүл уонна олоҕурбут үгэс өйгө-санааҕа, эккэ-хааҥҥа иҥэн, көлүөнэттэн көлүөнэҕэ тиһигин быспакка бэриллэн испэтэхтэринэ, биирдиилээн киһи да, бүтүн судаарыстыба да кыайан чэчириир кыахтара суох. Үлэ көҥүл, үрдүк үөрүүлээх уонна култууралаах буолуохтааҕа – киһи аймах ыра гынан кэлбит биир баҕа санаата.
Ити барыта бэркэ биллэр суол. Сэбиэскэй систиэмэ да саҕана, билигин даҕаны биһиэхэ сүрүннээн судаарыстыба үбүлээһинигэр «тобох бириинсип» бигэ үгэһэ халбаҥнаабаттык үлэлиир. Ол бириинсип чуолаан ханнык салаалары таарыйарын эридьиэстии барымыаҕыҥ. Маннык дьаһаныы үксүгэр улахан кыһалҕаттан, үпкэ-харчыга кыпчыттарыыттан, ардыгар олоҕуран кэлбит үөрүйэҕинэн «саба тарыйан» кэбиһии үгэһиттэн буолара биллэр.
Ил Түмэн наукаҕа, үөрэххэ, култуураҕа, маассабай информация тиһиктэригэр уонна уопсастыбаннай тэрилтэлэр дьыалаларыгар сис кэмитиэтин биир сүрүн соруга судаарыстыба бюджетын үбүлээһиниттэн «кытаахтаһан» хаалыы буолара үчүгэйдик өйдөнөр. Биллэн турар, парламент бары кэмитиэттэрэ итинтэн туора туран хаалбат улуу дьыалалара буоллаҕа. Ол эрээри чуолаан бу ааттанар сис кэмитиэт (кини чилиэттэрэ), бу боппуруоска, бука, өлөллөрүнэн мөхсөн эрдэхтэрэ диэн сабаҕалыы саныахха сөп.
— Ааспыт 2015 сылы, Ил Түмэн бүттүүнэ курдук, биһиги кэмитиэппит үлэ үөһүгэр сылдьан аһарда, — диэн кэпсиир сис кэмитиэт бэрэссэдээтэлэ Антонина Григорьева. – Кэмитиэт ырытан оҥорбут 13 барылыттан 12-тэ сокуон быһыытынан ылыллыбыта, биир барыл кыайан ааспатаҕа. Кэмитиэт бэлэмнээбит 26 уурааҕын Ил Түмэн бигэргэппитэ. Отчуоттанар кэмҥэ 9 мунньах, 11 «төгүрүк остуол» тэриллибитэ. 3 бырабыыталыстыба чааһа, 2 парламент истиитэ, сокуон барылларын бэлэмнээһиҥҥэ оробуочай бөлөхтөр 19 мунньахтара ыытыллыбыттара.
Сырдатар, хааччыйар аналын сүтэрбэт
— Ол кыайан ааспатах сокуон барылын туһунан тугу этиэ этигиний?
— Кимиэхэ эрэ, баҕар, боппуруос улахан суолтата суох курдук көстүөҕэ гынан баран, дьыала оннук боростуой буолбатах. Дьон кинигэни, сурунаалы, хаһыаты аахпат буолла, бибилэтиэкэ суолтата түстэ диир тыл-өс баар буолан баран, атын хартыына көстөн тахсарын эмиэ бэлиэтиир наадалаах. Дьиҥнээҕинэн, билиҥҥи уустук кэмҥэ бибилэтиэкэ тыа сиригэр сырдатар уонна хааччыйар оруола өссө хаһааҥҥытааҕар да үрдээбит курдук көстөр. Нэһилиэнньэ сүрүн араҥатын үбэ-харчыта кырыымчыгынан, сурутуу сыаната үрдүүрүнэн, били муҥнаах булугас дииллэринии, дьон хаһыаты, сурунаалы бибилэтиэкэҕэ кэлэн ааҕар буолла. Аны туран, тыа сиригэр кинигэ атыыта тэриллибэт, ити тиһик үлэлээбэт буолбута быданнаата. Тыа сирин үгүс нэһилиэктэригэр Интэриниэт баҕа хоту түргэн хаачыстыбалаах буолбатах. Билигин даҕаны бу технологиянан наадатын туһаммат киһи ахсаана, ордук тыа сиригэр, аҕыйаҕа суох буолуохтаах.
