12 мая 2017 в 11:55

Томпо улууһуттан бэтэрээннэри көрсүһүү

Ил Түмэн пресс-сулууспата иһитиннэрбитинэн, парламент тыа сиригэр уонна аграрнай политикаҕа сис кэмитиэтин бэрэссэдээтэлэ Дмитрий Саввин, норуот дьокутаата Иван Андросов ыам ыйын 5 күнүгэр Дьокуускайга олорор Томпо улууһуттан төрүттээх Аҕа дойду Улуу сэриитин бэтэрээннэрин, кыттыылаахтарын дьиэлэригэр сырыттылар.

Үгэс курдук, бырааһынньык иннинэ 32 №-дээх Таатта-Томпо быыбардыыр уокуругуттан норуот дьокутааттара Дмитрий Саввин, Иван Андросов, П.И.Дуткин аатынан сибээскэ уонна энергетикаҕа колледж директора Константин Борисов Аҕа дойду Улуу сэриитин кыттыылаахтара Прокопий Прокопьевич Дордины, Прокопий Прокопьевич Березины, Афанасий Яковлевич Мекюрдяновы, тыыл бэтэрээнэ, биллиилээх суруналыыс Дмитрий Васильевич Кустуровы кытта көрүстүлэр.
Дьокутааттар кинилэри эҕэрдэлээн, Улуу Кыайыыга тус кылааттарын иһин ис сүрэхтэриттэн махтаннылар, Иван Андросов «Остановись, мгновенье» диэн саҥа кинигэтин итиэннэ атын өйдөбүнньүк бэлэхтэри туттардылар, кытаанах доруобуйаны, сэргэхтик сылдьалларыгар баҕардылар.
Истиҥ кэпсэтии кэмигэр бэтэрээннэр сэрии сылларын тыйыс күннэрин, сэрии кэннинээҕи үлэ түбүктэрин ахтан-санаан ыллылар.
Сэрии бэтэрээнэ, Саһыл нэһилиэгитттэн төрүттээх Прокопий Прокопьевич Дордин, төһө да саас ыллар, төрөөбүт сирин-уотун, өрөспүүбүлүкэ, дойду сонуннарын мэлдьи истэ-билэ олорор. Кини биир дойдулаахтарыгар баҕа санааларын тиэртэ.

Мэҥэ-Алдан нэһилиэгэр төрөөбүт Ленинград иһин кыргыһыы кыттыылааҕа Прокопий Прокопьевич Березин Ийэ дойдуларын көмүскэлигэр сэрии хонуутугар охтубут бииргэ төрөөбүттэрин, бойобуой офицердар – пограничнай сэриилэр лейтенаннара Александр уонна НКВД капитана Роман тустарынан кэпсээтэ.
СӨ П.А.Ойуунускай аатынан Судаарыстыбаннай бириэмийэтин уонна суруналыыстыка эйгэтигэр СӨ Судаарыстыбаннай бириэмийэ лауреата Дмитрий Васильевич Кустуров айар, уопсастыбаҕа анаммыт үлэтин туһунан сырдатта. Дмитрий Васильевич Саха сириттэн сэриигэ кыттыбыт дьону үйэтитиигэ улахан кылааты киллэрбитэ, Федор Матвеевич Охлопковка Сэбиэскэй Сойуус Геройун аатын иҥэриигэ сүүнэ үлэни ыыппыта.

Кириэс-Халдьаайыга төрөөбүт сэрии бэтэрээнэ Афанасий Яковлевич Мекюрдянов, фроҥҥа сэриилэспит күннэрин ахтан, Кыайыы биһиги норуоппутугар хайдах курдук ыарахан сыананан ситиһиллибитин ыччакка элбэхтик сырдатар наадатын бэлиэтээтэ.
Бэтэрээннэр биир дойдулаахтарыгар болҕомтолорун иһин махтаннылар, үлэҕэ ситиһиилэри баҕардылар.