Парламентарий-дьахталларга итэҕэл күүстээх

“Уурайбыт депутат диэн суох, депутаттаан бүтэн да баран, норуот туһугар үлэтин кини тохтоппот. Кини үлэлээбит уопута баһаам буоллаҕа. Ол иһин дойду, өрөспүүбүлүкэ уонна улуус таһымыгар общественнай уонна политическай олох сүнньүнэн тэҥҥэ үлэлэһэр усулуобуйаларын оҥороору бу кулууп тэриллибитэ”, – диэн Хоту сир аҕыйах ахсааннаах төрүт олохтоохторун боппуруостарыгар уонна Арктика дьыалаларыгар Ил Түмэн сис кэмитиэтин бэрэссэдээтэлэ Елена Голомарева этэн турардаах. Ол курдук, кулууп сүрүн сыалынан-соругунан былаас уонна общество тэҥ таһымҥа социальнай-экономическай хабааннаах сытыы боппуруос­тары ырыталларын ситиһии буолар.
Бэйэлэрин кэмнэригэр депутат дьахталлар нэһи­лиэнньэ олоҕун таһыма үрдүүрүгэр тирэх буолар үгүс сүрүн сокуоннарга көннөрүүлэри киллэрбиттэрэ. «Саха Өрөспүүбүлүкэтин үөрэҕириитин туһунан» сокуоҥҥа депутат дьахталлар көҕүлээһиннэринэн үгүс уларыйыылар киир­биттэрэ. Үгүс сокуоҥҥа нэһилиэнньэ интэриэһин таа­рыйар уларыйыылары парламентарий-дьахталлар киллэрбиттэрэ – социальнай көмүскэлгэ, култуураҕа, прикладной искусствоҕа, экологияны, музейдары, култуура пааматынньыктарын харыстааһыҥҥа сыһыаннаах сокуоннарга уларытыылары киллэриигэ үлэлэспиттэрэ”, – диэн Елена Голомарева парламентарий-дьахталлар үлэлэрин туһунан кэпсэтиигэ иһитиннэрбитэ.
2013 сыл түмүгүнэн парламентарий-дьахталлар 188 сокуон автордарынан эбэтэр хос авторынан буолбуттар. Ол курдук, РФ Государственнай Думатын бэһис ыҥырыытыгар депутатынан талыллыбыт Юлия Песковская өйөбүлүнэн, Саха Өрөспүүбүлүкэтин дьахталларын хамсааһынын көҕүлээһининэн федеральнай таһымҥа пиибэни итирдэр утахтарга тэҥниир туһунан этии киллэрбиттэрэ.
Парламентарий-дьах­таллар Саха Өрөспүүбүлүкэтин дьахталларын XIII, XIV съезтэригэр делегатынан талыллан, үгүс сытыы боппуруостары ырытыыга бэйэлэрин кылааттарын киллэрбиттэрэ.