Сунтаар хаһаайыстыбата Госдума бириэмийэтинэн бэлиэтэннэ

Сунтаар олохтоохторо Тойбохойго кииннэнэн үлэлиир «Хочо» МУТ оҥорон таһаарар бородууксуйатын амтанын син билбэхтэһэбит. Кинилэр үүттэн оҥорор астара улуус киинин бары кэриэтэ маҕаһыыннарыгар хамаҕатык атыыланар. Дьэ, ол аспыт хаачыстыбата үрдүктүк сыаналанан, Валерий Петрович Илларионов салайааччылаах «Хочо» МУТ биһиги улууска бастакынан Россия Госдуматын үрдүк наҕараадатын ылары ситистэ.
Ааспыт нэдиэлэҕэ Ил Түмэн депутаттара А.С. Уаров, В.А. Местников, И.Д. Васильев, Ж.Э. Егорова Сунтаарга нэһилиэк баһылыктарын кытта көрсүһүүлэригэр «Хочо» МУТ директорыгар Валерий Илларионовка уонна Тойбохойдооҕу арыы сыаҕын маастарыгар Сергей Николаевка, оттон Валерий Петровичка бэйэтигэр «Салайыныыга хаачыстыбалаах быһаарыныыларын иһин» диэн Госдума олохтообут түөскэ кэтэр кыһыл көмүс солотуулаах бэлиэтин үөрүүлээх быһыыга-майгыга туттардылар.
«Бу ситиһии тэрилтэм бары үлэһиттэрин сыралаах үлэлэрин түмүгэ диибин уонна түгэнинэн туһанан кинилэргэ өссө төгүл махталбын биллэрэбин. Оборудованиебыт саҥардыллара буоллар, бородууксуйа көрүҥүн өссө элбэтиэ, тупсарыа этибит, – диир Валерий Петрович.
«Хочо» МУТ-н холобур ылан, улууспут оҥорон таһаарааччыларын бородууксуйата барыта үрдүк хаачыстыбалаах буоларыгар баҕарабыт.

Борис Николаев, СИА.