Спикер Александр Жирков сиһилии хоруйдаата

Биэс оҕо аҕата, национальнай культура учуутала, билигин предпринимателинэн үлэлиир Андрей Петров бэйэтин бырайыагын – Дьокуускайга «Олоҥхо эйгэтэ» диэн алын сүһүөх оскуоланы аһар туһунан кэпсээтэ. Александр Николаевич, кинини болҕойон истэн баран, бырайыагы олоххо киллэриигэ көмөлөһөллөрүгэр үөрэх миниистирэ Габышева Ф.В. уонна предпринимательство дьыалаларыгар уонна туризм сайдыытыгар миниистир Кормилицына Е.И. аадырыстарыгар хадаатайыстыба бэлэмнииргэ сорудах биэрдэ.

СӨ Хоту сирин норуоттарын генеалогиятыгар уонна этнологиятыгар НЧИ директора Константин Аргунов норуоттар төрүччүлэрин архыыбын үөскэтиигэ ыытыллар үлэ уонна «СӨ норуоттарын генеалогическай фондатын харыстааһын туһунан» СӨ сокуонун барылын туһунан билиһиннэрдэ. Спикер Ил Түмэн судаарыстыбаннай-правовой управлениетыгар бу сокуон барылыгар наадалаах экспертизаны ыытарга ыйыы-кэрдии оҥордо.

М.К.Аммосов аатынан ХИФУ сонуннарын сүрүн редактора, «Министр-2015» оонньуу призера Анна Федорова икки бырайыактаах кэлбит – САССР төрүттэммитэ 100 сылыгар анаан «Сердце отдаю республике» уонна «Память Победы». Александр Николаевич бастакы бырайыакка ХИФУ ректора Михайлова Е.И. киирэ сылдьарыгар этии оҥордо, оттон иккис бырайыакка СӨ Ыччат дьыалаларыгар уонна дьиэ кэргэн политикатыгар, ону сэргэ Үөрэх министиэристибэлэрин аадырыстарыгар сурук бэлэмнииргэ быһаарда.

Начаалынай кылаастар учууталлара Анастасия Бурцева кыра саастаах оҕолорго народнай поэт Петр Тобуруокап айымньыларынан таһаарбыт кинигэлэрэ биир идэлээхтэрин, төрөппүттэр улахан сэҥээриилэрин ылбыттара, ол эрээри аҕыйах ахсаанынан таһаарыллыбыттара. Онон уопуттаах педагог эбии тираһы бэчээттээн таһаарыыга көмө оҥорорго көрдөһөр. Көрсүһүү түмүгэр СӨ Үөрэҕин министиэристибэтин кинигэлэри таһаарыыга рекомендациялары ылар методическай сэбиэтин тэрийэргэ быһаарылынна.

Салгыы Нам улууһуттан Саргылана Нератова уонна Николай Собакин кыһалҕаларын кэпсээтилэр. Үөдэй сэлиэнньэтин олохтооҕо Николай Собакин дьиэтин икки сыллааҕыта халаан уутугар былдьаппыта. Ол сыл олорор дьиэҕэ сертификат көрүллүбүтэ. Ол эрээри сертификакка өлүүлэммит 761 тыһ. солк. народнай депутат Винокурова А.Р. баччааҥҥа диэри төлүү илик. Александр Николаевич бу кыһалҕаны хонтуруолга ылла.

Юрист Алена Босикованы уонна музыкальнай үлэһит Валерий Бубякины үлэҕэ киирии боппуруостара долгуталлар. Бу көрдөһүүлэр сибидиэнньэҕэ ылылыннылар уонна хонтуруолланыахтара.

Уус-Алдан улууһун Дыгдал сэлиэнньэтиттэн пенсионер Ольга Готовцева кыыһа Саргылаана Маркованы эмтэтиигэ көмө көрдөстө. Александр Николаевич СӨ ис дьыалаҕа миниистирэ Прокопенко В.Н. аадырыһыгар бу тэрилтэ үлэһитигэр материальнай көмө оҥороругар уонна СӨ доруобуйа харыстабылыгар миниистирэ Горохов А.В. аадырыһыгар ыарыһах Санкт-Петербурга суһал эпэрээссийэҕэ барарыгар арыаллыыр киһи айанын төлүүрүгэр көрдөһөн бу күн суруктары бэлэмнииргэ сорудах биэрдэ.

Мас тардыһыытыгар аан дойду вице-чемпиона уонна СӨ чемпиона, РФ спордун маастара Екатерина Белолюбская ууга түспүт киһини быыһаабытын иһин Сивцев П.П. наҕараадалыырга туруорсар. Наҕарааданы биэрии чааһыгар бу боппуруос үөрэтиллиэҕэ, онтон салгыы наҕараадаҕа түһэриллиэҕэ.

Спикер Александр Жирков бары боппуруостарга сиһилии хоруйдаата. Көрсүһүүгэ кэлбит гражданнар наадалаах сүбэлэри, этиилэри ыллылар. Бары киирбит боппуруостар болҕойон үөрэтиллиэхтэрэ уонна олорго туһааннаах быһаарыылар ылыллыахтара.

Ил Түмэн пресс-сулууспатын матырыйаалынан.