Аҕыйах сыыппараны аҕалыым, өрөспүүбүлүкэҕэ 485 судаарыстыбаннай уонна муниципальнай суолталаах бибилэтиэкэ баар. Баларга сылга 461,7 тыһ. ааҕааччы сылдьыбыт эбэтэр нэһилиэнньэ бибилэтиэкэ өҥөтүнэн хабыллыыта 48,3 бырыһыаҥҥа тэҥнэспит. Аны туран, бибилэтиэкэ өҥөтүгэр наадыйааччы ахсаана көҕүһүөхтээҕэр эбиллэн иһэр.
Норуот дьокутааттара Е.Михайлова, Г.Бейсембаева, А.Григорьева, М.Филиппова, П.Аммосов, С.Иванов уонна А.Уаров көҕүлээһиннэринэн, «СӨ тыа сиринээҕи поселениеларыгар олохтоох суолталаах боппуруостары сыһыарыы туһунан» СӨ сокуонун 1 ыстатыйатыгар уларытыыны киллэрии туһунан» сокуон барыла ырытан оҥоһуллубута. Муниципальнай бибилэтиэкэлэр периодическай бэчээтинэн, сурунаалларынан, уус-уран кинигэлэринэн хааччыллыыларыгар бюджеттан үбүлэниилэрин дьыалата муниципалитеттар дьаһалларыгар бэриллэр. Ол курдук, биир бибилэтиэкэҕэ кинигэ фондатын толорунууга сылга ортотунан 44,8 тыһ. солк., периодическай бэчээти сурутууга 38,9 тыһ. солк. харчы көрүллэр. Урут маннык үбүлээһин улуустардааҕы кииннэммит бибилэтиэкэлэр систиэмэлэрин нөҥүө оҥоһуллар этэ.
Барылара диэбэппин, сорох баһылыктар бу этиллэр үбү атын суолга туттан кэбиһэр чахчылара баар. Үбүлээһин уруккулуу, кииннэммит улуустардааҕы бибилэтиэкэлэргэ көрүллэн, олорго кииннэнэн ыытыллара сөрү-сөптөөх этэ. Бибилэтиэкэлэри үбүлээһиҥҥэ өрөспүүбүлүкэтээҕи бигэргэммит нормативынан сылга 104,6 мөл. солк көрүллэр. Бу харчы бүүс-бүтүннүүтэ аадырыһыгар тиийэр. Ол гынан баран, дьиҥнээх дьыалатыгар бигэргэммит норматив туолуута ааспыт сылга 40,3 бырыһыаҥҥа эрэ тэҥнэһэр. Түмүгэр «Суол картатын» көрдөрүүлэрэ атахтаналлар, көмпүүтэрдээһин дьыалата бытаарар.
Бу итэҕэс биир сүрүн төрүөтүнэн, ити инники этиллибитин курдук, муниципальнай тэриллиилэр сорох баһылыктара көрүллүбүт үбү атын сыалга туттан кэбиһиилэрэ буолар. Боростуойдук да ылан көрдөххө, бу этиллэр боппуруоска хас биирдии нэһилиэк бэйэтэ дьаһана сатыыра ордук-хоһу түбүк уонна үп ороскуота буоларын бэлиэтиэххэ сөп. Сокуон барылын хаттаан оҥорон, ыам ыйыгар парламент көрүүтүгэр киллэриэхпит.
