Парламентарий дьахталлар көрүстүлэр

Саха сирин общественнай-политическай хамсааһынын ветераннарын, Ил Түмэн араас сыллардааҕы ыҥырыыларыгар үлэлээбит дьахталлары парламент эр дьонун аатыттан Судаарыстыбаннай Мунньах Бэрэссэдээтэлин бастакы солбуйааччы Анатолий Добрянцев эҕэрдэлээтэ.
«Эһиги өрөспүүбүлүкэбит сайдыытын дьыалатыгар улахан кылааты киллэрбиккит. Бүгүҥҥү күҥҥэ диэри регион общественнай олоҕор көхтөөхтүк кыттаҕыт, наставник быһыытынан кэлэн, депутаттары кытта көрсөҕүт, Ил Түмэн тэрээһиннэригэр кыттаҕыт. Эһиги үлэҕэ тапталгытын уонна бэйэҕит дьыалаҕытыгар бэриниилээххитин биһиги сөҕө көрөбүт. Эһиэхэ чэгиэн доруобуйаны, уһун айымньылаах олоҕу, тапталы уонна дьиэ кэргэҥҥитигэр туруктаах буолууну баҕарабыт, бары былааннаргыт уонна ыра санааларгыт олоххо киирдиннэр», — диэн бастакы вице-спикер баҕа санаатын тиэртэ.
Ил Түмэн Хоту сир аҕыйах ахсааннаах төрүт олохтоох норуоттарын боппуруостарыгар уонна Арктика дьыалаларыгар сис кэмитиэтин бэрэссэдээтэлэ, бэһис ыҥырыыга парламентарий-дьахталлар кулууптарын салайааччыта Елена Голомарева кинилэр общественнай тэрилтэлэрэ парламентарий-дьахталлар баай политическай уопуттарын туһанан, аныгы кэм тирээн турар боппуруостарын быһаарыыга анаан тэриллибитин бэлиэтээтэ. «Эһигиттэн хас биирдиигит үлэҕэ уонна олоххо холобур буолар дьоҥҥут. Эһигини өрөспүүбүлүкэҕэ билэллэр, дьон эһиги тускутунан үгүс үтүө тылынан ахталлар, онтон биһиги олус киэн туттабыт», — диэтэ норуот депутата. Өрөспүүбүлүкэтээҕи дьахтар тэрилтэлэрин Сойууһун пленума буолаары турарынан, кини общественнай-политическай кулууп үлэтин инники былааннарын билиһиннэрдэ. Сааскыттан саҕалаан көһө сылдьар мунньахтар тэриллиэхтэрэ диэн туран, онно көрсүһүү кыттыылаахтара көхтөөхтүк кытталларыгар ыҥырда.
Ил Түмэн наукаҕа, үөрэххэ, култуураҕа, сонуну киэҥник тарҕатар ситимнэргэ уона общественнай тэрилтэлэр дьыалаларыгар сис кэмитиэтин бэрэссэдээтэлэ Антонина Григорьева күүстээх уонна муударай дьахтар холобурун кэнэҕэски көлүөнэлэргэ көрдөрөллөрүн иһин парламентарийдарга махталы биллэрдэ. «Бүгүҥҥү сааскы күн курдук, таптал уонна ытыктабыл истиҥ тылларыттан эһиги дууһаҕытыгар мэлдьи сылаас уонна сырдык буолуохтун», — диэн кини баҕа санаатын эттэ.
Кэлэн иһэр Дьахтар күнүнэн Ил Түмэн спикерин солбуйааччы Ольга Балабкина аатыттан ыалдьыттарга сибэккини, открыткалары уонна «Журфикс» сурунаал сибиэһэй нүөмэрин бэлэхтээтилэр.