17 апреля 2015 в 13:49

Парламеҥҥа борокуруор бырачыаһа киирдэ

СӨ Ил Түмэнигэр «Бэйэлэрин боломуочуйаларын толорууну тохтоппут Саха Өрөспүүбүлүкэтин Президенигэр уонна вице-президенигэр, уонна кинилэр дьиэ кэргэттэригэр социальнай мэктиэлэри биэрии бэрээдэгин туһунан» 2009 с. муус устар 23 к. СӨ Сокуонун сорох нуормаларыгар СӨ Борокуруорун бырачыаһа киирдэ. Итини парламент пресс-сулууспата иһитиннэрдэ.

Борокуруор бырачыаһыгар бэлиэтэнэринэн, бэйэлэрин боломуочуйаларын толорууну тохтоппут СӨ Президенигэр уонна вице-президенигэр өрөспүүбүлүкэ сокуонунан социальнай мэктиэлэри олохтооһун, Саха Өрөспүүбүлүкэтэ дотациялаах буоларынан, бюджет сокуоннарын утарар. Санаторийга-курорка эмтэнииттэн саҕалаан көмөлөһөөччүлэри тутууга тиийэ өрөспүүбүлүкэ урукку салайааччыларын мэктиэлэрэ бары мөккүөргэ турдулар.
«Российскай Федерация субъектарын судаарыстыбаннай былааһын сокуону оҥорор (бэрэстэбиитэллээх) уонна толоруулаах уорганнарын тэрийии уопсай тускулларын туһунан» 1999 с. алтынньы 6 к. 184 №-дээх Федеральнай сокуон 26.3 ыстатыйатын 2-с чааһын 1 п. РФ субъектарыгар ыйыллыбыт мэктиэлэри кинилэр бюджеттарын суотугар олохтуур быраап бэриллибитэ.

Өрөспүүбүлүкэ сокуонун нуормалара федеральнай сокуонунан олохтоммут боломуочуйаларга сөп түбэһиннэрэн ылыллыбыттара уонна «Саха Өрөспүүбүлүкэтин Баһылыгын туһунан» 2006 с. алтынньы 11 к. Конституционнай сокуон 15 ыстатыйатын балаһыанньаларыгар олоҕураллар. Оттон ити ыстатыйа бэйэтин өттүттэн «Саха Өрөспүүбүлүкэтин Президенин туһунан» 1991 с. алтынньы 16 к. СӨ Сокуонун 16-с ыстатыйатын балаһыанньаларын хатылыыр.

Ыам ыйын 27-28 күннэригэр буолуохтаах пленарнай мунньахха СӨ Борокуруорун бырачыаһын көрүү түмүктэринэн Ил Түмэн туһааннаах быһаарыылары ылыаҕа.