Уустуктар тустарынан
— Антонина Афанасьевна, ити кэпсээҥҥиттэн сиэттэрэн, нөҥүөһүлээн ыйытар буоллахха, бибилэтиэкэлэр, чуолаан тыа сирин бибилэтиэкэлэрин кэскиллэрэ оннук сырдык буолан тахсар дуо?
— Чэ, сырдыгын омнуолуу саныыр буоллаххына, муҥ саатар бибилэтиэкэлэр инникилэрэ хараҥа буолбатах диэн экчи эрэллээхтик этэр кыахтаахпын. РФ Култууратын министиэристибэтэ «Уопсай туһаныллар бибилэтиэкэ модельнай ыстандаартын» ырытан оҥорбута. Аныгылыы электроннай бибилэтиэкэлэр баар буолуохтара. Ньурба улууһун 19 нэһилиэгин бибилэтиэкэлэрэ бу сылга электроннай төрүккэ киирэргэ бэлэмнэнэллэр. Өрөспүүбүлүкэҕэ 100-тэн тахса модельнай бибилэтиэкэ үлэлиир. Өрөспүүбүлүкэбитигэр Национальнай электроннай бибилэтиэкэ систиэмэтэ тиргиччи үлэлээтэҕинэ, наадыйааччынан уонна туһанар баҕалаах дьонунан тутайыа дии санаабаппын. Хата, үбүлэниитин боппуруоһа эмиэ кииннэммит төрүккэ олоҕуран ыытыллара буоллар диэн баҕалаахпын.
Хаһан биһиэхэ проблема суох этэй, баара, баар буола да туруоҕа. 2015 сыл тохсунньу 1 күнүнээҕи туругунан, өрөспүүбүлүкэ муниципальнай бибилэтиэкэлэригэр 1625 киһи үлэлиир. Мантан 439 киһи (39,7%) библиотечнай үрдүк үөрэхтээх, 175 үлэһит (15,8%) орто анал үөрэхтээх. Култуура тэрилтэлэрин оптимизациялааһын сыалынан, ити иннинээҕи сылтан 19 үлэһит сарбыллыбыта. Сорох хотугу улуустар, бэл Нерюнгри уонна Жатай бибилэтиэкэлэрэ анал үрдүк үөрэхтээх испэсэлиистэрэ суохтар. Бүгүн өрөспүүбүлүкэ бибилэтиэкэлэригэр 30-гар диэри саастаах испэсэлиис ахсаана 15% тэҥнэһэр. Орто хамнас — 34,8 тыһ. солк., саамай намыһах хамнас кииннэммит систиэмэҕэ киирбэтэх муниципальнай бибилэтиэкэлэргэ баар.
Улуустардааҕы уонна нэһилиэктэрдээҕи бибилэтиэкэлэр үксүлэрэ санньытаарынай-тэхиниичэскэй ирдэбиллэргэ уонна нуормаларга, үлэ харыстабылын быраабылаларыгар кыайан эппиэттээбэт дьиэлэргэ-уоттарга үлэлии олороллор. Тыа сирин бибилэтиэкэлэрин дьиэлэрэ фондалары харайыы ирдэбиллэригэр, ааҕааччылары хааччыйыы усулуобуйаларыгар кыайан эппиэттээбэттэр. Мара тас көстүүлээх, дьадаҥы ис барааннаах эргэ дьиэлэр дьону бэйэлэригэр угуйар, тардар кыахтара кыра. Хаарбах, саахалланар туруктаах дьиэлээх-уоттаах 10 муниципальнай бибилэтиэкэ баар.
Тирээс түһэрэ наадыйыы аҕыйыырын туоһута буолбатах
— Литэрэтиирэ сылын хайдах түмүктээтибит?
