Саха Өрөспүүбүлүкэтин Судаарыстыбаннаһын күнэ

Саха Өрөспүүбүлүкэтин Ил Түмэнин уонна тус бэйэм ааппыттан эһигини Саха Өрөспүүбүлүкэтин Судаарыстыбаннаһын күнүнэн эҕэрдэлиибин!

 1922 сыл муус устар 27 күнүгэр РСФСР Киин ситэриилээх кэмитиэтин Президиума Саха АССР төрүттэниитин туһунан Декрети ылынан, 95 сыллааҕыта Саха сирэ судаарыстыбаннастаах буолуутун бигэргэппитэ.

 Саха АССР XII ыҥырыылаах Үрдүкү Сэбиэтэ 1990 сыл балаҕан ыйын 27 күнүгэр ылыммыт Саха Өрөспүүбүлүкэтин судаарыстыбаннай суверенитетын туһунан Декларацията Сахабыт сирин судаарыстыбаннаһын сайдыытын саҥа таһымҥа таһаарбыта. Бу историяҕа киирбит докумуон өрөспүүбүлүкэбит социальнай-экономическай бигэ туруктаах буолуутун, норуот духуобунай сайдыытын түстээбитэ.

 Быйыл биһиги өрөспүүбүлүкэбит историятыгар улахан суолталаах түгэннэри — Саха сирэ Россия састаабыгар киирбитэ 385 сылын, Өктөөп Өрөбөлүүссүйэтин 100 сылын, Максим Кирович Аммосов төрөөбүтэ 120 сылын бэлиэтиибит.

 Бу күн өрөспүүбүлүкэбит судаарыстыбаннаһын олохтонуутугар олук уурбут дьоммут – Алексей Кулаковскай-Өксөкүлээх Өлөксөй, Василий Никифоров-Күлүмнүүр, Максим Аммосов, Платон Ойуунускай, Степан Аржаков, Исидор Барахов уонна да атыттар ааттарын махталлаахтык ааттыыбыт.

 Сэбиэттэр Бүтүн Саха сиринээҕи I сийиэстэрэ уонна Саха АССР Үрдүкү Сэбиэтэ саҕалаабыт үгэстэрин салҕаан, Cаха Өрөспүүбүлүкэтин Ил Түмэнэ судаарыстыбаннас институттара салгыы сайдалларыгар, Россия судаарыстыбатын федеративнай тутула чиҥииригэр бэйэтин кылаатын киллэрэр. Парламент сокуону тупсарыыга, өрөспүүбүлүкэбит нэһилиэнньэтигэр тоҕоостоох усулуобуйаны хааччыйар социальнай хайысхалаах бюджеты үөскэтиигэ утумнаахтык үлэлэһэр.

 Күн бүгүн барыбыт күүспүтүнэн улахан бырайыактар олоххо киирэллэр. Саха Өрөспүүбүлүкэтин социальнай- экономическай сайдыытын 2030 сылга диэри, салгыы 2050 сылга диэри туһаайыллыбыт сыалын быһааран туран, Стратегиятын ылыныы өрөспүүбүлүкэ инники сылларга сайдыытын мэктиэлиэ, нэһилиэнньэ олоҕун таһымын үрдэтиэ.

 Күндү Сахам сирин дьоно! Эһиэхэ чэгиэн туругу, уйгулаах олоҕу, төрөөбүт дойдубут чэлгийэ сайдарын туһугар  айымньылаах үлэни, үөрэҕи, ситиһиилэри, этэҥҥэ буолууну баҕарабын!