Парламеннар Ассоциацияларын мунньаҕар

Тэрээһиҥҥэ «Уһук Илин уонна Забайкалье» Парламеннар Ассоциацияларын бэрэссэдээтэлин солбуйааччы, Еврейскэй автономнай уобалас Сокуону оҥорор Мунньаҕын бэрэссэдээтэлэ Анатолий Тихомиров, Приморскай кыраай Сокуону оҥорор Мунньаҕын бэрэссэдээтэлэ Виктор Горчаков, Амур уобалаһын Сокуону оҥорор Мунньаҕын бэрэссэдээтэлэ Константин Дьяконов, Сахалин уобалаһын Думатын бэрэссэдээтэлэ Владимир Ефремов, Камчатка кыраайын Сокуону оҥорор Мунньаҕын бэрэссэдээтэлэ Валерий Раенко, Забайкальскай кыраай Сокуону оҥорор Мунньаҕын бэрэссэдээтэлэ Наталья Жданова, Чукотка автономнай уокуругун Думатын бэрэссэдээтэлэ Валентина Рудченко, Хабаровскай кыраай Сокуону оҥорор Думатын бэрэссэдээтэлин солбуйааччы Сергей Луговской, Магадан уобалаһын Думатын бэрэссэдээтэлин бастакы солбуйааччы Оксана Бондарь, СӨ Судаарыстыбаннай Мунньаҕын (Ил Түмэн) бэрэссэдээтэлэ Александр Жирков баһылыктаах СӨ народнай депутаттара, РФ Федеральнай Мунньаҕын бэрэстэбиитэллэрэ, РФ субъектарын судаарыстыбаннай былааһын сокуону оҥорор (бэрэстэбиитэллээх) уорганнарын депутаттара, аппарааттарын бэрэстэбиитэллэрэ, РФ субъектарын судаарыстыбаннай былааһын толоруулаах уорганнарын, сонуну тарҕатар ситимнэр бэрэстэбиитэллэрэ кытыннылар.
Мунньахха макрорегион социальнай-экономическай сайдыытын сокуонунан сүрүннээһини тупсарыы боппуруостара көрүлүннүлэр. Бэбиэскэҕэ 10 боппуруос киллэриллибитэ.
Мунньаҕы «Уһук Илин уонна Забайкалье» Парламеннар Ассоциацияларын бэрэссэдээтэлин солбуйааччы, ЕАУо Сокуону оҥорор Мунньаҕын бэрэссэдээтэлэ Анатолий Тихомиров аста. Эҕэрдэ тыл СӨ Ил Түмэнин бэрэссэдээтэлэ Александр Жирковка бэрилиннэ.

Ил Түмэн бэрэссэдээтэлэ Александр Жирков Дьокуускайга Парламеннар Ассоциацияларын 35-с мунньаҕа ыытылла турарын бэлиэтээтэ. Спикер «Уһук Илин уонна Байкал регионун тэтимнээх сайдыытын ураты усулуобуйаларын туһунан» федеральнай сокуон барылын дьүүллэһии сүрүн боппуруостартан биирдэстэринэн буоларын эттэ. Ити сокуон барылын макрорегион сокуону оҥорооччулара ааспыт сыл муус устарыгар Дьокуускайга буолбут Парламеннар Ассоциацияларын Уопсай мунньаҕар өйөөбүттэрэ. Оттон быйыл Уһук Илин уонна Забайкалье парламеннарын Ассоциацията Россия Хотугулуу-Арҕааҥҥы Парламеннарын Ассоциациятын кытта бииргэ үлэлээһин туһунан сөбүлэһиигэ илии баттаабыта. Санатан эттэххэ, икки түмсүү састаабыгар былаас 11-дии сокуону оҥорор (бэрэстэбиитэллээх) уорганнара киирэллэр, ити РФ 22 субъега, эбэтэр дойду бары регионнарын чиэппэриттэн ордуга. «Сөбүлэһии Российскай Федерация 22 регионун түмтэ – бу сокуону оҥорууга улахан кыах, ону биһиги арктикатааҕы сокуоннарбытын хамсатыыга туһаныахпытын сөп», – диэн бэлиэтээтэ Александр Жирков уонна туһалаах үлэни баҕарда.

Парламентарийдар сүрүн боппуруоһунан «Уһук Илин уонна Байкал регионун тэтимнээх сайдыытын ураты усулуобуйаларын туһунан» федеральнай сокуон барылын дьүүллэстилэр.
Сокуон барылын туһунан сүрүн дакылааты Вячеслав Штыров оҥордо.

Уһук Илин уонна Забайкалье сокуону оҥорооччуларын көрүүтүгэр айылҕа ураты ресурсатын – мамонт фаунатын сөптөөхтүк туһаныы туһунан Ил Түмэн сокуон барылын киллэрбитэ. Ону таһынан «Сир аннын туһунан» РФ Сокуонун 12 ыстатыйатыгар эбиилэри киллэрии туһунан сокуон барылын, «О любительском рыболовстве» диэн федеральнай сокуон барылыгар Хоту дойду, Сибиир уонна Уһук Илин сирдэригэр-уоттарыгар балыксыттар интэриэстэрин учуоттааһыҥҥа туһаайыллар Саха сирин парламенын көннөрүүлэрин дьүүллэһии былааннаммыта.

Предпринимателлэри өйөөһүн инники күөҥҥэ тутуллар туһаайыыларын быһаарыыга РФ субъектарын сокуону оҥорор уорганын кыттыытын туһунан боппуруоһу Забайкальскай кыраай киллэрбитэ.

Аҕыйах ахсааннаах төрүт норуоттар сир учаастактарыгар быраабы ылыыларын боппуруоһун туһунан Ил Түмэн оҥорбут сокуонун барылын дьүүллэһии буолла.
Мунньах кэмигэр РФ Бырабыыталыстыбатын Бэрэссэдээтэлэ Дмитрий Медведевкэ уонна РФ Федеральнай Мунньаҕын Федерация Сэбиэтин Бэрэссэдээтэлигэр Валентина Матвиенкоҕа, Госдума Бэрэссэдээтэлэ Сергей Нарышкиҥҥа туһаайыллыбыт икки ыҥырыы барыла көрүлүннэ.

Ону таһынан ЕАУо Сокуону оҥорор Мунньаҕа «Ветераннар тустарынан» Федеральнай сокуоҥҥа уларытыылары киллэрии туһунан сокуонун барыла дьүүллэһиигэ турда. Мунньах Ассоциация финансовай боппуруостарын көрүүнэн түмүктэннэ.