— Үлэ барда диэн сыаналыыбын. Бырабыыталыстыба таһымыгар эдэр суруйааччылары өйөөһүҥҥэ, саха литэрэтиирэтин кылаассыктарын айымньыларын салгыы бэчээттээһиҥҥэ туһуламмыт уураахтар ылылыннылар. Туһааннаах наадаларыгар, айар хомондьуруопкаларга сылдьалларыгар анаан, икки сойууска икки УАЗ автомассыына бэрилиннэ. Икки сойуус үлэтин-хамнаһын сүрүннүөхтээх, айар үлэни көҕүлүөхтээх уонна үбүлүөхтээх саҥа ассоциацияҕа 73 мөл. солк. көрүллүбүтэ. Бу урукку өттүгэр хаһан да көрүллэ илик харчы. Ассоциация ыытар үлэтэ аһаҕас, үп туһаныллыыта адьас дьэҥкир буолуохтаах.
— Салайар кэмитиэтиҥ кэмпитиэнсийэтигэр киирэрин быһыытынан уонна бэйэм даҕаны бэчээккэ сыһыаннаахпынан, бу эйгэ дьыалата хайдах туруктааҕый?
— 2016 сылга «Бэчээт уонна полиграфия сайдыытыгар» бюджекка 426407 тыһ. солк. харчы көрүлүннэ. Ити иннинээҕи сылтан бу 7%-нан үрдүк. Тоҕо? Бэчээт дьыалатыгар сыһыаннаах өҥөлөр сыаналара үрдүүр, сурутуу ахсаана түһэр. Ааспыт сылга 65133 сурутааччы баар буоллаҕына, бу сылга ити ахсаан 42 тыһ. 71 киһиэхэ тэҥнэспит. Кумааҕы бородууксуйаҕа наадыйыы түһүүтэ-тахсыыта бэйэтэ тус уратылардаах. Ол да үрдүнэн, адьас суох буолан эбэтэр олох түһэн хаалыа диэн этэргэ ханнык да төрүөт суох. Аан дойду быраактыкатыгар Интэриниэт кумааҕы бородууксуйаны эһэн, суох оҥорон кэбиспит чахчыта суох. Өрөспүүбүлүкэбитигэр сурутуу түһэр түбэлтэтин сүрүн биричиинэтэ – тыа сирэ харчынан дохуота кырата уонна почта оҥорор өҥөтө сыылбата.
— Билигин дойдуга уопсастыбаннай хамсааһын, уопсастыбаннай дьыала өрө тутуллар кэмигэр олорор курдукпут. Онон сылыктаатахха, биһиэхэ даҕаны үлэ оргуйан олорор буолуохтаах.
— Салайар кэмитиэтим чилиэннэрэ П.Аммосов, Г.Бейсембаева, А.Филиппов, Е.Михайлова, И.Шамаев, Е.Жирков ааспыт сыл устата сэрии уонна тыыл бэтэрээннэрин кытта көрсүһүүлэри ыытыыга, кинилэр туруорсар боппуруостарыгар көмөлөһүүгэ көхтөөхтүк үлэлээтилэр. Өрөспүүбүлүкэҕэ 2020 эрэгистирээссийэлэммит уопсастыбаннай тэрилтэ, түмсүү баар. Олортон саамай элбэх чилиэннээҕинэн (230 тыһ. тахса киһилээх) уонна бастыҥ үлэлээҕинэн Сэрии уонна тыыл бэтэрээннэрин сэбиэтэ буолар. Үөрэх үлэһиттэрин рескомун профсойууһа (бэрэсс. Я.С.Щепанская), доруобуйа харыстабылын профсойууһа (Л.П.Корнилова), ХИФУ тирэх сойууһа (А.Сусоев), «Арассыыйа ийэлэрэ» түмсүү (П.П.Борисова) үчүгэй үлэлээхтэринэн өрөспүүбүлүкэҕэ киэҥник биллэллэр. Кулун тутар 17-18 күннэригэр Саха сирин дьахталларын ХIV сийиэһэ ыытыллыаҕа. Бэлэмнэнии бара турар.
