Сэрии оҕолоругар туох чэпчэтиилэр көрүлүннүлэр?

1945 сыл балаҕан ыйын 3 к. туругунан сокуоннай саастарын туола илик гражданнарга  социальнай өйөбүл дьаһалларын туһунан сокуон ылылынна

Парламеҥҥа “Биир ньыгыл Россия” фракциятын салайааччыта, Ил Түмэн доруобуйа харыстабылыгар, социальнай көмүскэлгэ, үлэҕэ уонна дьарыктаах буолууга сис кэмитиэтин бэрэссэдээтэлэ Владимир Чичигинаров сокуон барылын туһунан сиһилии иһитиннэриини оҥордо.

Владимир Ильич иһитиннэрбитинэн, сокуон барылынан 1945 сыл балаҕан ыйын 3 к. сокуоннай саастарын туолбатах гражданнар (Аҕа дойду Улуу сэриитин оҕолоро) правовой статустарын итиэннэ ыйыллыбыт дьоҥҥо социальнай өйөбүл дьаһалларын быһаарыы көрүллэр. Саха Өрөспүүбүлүкэтин сокуонун барылынан Аҕа дойду Улуу сэриитин оҕолоругар социальнай өйөбүл маннык дьаһалларын биэрэр туһунан этиллэр (Саха Өрөспүүбүлүкэтин сокуонун барылын 2-с ыстатыйата):

— ый аайы 1000 солк. кээмэйинэн харчынан төлөбүр. Ыйдааҕы харчынан төлөбүр кээмэйэ Саха Өрөспүүбүлүкэтин Бырабыыталыстыбата быһаарбыт бэрээдэгинэн уонна болдьохторунан индексацияланар;

— сыл аайы диспансеризация;

— Саха Өрөспүүбүлүкэтин сиригэр-уотугар санаторийга-куруорка эмтэниигэ путевка сыанатын 50 бырыһыанын кээмэйинэн харчынан толуйуу төлөнөр эбэтэр Саха Өрөспүүбүлүкэтин сиригэр-уотугар санаторийга-куруорка эмтэниигэ путевканы сыанатын 50 бырыһыанын төлөөн туран (кинилэрэ бэйэлэрэ талалларынан) ыйыллыбыт дьоҥҥо 3 сылга биирдэ бэриллэр;

— стационар, стационар аҥаардаах көрүҥүнэн социальнай өҥөлөрү оҥорор социальнай хааччыйыы тэрилтэтигэр уочарата суох киллэрии, дьиэҕэ-уокка социальнай хааччыйыы көрүҥүнэн өҥөлөрү оҥорор социальнай тэрилтэлэринэн уочарата суох хааччыллыы.

Салгыы Владимир Чичигинаров социальнай өйөбүл дьаһалларыгар ороскуоттар Саха Өрөспүүбүлүкэтин судаарыстыбаннай бюджетын суотугар үбүлэнэллэрин иһитиннэрдэ. Үөһэ этиллэр ыстатыйа 1-кы чааһынан олохтоммут социальнай өйөбүл дьаһалларын биэрии бэрээдэгин Саха Өрөспүүбүлүкэтин Бырабыыталыстыбата бигэргэтэр. Ити Сокуон 1-кы ыстатыйатыгар ыйыллыбыт Аҕа дойду Улуу сэриитин оҕолоругар биир көрүҥнээх дастабырыанньалар бэриллэллэр.

Дастабырыанньалары оҥоруу, биэрии уонна учуоттааһын бэрээдэгин СӨ Бырабыыталыстыбата быһаарар.

Гражданин маны тэҥэ федеральнай сокуонунан, Россия Федерациятын атын нуормалыыр правовой аактатынан, Саха Өрөспүүбүлүкэтин бу Сокуонунан, атын сокуонунан эбэтэр нуормалыыр правовой аактатынан олохтоммут социальнай өйөбүл дьаһалларын ылар бырааптаах буоллаҕына, киниэхэ ити сокуоннарынан, правовой аакталарынан олохтоммут социальнай өйөбүл дьаһаллара бэриллэллэр (гражданин талыытынан).

Сокуону дьүүллэһиигэ парламент бэрэссэдээтэлин солбуйааччы Виктор Губарев сокуон барылын иккис уонна бүтэһиктээх ааҕыыга ылынарга этии киллэрдэ. Норуот депутата Мария Христофорова сокуон суолтатыгар болҕомтону уурда, оттон Юрий Григорьев биир көрүҥнээх дастабырыанньа туһунан чопчуласта.

Норуот депутаттара сокуон барылын бүтэһиктээх ааҕыыга ылынарга быһаардылар.

Бу сокуон 2019 сыл тохсунньу 1 күнүттэн үлэлиэҕэ. Саха сиригэр кини дьайыытыгар 2646 киһи түбэһэр.