Ольга Балабкина: «Олохтоох бэчээт нэһилиэнньэҕэ саамай чугас»

Ил Түмэн пресс-сулууспата иһитиннэрбитинэн, СӨ Ил Дарханын уонна Бырабыыталыстыбатын Администрациятын салайааччыта Юрий Куприянов, Ил Түмэн Бэрэссэдээтэлин солбуйааччыта Ольга Балабкина, Бырабыыталыстыба Бэрэссэдээтэлин солбуйааччыта Александр Соловьев ыҥырыллыбыт дьону Россия бэчээтин күнүнэн эҕэрдэлээтилэр.

Бэчээт уонна телевидениенэн, араадьыйанан биэрии дьыалаларыгар Департамент салайааччытын эбээһинэһин толорооччу Николай Молчанов Саха сиригэр сонуну тарҕатар ситимнэр сайдыыларын туһунан сүрүн дакылааты оҥордо. Россияҕа сонуну тарҕатар 25 000 ахсааннаах араас тэрилтэттэн 371 Саха сиригэр регистрацияламмыт.

СӨ Ил Дарханын уонна Бырабыыталыстыбатын Администрациятын салайааччыта Юрий Куприянов уонна Бырабыыталыстыба Бэрэссэдээтэлин солбуйааччыта Александр Соловьев эҕэрдэ тыл этэн баран, суруналыыстыка сайдыытыгар кылааттарын, бэчээт дьыалаларыгар үтүөлэрин-өҥөлөрүн уонна үгүс сыллаах үлэлэрин иһин суруналыыстарга уонна бэчээт үлэһиттэригэр наҕараадалары туттардылар.

Суруналыыстыка салаатыгар 2014 сыллааҕы Судаарыстыбаннай бириэмийэ, лауреат аатын иҥэрэн туран, СӨ Арктика сылыгар уонна Аҕа дойду Улуу сэриитин сылларыгар Саха сирин дьонун бойобуой хорсун быһыытыгар анаммыт таһаарыыларын иһин, Россия суруналыыстыкатын бэтэрээнигэр Семен Гороховка туттарылынна.

СӨ Суруналыыстарын сойууһун чилиэнэ Пантелеймон Дарбасов үүнэр көлүөнэни сиэр-майгы өттүнэн уонна патриотическай иитиигэ туһуламмыт кэпсээннэрин иһин, ааспыт сыл түмүгүнэн Николай Мординов – Амма Аччыгыйа аатынан СӨ Ил Дарханын бириэмийэтин ылла.

Ил Түмэн Бэрэссэдээтэлин солбуйааччыта Ольга Балабкина эҕэрдэ тылыгар нэһилиэнньэҕэ саамай чугас оройуон, куорат хаһыаттарыгар болҕомтону тарта: «Бүгүҥҥү күҥҥэ кинилэр инники кирбиигэ бааллар, ол эбэтэр гражданнарга саамай чугас буолаллар. Бэчээт олохтоох уорганнара сытыы боппуруостары көтөҕөллөр, өрөспүүбүлүкэ олохтоохторо көрсөр араас кыһалҕаларын тыктаран көрдөрөн, ону быһаарарга көмөлөһөллөр. Саамай кылаабынайа – нэһилиэнньэ ирдэбилигэр мэлдьи сөп түбэһиэхтээхтэр».

Салгыы Ольга Валерьевна Кэбээйи, Үөһээ Бүлүү, Орто Халыма уонна Усуйаана улуустарын олохтоох хаһыаттара Аҕа дойду Улуу сэриитин ыарахан сылларыгар төрүттэммиттэрин санатта. «Өссө ол быдан дьыллартан биһиги норуоппут бэчээт тылын сыаналыыр уонна эрэнэр. Олохтоох хаһыаттарга ааҕааччылар итэҕэллэрин салгыы да түһэн биэрбэттэригэр баҕарабын. Инники кирбиигэ сэриилэһэр буойуннартан «Кыым» хаһыат аадырыһыгар 1943 сылга суруллубут сурук историяҕа киирбитэ. Кинилэр төрөөбүт өрөспүүбүлүкэлэрин олоҕун туһунан сонуннаах хаһыаты кэмигэр тиэрдэллэрин иһин махтаммыттара», – диэн аҕынна.

Афанасий Петрович Илларионов аатынан СӨ Ил Түмэнин суруналыыстыка салаатыгар 2014 сыллааҕы бириэмийэтэ, лауреат аатын иҥэрэн туран, Уус-Алдан улууһун «Мүрү саһарҕата» хаһыат-полиграфическай холбоһугун редактор-директора Аркадий Алексеевка, СӨ-гэр судаарыстыбаннаһы бөҕөргөтүүгэ уонна парламентаризмы сайыннарыыга кэккэ матырыйааллары бэчээттээн таһаарыы иһин, туттарылынна.

СӨ социальнай-экономическай сайдыытыгар үтүөлэрин иһин Ил Түмэн Бэрэссэдээтэлин махталынан, үрүҥ көмүс бэлиэни туттаран туран, Ил Түмэн Бочуоттаах грамотатынан «Сахамедиа» Саха иһитиннэрэр агентствотын сонуну таһаарар сулууспатын начальнига Оксана Ноева, «Саха» НКИК регионнары кытта үлэҕэ айар холбоһугун программаларын ыытааччы Николай Курилов, «Саха» НКИК «Геван» редакциятын редактора Наталья Сметанина наҕараадаланнылар.

Түмүгэр парламент спикерин солбуйааччы салаа үлэһиттэригэр идэҕэ ситиһиилэри, кинилэр дьиэ кэргэттэригэр тапталы, өйдөһүүнү уонна уйгуну баҕарда.