Түбүктэр. Түмүктэр. Былааннар
— Антонина Афанасьевна, ити сүрүннээн салайар кэмитиэккэр сыһыаннаах үлэҥ-хамнаһыҥ буоллаҕа. Оттон сирэй дьокутаат, Ньурба быыбардааччыларын итэҕэллэрин сүгэ сылдьар киһи буоларгынан, туох кэпсээннээххиний?
— Сокуон үлэтэ аһара бириинчик уонна ол курдук олус уустук. Ааспыт сылга улууһум бары 19 нэһилиэктэригэр сырыттым, бу сылга ол үлэбин эмиэ салҕыам. Дьон этиитин, туруорсуутун истибэккэ, дьону кытта санааны үллэстибэккэ дьокутаат быһыытынан үлэлиир кыаҕыҥ суох. Кыайыы сылыгар норуот дьокутааттара В.Прокопьев, И.Васильев, Ю.Григорьев уонна мин буоламмыт Ньурба улууһун дэлэгээссийэлэрин дьонун киин куоракка сынньатыыга, доруобуйаларын бэрэбиэркэлэтиигэ уонна эмтэтиигэ үлэлэстибит. Куоракка ыһыллыбыт ыһыахха 7 тыһ. киһи сылдьыбыта.
Ньурба бастыҥ дьонун үйэтитии үлэтигэр кытынным. Фронтовик, Ньурба бөһүөлэгин олохтооҕо, Сэбиэскэй Сойуус дьоруойа Н.П.Кудряшов пааматынньыга бэлэм буолла. Эмиэ фронтовик буойун, аатырбыт педагог, Ньурба 1№-дээх оскуолатын дириэктэрэ А.Н.Чусовскойга аналлаах кинигэ бэчээттэннэ. Ньурба тэхиниичэскэй оскуолатын кэлэктиибин тэрийиитинэн, киниэхэ аналлаах сквер аһылынна уонна улуус ыччата үөрэҕириитигэр уһулуччу үтүөлээх киһи пааматынньыга туруорулунна. Сэрии иннинэ уонна сэрии сылларыгар Хорула нэһилиэгин холкуоһугар Дьуона Ньукулаайабыс Отчуутап бэрэссэдээтэллээбит. Кини салайар холкуоһа бурдугу үүннэриигэ уһулуччу үчүгэй көрдөрүүлэнэн, НХБСБ-гар кыттан иккис истиэпэннээх дьупулуомунан наҕараадаламмыт. Дьуона Отчуутап салайбыт холкуоһугар сэрии сылларыгар биир да хоргуйан өлүү түбэлтэтэ тахсыбатах. Оттон ыаллыы холкуоһугар уонна оройуон атын холкуостарыгар өлүү-сүтүү олус элбэх эбит. Сэрии сылларыгар Хорула оройуоҥҥа саамай элбэх түүлээҕи туттарбыт уонна оборуона фондатыгар харчыны укпут нэһилиэк буолар. Хорула нэһилиэгин оччотооҕу холкуостаахтарыгар анаммыт аллея, кинилэр хас биирдиилэрин ааттара-суоллара суруллубут истиэндэлэрэ баар буолла уонна И.Н.Отчутов бүүһэ туруорулунна.
Ньурба куоракка быйыл психическэй ыарыыны эмтиир аналлаах балыыһа аһыллыаҕа. Эмиэ бу сылга 140 миэстэлээх оҕо саада үлэҕэ киириэҕэ. Биллэрин курдук, Ньурба уруккута геологтар бөһүөлэктэрэ. Саха сирин алмааһын арыйбыт улахан ааттаах-суоллаах да, сүүһүнэн ахсааннаах эрэдьэбиэй да геологтар хас эмэ уонунан сылларга Ньурбаҕа олорон, үлэлээн ааспыттара. Ону санатар уонна өйдөтөр Геологтар сквердэрин тутуутугар, бырабыыталыстыба бэрэссэдээтэлэ Г.И.Данчикова өйөөһүнүнэн, «Алроса» АК 3 мөл. солк. харчыны көрбүтэ. Куорат улахан оройуонугар Убайааҥҥа тыыппалаах тутуу барбатаҕа быданнаата. Таас оскуоланы тутуу былааҥҥа киирдэ, Ил Дархан ону өйөөтө. Ньурбатааҕы көтөр баабырыкатын сайдыытыгар бюджеттан 36 мөл. солк. көрүлүннэ. Бу предприятие көдьүүһүн үрдэтиигэ чахчы үчүгэй өйөбүл буолар. 2016 сылга улууска анал граннарынан хотоннор, оҕуруот аһын харайар эбийиэктэр тутуулара ыытыллыаҕа.
