Судаарыстабаннас күнүгэр аналлаах научнай-практическай конференция

Мунньахха өрөспүүбүлүкэ Конституционнай суутун бэрэссэдээтэлэ, тэрийэр кэмитиэт бэрэссэдээтэлин солбуйааччы Александр Ким-Кимэн, М.К.Аммосов аатынан Хотугулуу-Илиҥҥи федеральнай университет гуманитарнай үөрэхтээһиҥҥэ уонна корпоративнай политикаҕа проректора, тэрийэр кэмитиэт бэрэссэдээтэлин солбуйааччы Надежда Зайкова, өрөспүүбүлүкэ Юстицияҕа судаарыстыбаннай кэмитиэтин бэрэссэдээтэлэ Сардаана Гурьева, өрөспүүбүлүкэ Баһылыгын уонна Бырабыыталыстыбатын дьаһалтатын Ис политикаҕа департаменын салайааччытын солбуйааччы Эльвира Мярикянова, М.К.Аммосов аатынан Хотугулуу-Илиҥҥи федеральнай университет юридическай факультетын декана Пётр Гоголев, Ил Түмэн аппаратын салайааччытын солбуйааччы Андрей Антонен уонна тэрийэр кэмитиэт онтон да атын чилиэннэрэ кытыннылар.

Мунньахха научнай-практическай конференция былаанын дьүүллэһэн, ылыннылар. Конференция Ил Түмэн Бэрэссэдээтэлэ Александр Жирков киирии тылынан аһыллара сабаҕаланар. Российскай Федерация састаабыгар Саха сирин саҥа судаарыстыбаннаһын сайдыытын сүрүн кэрдиис кэмнэрин уонна түһүмэхтэрин туһунан дакылааты өрөспүүбүлүкэ Конституционнай суутун бэрэссэдээтэлэ, тэрийэр кэмитиэт бэрэссэдээтэлин солбуйааччы Александр Ким-Кимэн оҥоруоҕа.

Саха АССР XII ыҥырыылаах Үрдүкү Сэбиэтин Президиумун бэрэссэдээтэлэ Климент Иванов, өрөспүүбүлүкэ Конституционнай суутун бастакы бэрэссэдээтэлэ, М.К.Аммосов аатынан ХИФУ юридическай факультетын профессора Дмитрий Миронов хос дакылааттарын истии былааннанар. Саҥа судаарыстыбаннас төрүттэрин уурсубут дьон ааспыт ол кэмнэри ахтыыларын сэргэ, өрөспүүбүлүкэбит судаарыстыбаннаһын саҥа саҕахтарын хайдах көрөллөрүн туһунан санааларын атастаһыахтара. ХИФУ Финансовай-экономическай институтун директора Александр Кугаевскай Саха Өрөспүүбүлүкэтэ экономическай өттүнэн бэйэтин бас билиниитин 25 сыллаах кэмин сырдатыаҕа.

Ольга Балабкина бэлиэтииринэн, бу тэрээһин биир уратытынан конференция үлэтигэр политиктары, былаас бэрэстэбиитэллэрин сэргэ, М.К.Аммосов аатынан Хотугулуу-Илиҥҥи федеральнай университет аспираннара уонна студеннара кыттыылара буолуо. Конференция кэмигэр Россияҕа федерализм сайдыытын чэрчитинэн Саха Өрөспүүбүлүкэтин суверенитетын концепциятын, региоҥҥа сокуону оҥоруу төрүтүн быһыытынан Саха ССР судаарыстыбаннай суверенитетын туһунан Декларация, “киин—регион” сыһыаннаһыыларын тиһигэр Дальнай Востокка судаарыстыба региональнай политикатын, Саха сирин холобуругар Российскай Федерация уонна субъектар кыттыгас быһаарар боппуруостарын тустарынан дакылааттар дьүүллэһиллиэхтэрэ.

Санатан эттэххэ, Российскай Федерация састаабыгар Саха сирин саҥа судаарыстыбаннаһын 25 сылыгар аналлаах научнай-практическай конференция өрөспүүбүлүкэ парламенын дьиэтигэр Саха Өрөспүүбүлүкэтин Судаарыстыбаннаһын күнүн иннинэ, балаҕан ыйын 25 күнүгэр ыытыллыаҕа.

Ил Түмэн пресс-сулууспата.