794
17 января 2015 в 10:27
Редактордары кытта көрсүһүү
Тохсунньу 14 күнүгэр Ил Түмэн вице-спикерэ Ольга Балабкина, наукаҕа, үөрэххэ, культураҕа, сонуну киэҥник тарҕатар ситимнэргэ уонна общественнай тэрилтэлэр дьыалаларыгар сис кэмитиэт бэрэссэдээтэлин солбуйааччы Иван Андросов, бэчээт уонна телевидениенэн, араадьыйанан биэрии дьыалаларыгар департамент салайааччытын э.т. Николай Молчанов, аппараат салайааччытын солбуйааччыта – Ил Түмэн аналитическай управлениетын начальнига Андрей Антонен, парламент иһитиннэрэр политикаҕа управлениетын начальнига Татьяна Мартынова, улуустар (оройуоннар) иһитиннэрэр тиһиктэрин кылаабынай редактордара парламент тэрийбит дьыалабыай сарсыардааҥҥы аһылыкка көрүстүлэр. Ити туһунан парламент пресс-сулууспата иһитиннэрдэ.
Кэпсэтиигэ сүрүн теманан сокуону оҥорор уонна бэрэстэбиитэллээх былаас уорганнарын үлэтин сырдатыыга көдьүүстээх бииргэ үлэлээһин буолла.
Вице-спикер бэлиэтээбитинэн, парламент сонуну тарҕатар ситимнэри кытта көдьүүстээхтик бииргэ үлэлиир суоллары мэлдьи көрдүүр. Ол курдук, ааспыт сыл сэтинньиттэн парламент пресс-кулуубун мунньаҕын ыытар, онно парламентарийдар суруналыыстары кытта уопсастыбаҕа саамай тирээн турар проблемалары дьүүллэһэллэр. Ольга Балабкина итинник пресс-кулууп мунньаҕын Эбээн-Бытантай улууһун «Бытантай уоттара» хаһыат редактор-директора Наталья Попова ыытарыгар этии киллэрдэ. Онно ыраах сытар, сылдьарга эрэйдээх аҕыйах нэһилиэнньэлээх пууннарга кыра комплектаах балыыһалары сабыы туһунан кэпсэтии буолуохтаах.
Ил Түмэн иһитиннэрэр политикаҕа управлениетын начальнига Татьяна Мартынова кини салалтатынан ыытыллар үлэни билиһиннэрдэ. Быйылгыттан сахалыы тылынан «Парламент илдьитэ» диэн телевидение биэриитэ тахсыахтааҕын туһунан кэпсээтэ. Парламент пресс-кулууба улуустарга көһө сылдьар тэрээһиннэрэ былааннаналларын эттэ.
«Бытантай уоттара» хаһыат редактора Наталья Попова ый анараа өттүгэр Ил Түмэн спикерэ Александр Жирков баһылыктаах делегация Эбээн-Бытантай улууһугар ыстаадаларга тиийэн, табаһыттары кытта бу салаа кыһарыйар кыһалҕаларын дьүүллэспитин кэпсээтэ.
Кини депутаттартан «Көс дьиэ кэргэн» туһунан өрөспүүбүлүкэ сокуонун барылын бүтэһиктээх ааҕыыга ыларга көрдөстө.
Итини сэргэ «Амма олоҕо» хаһыат редактора Наталья Бубякина парламент сайтыгар норуот депутаттара быыбардааччылар накаастарын хайдах толороллорун туһунан отчуоттарын таһаарарга, тирээн турар проблемаларга санааларын атастаһалларыгар, Ил Түмэҥҥэ парламент истиилэригэр, пленарнай мунньахтарыгар улуустааҕы хаһыаттары ыҥырарга, улуус хаһыатыгар кыбартаалга биирдэ депутат үлэтин туһунан кэпсииригэр этии киллэрдэ.
«Таатта» хаһыат редактора Анна Посельская улуус хаһыатыгар электроннай сурутууну тэрийэргэ этиилээх. Оттон «Томпонский вестник» хаһыат редактора Людмила Винокурова олохтоох салайыныы эйгэтигэр үлэ уопутун элбэхтик сырдатарга көрдөстө.
Оройуон редактордарыгар туһаайан, аналитическай управление начальнига Андрей Антонен оройуон сэбиэтин депутаттара сокуону көҕүлүүр бырааптаахтарын, ону ситэ туһамматтарын эттэ уонна хаһыаттар бу быраабы олоххо киллэриигэ көмөлөһөллөрүгэр ыҥырда.