Уус-Алдан Тулунатыгар оҕо саадын таас дьиэтин тутуу үлэтэ былааҥҥа киирэрин ситиһэр инниттэн, кэмитиэт көһө сылдьар мунньаҕын ыыппыппыт. Сыалбытын ситиспиппит, субу соторутааҕыта ол олус наадалаах дьиэ үлэҕэ киирдэ. Манна даҕатан эттэххэ, 2015 сыл оскуола иннинээҕи үөрэхтээһин сыла этэ. Кыра саастаах оҕолору анал дьиэнэн-уотунан хааччыйыы проблемата син-биир сытыытык турар. Олохтоммут нуорманан, биир бөлөххө 20 оҕо сылдьыахтаах. Биһиэхэ, чуолаан киин куораппыт кыра оҕолорун бөлөхтөрүгэр ити көрдөрүү 40-45 оҕоҕо тиийэр. Өрөспүүбүлүкэҕэ 30 тыһ. кырачаан оҕо саадынан хабылла илик.
А.Саввинов-Алгыстаах Өлөксөөн туруорсуутунан, саха омук Ытык ааттарын итирдэр утахтарга иҥэрии омсолоох үгэһэ тохтотулунна уонна урут таһаарыллыбыт алҕастар туоратылыннылар.
Дьокутаат Евгения Михайлова көҕүлээһининэн «Норуот дьокутаатын төттөрү ыҥырыы туһунан» сокуон барылын оҥоро сылдьабыт. Быйыл өрөспүүбүлүкэбитигэр Арассыыйа Наукатын акадьыамыйатын эспэдьииссийэтэ үлэтин саҕалыаҕа. Арассыыйаҕа наука туһунан сокуон ылыллыахтаах. Бэйэбитигэр 90-с сылларга ылыллыбыт сокуон үлэлиир, бу сылга ол сокуоҥҥа уларытыылары киллэриэхпитин наада. Быйыл Киинэ сыла биллэрилиннэ. Биһиэхэ национальнай киинэни сайыннарыы боппуруоһа туруохтаах, онуоха чуолкай кэнсиэпсийэ ырытан оҥоһуллуохтаах. Биһиги кэмитиэппит бу боппуруоска үлэлэһэргэ былааннанар, бастаан «төгүрүк остуол» тэрийиэхпит.
Билиҥҥи кэмҥэ дойдуга олохпут хаачыстыбата дьиэнэн-уотунан, эньиэргийэнэн, уунан, сылааһынан, суолунан-ииһинэн хааччыллыы туругунан, үөрэх, доруобуйа харыстабылын систиэмэлэрин сайдыыларынан, наука ситиһиилэринэн, бастыҥ технологиялары олохтооһунунан сыаналанар буолла. Маныаха Тюмень уобалаһа инники сылдьар, кини кэнниттэн Москва, Петербург уонна Краснодар кэлэллэр. Сибииргэ Красноярскай кыраай инникилээн иһэр, биһиги өрөспүүбүлүкэбит ортоку миэстэҕэ сылдьар. Бу куһаҕана суох көрдөрүү. Ол үрдүнэн өссө тэптэн, баһырхай соруктары туруорунан үлэлиэхпитин наада. Оттон ол сырабыт хардата барыта бэйэбит туспутугар, туһабытыгар буолуоҕа.
Прокопий ИВАНОВ суруйда.