Парламент сааскы сессията саҕаланна

Норуот итэҕэллээхтэрэ сааскы сессия кэмигэр дьүүллэһии кэнниттэн өрөспүүбүлүкэ саҥа сокуоннарын ылыныахтаахтар. Ол курдук, өрөспүүбүлүкэ Сирин кодексыгар, Саха сирин арктикатааҕы улуустарыгар таһаҕаһы тиэйии ураты режимин туһунан сокуоҥҥа, өрөспүүбүлүкэ Общественнай палаататын, культура туһунан сокуоннарга, административнай сокуону кэһиилэр тустарынан Кодекска, муниципальнай тэриллиилэр бюджетынан хааччыллыыларын тэҥнээһин, өрөспүүбүлүкэҕэ бюджет тутулун уонна бюджет процеһын туһунан уо.д.а. сокуоннарга уларытыылары киллэрии былааннанар. Ону таһынан өрөспүүбүлүкэ Бырабыыталыстыбата Саха сиригэр тыа хаһаайыстыбатын сайдыытын туһунан кэлимсэ сокуон барылын киллэриэхтээх. Сааскы сессияҕа Счетнай палата 2014 сыллааҕы үлэтин отчуота истиллиэҕэ.

2015 сылга – Аҕа дойду Улуу сэриитигэр Кыайыы 70-с сылыгар өрөспүүбүлүкэ парламена Саха сирин Бырабыыталыстыбатын кытта бииргэ сэрии уонна тыыл бэтэрээннэрин социальнай өйөөһүн боппуруостарын көрөргө былаанныыллар.

Сааскы сессия кэмигэр Ил Түмэн бастакы ааҕыыга ылыммыт сокуоннарын барылларын көрүү салҕаныаҕа: «Көс дьиэ кэргэн туһунан», «Саха Өрөспүүбүлүкэтигэр гражданнары социальнай хааччыйыы туһунан», «Саха Өрөспүүбүлүкэтигэр социальнай өҥөлөрү босхо биэриигэ анаан биир дууһаҕа орто дохуот муҥутуур улахан кээмэйин олохтооһун туһунан», «Саха Өрөспүүбүлүкэтигэр спорт национальнай көрүҥнэрин туһунан», «Тренер-преподаватель туһунан». Ону сэргэ 2015 сылга уонна 2016-2017 сс. былааннаммыт кэмҥэ Саха сирин судаарыстыбаннай бюджетын параметрдарыгар, 2015 сылга уонна 2016-2017 сс. былааннаммыт кэмҥэ өрөспүүбүлүкэ булгуччулаах медицинскэй страхованиеҕа Территориальнай фондатын бюджетыгар парламентарийдар уларытыылары киллэриэхтэрэ.
Ил Түмэн Госдумаҕа сокуону көҕүлээһин бэрээдэгинэн федеральнай сокуон барылларын киллэриэҕэ.

Итини сэргэ 2015 сыл сааскы сессиятыгар парламент истиилэрэ, «бырабыыталыстыба чаастара» уонна «төгүрүк остуоллар» тэриллиэхтэрэ. Биир оннук тэрээһининэн «2012-2017 сс. Саха Өрөспүүбүлүкэтин научнай-техническэй уонна инновационнай сайдыыта», «2012-2017 сс. Саха Өрөспүүбүлүкэтин үөрэҕин сайдыыта» судаарыстыбаннай программалары 2014 сылга толоруу хаамыытын парламент истиилэригэр көрүү буолуоҕа. Парламент истиилэригэр ону сэргэ Саха сирин 2014 сыллааҕы судаарыстыбаннай бюджетын толоруу туһунан отчуот көрүллүөҕэ.

Оскуола иннинээҕи үөрэх тэрилтэлэрин тутуу хаамыытын, кэккэ регионнааҕы сокуоннары уонна өрөспүүбүлүкэ судаарыстыбаннай программаларын толоруу, чуолаан «Судаарыстыбаннай үбү уонна судаарыстыба иэһин салайыы» судаарыстыбаннай программаны толоруу туһунан «бырабыыталыстыба чаастарын» тэрийии былааннаныллар. Ону таһынан кэккэ «төгүрүк остуоллар» ыытыллыахтара: «Ыччаты патриотическай уонна сиэр-майгы өрүттэригэр иитии тирээн турар проблемалара. Улуу Кыайыы 70 сылыгар», «Саха Өрөспүүбүлүкэтин литератордара айар кыахтарын олоххо киллэрэллэригэр усулуобуйалары тэрийии», «Саха Өрөспүүбүлүкэтигэр оҕолорго оскуола иннинээҕи үөрэҕи биэрии кыахтарын кэҥэтии», «Саха Өрөспүүбүлүкэтин норуоттарын тылларын харыстааһыҥҥа уонна тарҕатыыга сонуну киэҥник тарҕатар ситимнэр кылааттарын үрдэтии туһунан» уо.д.а. «төгүрүк остуоллар».
Чугастааҕы кэмҥэ өрөспүүбүлүкэ парламена 2015 с. сааскы сессиятыгар сокуону оҥорууга үлэтин барыллааһын былаана бигэргэтиллиэҕэ.