Саха Сирэ көҕүлээһининэн Санкт-Петербурга съезд ыытыллыа

Быһа сибээскэ Саха Өрөс­пүүбүлүкэтиттэн Үөрэх миниис­тирин бастакы солбуйааччыта Феодосия Габышева, Хоту сир аҕыйах ахсааннаах төрүт норуоттарын боппуруостарыгар уонна Арктика дьыалатыгар Ил Түмэн сис кэмитиэтин бэрэссэдээтэлэ Елена Голомарева, Аҕыйах ахсааннаах хотугу норуоттар ассоциацияларын бэрэсидьиэнэ Андрей Кривошапкин, Саха Республикатыгар аҕыйах ахсааннаах төрүт олохтоох хотугу норуоттар бырааптарыгар Боломуочунай Константин Роббек, Төрүт омуктар оскуолаларын чинчийэр институт дириэктэрэ Светлана Семенова, эбээннэр, дьүкээгирдэр, чукчалар сойуустарыттан чилиэттэрэ, Гуманитаарынай чинчийиилэр уонна аҕыйах ахсааннаах хотугу норуоттар проблемаларын чинчийэр институт үлэһиттэрэ уонна М.К. Аммосов аатынан Хотугулуу-Илиҥҥи федеральнай университет бэрэс­тэбиитэллэрэ уо.д.а. кэллилэр.

Видеоконференцияны Хоту сир аҕыйах ахсааннаах төрүт норуоттарын боппуруостарыгар уонна Арктика дьыалатыгар Ил Түмэн сис кэмитиэтин бэрэссэдээтэлэ Елена Голомарева иилээн-саҕалаан ыытта. Елена Хрис­тофоровна маннык тэрээһин үтүө түмүктэрдээх буолуо диэн бэлиэтээтэ: «Билиҥҥи сайдыы үйэтигэр Саха сирин уонна Арассыыйа атын да регионнарын төрүт олохтоохторун тылларын-өстөрүн, култуураларын харыстааһын биир долгутар боппуруос. Онон съезд төрүт тылы, литератураны уонна култуураны үөрэтэр учууталларын түмэ тардар уһулуччу суолталаах», — диэн тоһоҕолоото.

 

 

 

ЫСПЫРААПКА

Хоту, Сибиир уонна Уһук Илин аҕыйах ахсааннаах төрүт олохтоох норуоттарын тылын, литературатын уонна култууратын учууталларын съеһэ сэтинньи 20 – 21 күнүгэр Санкт-Петербург куо­ракка Арас­сыыйатааҕы судаарыстыбаннай А. И. Герцен аатынан педагогика университетыгар буолар. Манна Арассыыйа 12 регионуттан кыттыылаахтар, ыҥырыылаах ыалдьыттар кэлэллэрэ күүтүллэр. Съезд Саха Өрөспүүбүлүкэтин көҕүлээһининэн Арассыыйа үрдүнэн аан бастакытын ыытыллыа.

Тэрээһиҥҥэ Арассыыйа 12 региона кыттыахтааҕыттан Ханты-Мансийскай автономнай уокурук, Магадан уобалаһа, Кемерова уобалаһа, Сахалин уобалаһа, Забайкальскай кыраай, Ямало-Ненецкэй автономнай уокурук уонна Мурманскай уобалас быһа сибээскэ таҕыста.
Регионнар биирдиилээн бу съезкэ төһө бэлэмнээхтэрин, төһө киһи кыттыыны ыларын чопчулаатылар. Маны таһынан, съезд үлэтигэр быһаччы туох көмө наадатын, тэрийии боп­пуруоһугар этии киллэрдилэр, санааларын үллэһиннилэр.
Үөрэх миниистирин бастакы солбуйааччыта Феодосия Габышева Арассыыйа аҕыйах ахсааннаах төрүт норуоттарын сүрүн кыһалҕаларынан демография мөлтөөһүнэ, үөрэхтээһин таһыма намтааһына, итиэннэ маннык норуоттар көмүскэллээх буолууларын туһунан сокуон мөлтөөһүнэ буолар диэн бэлиэ­тээтэ. Кини этэринэн, суол-иис суоҕа, Интернет бытаана, идэлээх дьон аҕыйаҕа, аныгы ирдэбилгэ эппиэттиир материальнай-техническэй бааза суоҕа норуот сайдыытын харгыстыыр. Феодосия Васильевна региоҥҥа үөрэхтээһин сайдыытын үс сүрүн өрүтүн бэлиэтээтэ: «Бастатан туран, ФГОС-ка олоҕуран хаачыстыбалаах уонна тиийимтиэ үөрэхтээһин систиэмэтин сайыннарыы. Иккиһинэн, регионнар национальнай уратыларын учуотаан, идэлээх педагогическай каадырдары бэлэмнээһин. Үһүс өрүтүнэн үөрэхтээһин тэрилтэтин аныгы ирдэбилгэ сөпсөһүннэрэн, материальнай-техническай уонна технологическай баазатын тупсарыы, саҥардыы буолар», — диэн чопчулаата.
Видеоконференция түмү­гүнэн, съезд үлэтин бары өрүтүн хаттаан көрөргө уонна тэрээһин үлэтигэр ситэтэ суох боппуруос­тары дириҥник ырытарга, регионнар этиилэрин учуоттаан, буолуохтаах болдьоххо диэри силигин ситэрэргэ диэн былаан ылыннылар. Маны сэргэ съезд чэрчитинэн төрүт тыл, литература уонна култуура учууталларыгар уопут атастаһар маастар-кылаастары ыытар туһунан этиини өйөөтүлэр.

Ирина Ханды.