Сокуоннар уонна уураахтар барыллара көрүллэллэр

«2018 сылга уонна былааннаах 2019-2020 с.с. СӨ судаарыс­тыбаннай бюджетын туһунан» СӨ сокуонугар уларытыылары киллэрии туһунан» сокуон барылыгар иһитиннэриини үп миниис­тирэ Валерий Жондоров оҥорор.

Бу сокуон барыла, тус сыаллаах үп-харчы эбии киирбитинэн сибээстээн уонна бастакы уочараттаах социальнай  суолталаах ороскуоттары үбүнэн хааччыйар сыаллаах бэлэмнэммит. Сокуон барыла дохуот уопсай кээмэйэ 918 443 тыһ. солк. улаатарын, ол иһигэр федеральнай бюджеттан 908 878 тыһ. солк., РусГидро АУо тус сыаллаах үбүн тобоҕун төннөрүү суотугар 9 564 тыһ. солк. көрөр. Онон бюджет дохуоттаах чааһа 193 951 250 тыһ. солк. тэҥнэһиэҕэ. Орос­куот уопсай кээмэйэ 918 443 тыһ. солк. улаатыаҕа уонна бу сылга 195 656 276 тыһ. солк. тэҥнэһиэҕэ. Бу сылга судаарыстыбаннй бюджет дэпэссиитэ уларыйбат.

Сокуон барылын быһаа­рыылаах суругунан, 2018 сылга ороскуоттаах чааһы бюджеттан үбүлээһин кыччыахтаах:

— үөрэх эбийиэктэрин тутуу ороскуоттарын оптимиза­циялааһынынан сибээстээн —  260 546,6 тыһ. солк.;

— үөрэхтээһин эйгэтин эдэр исписэлиистэрин айаннарын уонна олохсуйар ороскуоттарын төлөбүрдэрин чуолкайдааһынынан сибээстээн —  4 304,4 тыһ. солк.;

— «Оҕолору этно-култуураҕа, тылга уонна аартыкатааҕы үөрэхтээһин бырагырааматын тэрийии» дьаһал ороскуоттарын чуолкайдааһынынан сибээстээн — 800 тыһ. солк.;

— «ТОААХН төрөөбүт тылларын үөрэтэр учууталлар үлэлэрин хаачыс­тыбатын үрдэтии» дьа­һаллар ороскуоттарын чуол­кайдааһынынан сибээс­тээн — 700 тыһ. солк.;

— «Үөрэх тэрилтэлэрин матырыйаалынай-тэхиниичэскэй баазаларын тупсарыы» дьаһалы чуолкайдааһынынан сибээстээн — 40 236 тыһ. солк.;

— социальнай суолталаах улуустар иһинээҕи авиа-лиинньийэлэргэ тырааныспар тоҕоостоох буолуутун хааччыйыы былаанын хат көрүүнэн сибээстээн — 41 310,8 тыһ. солк.;

— балык хаһаайыс­тыбатын комплексын матырыйаалынай-тэхи­нии­чэс­кэй баазатын саҥар­д­ыыны көҕүлээһиҥҥэ бы­лаан­наах наадыйыыны чуолкай­­дааһынынан уонна субси­­дияны ылааччылары сүүмэрдээһин түмүгүнэн кэмчилээ­һин тахсыбытынан сибээс­тээн – 13 000 тыһ солк.;

— бултуур сирдэри олох­тооһун, харыстааһын уонна туһаныы исхиэмэлэрин ырытан оҥорууга ороскуоттары чуолкайдааһынынан сибээстээн — 21 000 тыһ. солк.

Сокуон барылын дьүүл­лэһии кэнниттэн,  «СӨ 2016-2022 с.с. уонна былааннаах 2026 сылга диэри үөрэҕириитин сайдыыта», «СӨ 2018-2022 с.с. тырааныспарын сайдыыта», «2018-2022 с.с. СӨ нэһилиэнньэтин олоҕор-дьаһаҕар куттал суох буолуутун хааччыйыы», «2018-2020 с.с. тыа хаһаайыстыбатын сайыннарыы уонна тыа хаһаайыстыбатын бородууксуйатын, сырьетун уонна аһын-үөлүн ырыынагын сүрүннээһин», «2018-2022 с.с. СӨ-гэр тулалыыр эйгэни уонна айылҕа ресурсаларын харыстааһын» судаарыстыбаннай бырагыраамалар чэрчилэринэн, хотугу уонна аартыкатааҕы улуустар социальнай-экэнэмиичэскэй сайдыыларыгар көрүл- лүбүт үп-харчы сарбыллыытын таһаарбатыгар өрөспүүбүлүкэ бырабыыталыстыбатыгар сүбэни оҥорору сис кэмитиэт наадалааҕынан ааҕар.

Сис кэмитиэт, бэйэтин бэлиэтээһиннэрин уонна этиилэрин оҥорон туран, сокуон барылын өйүүрүн биллэрэр.

Ил Түмэн Хотугу төрүт олохтоох аҕыйах ахсааннаах норуоттарын уонна Аартыка дьыалаларыгар сис кэмитиэтин мунньаҕар норуот дьокутааттара Виктор Губарев, Василий Местников, Семен Иванов, Владимир Членов, Иван Андреев, Семен Березин, бырабыыталыстыба бэрэссэдээтэлин солбуйааччы Денис Белозеров, үп миниистирэ Валерий Жондоров, тыа хаһаайыстыбатын миниистирэ Александр Атласов,  исписэлиис­тэр кытыннылар уонна үлэлээтилэр.