Тыа хаһаайыстыбатын салаатыгар үбүлээһин кээмэйэ үрдүүр

Тэрээһиҥҥэ Ил Түмэн бэ­рэс­сэдээтэлин бастакы солбу­йааччыта Анатолий Добрянцев, өрөспүүбүлүкэ народнай депутаттара Алексей Еремеев, Василий Местников, Юрий Баишев, Семён Березин, Семён Иванов, Юрий Михайлов, Саха сирин Бырабыыталыстыбатын бастакы вице-премьера Петр Алексеев, үп миниистирэ Валерий Жондоров, Саха сирин тыа хаһаайыстыбатыгар уонна ас-үөл политикатыгар миниистири солбуйааччы Наталия Дягилева, ветеринария Департаменын салайааччыта Лариса Макарова, өрөспүү­бүлүкэ Прокурорун старшай көмөлөһөөччүтэ Егор Неустроев, министиэристибэлэр уон­на биэдэмистибэлэр салайаач­чылара, эппиэттээх үлэһиттэрэ кытыннылар.
Мунньах «2016 сылга СӨ государственнай бюджетын туһунан» өрөспүүбүлүкэ сокуонун барылын көрүүттэн саҕаланна. Үп миниистирэ Валерий Жондоров оҥорбут дакылаатыгар «2012-2020 сылларга тыа хаһаайыстыбатын сайдыыта уонна тыа хаһаайыстыбатын бородууксуйатын ырыынак­тарын, сырьену уонна аһы-үөлү сүрүннээһин» госу­дар­ственнай программа параметрдарын быһаарарыгар 2016 сылга государственнай программа уопсай кээмэйэ 10 млрд. 202 мөл. 063 тыһ. солк. суумалаах буоларын эттэ. Программа 13 хос программанан олоххо киирэр. Ол иһигэр, «Сүөһү иитиитин сайдыыта» – 3 676 974 тыһ. солк.; «Сылгыны үөрдээн иитии сайдыыта» – 136 098 тыһ. солк.; «Хоту сир үгэс буолбут салааларын сайдыыта» – 668 428 тыһ. солк. уо.д.а.
Норуот депутаттара тыа хаһаайыстыбатын салаа­тыгар үбүлээһин кээмэйэ эбиллибитин бэлиэтээтилэр уонна 2016 сылга Саха сирин государственнай бюджетын параметрдарын чопчулааһыҥҥа кэккэ ыйытыылары биэрдилэр. Семен Березин федеральнай таһымҥа тыа хаһаайыстыбатын салаатын үбүлээһин үрдээбитин бэлиэтээн туран, субсидиялар уонна субвенциялар төһө кээмэй­дэрэ Саха сирин тыатын хаһаайыстыбатын салаатыгар федеральнай бюджеттан көрүллүөҕүн туһунан интэриэһиргээтэ. Онуоха Наталия Дягилева сокуон бары­лыгар 304 мөл. солк. угулунна диэн хоруйдаата.
Ону таһынан кооперацияны гранынан өйөөһүн улаатыыта, ньүөлсүтүүгэ аналлаах саҥа техниканы атыылаһыыга үп-харчы былааннанар. Сүөһүнү иитэр хаһаайыстыбалары чэбдигир­диигэ үбүлээһин былааннанар, бу урут өрөспүүбүлүкэ бюджетыгар көрүллүбэт этэ.
Парламентарий Юрий Баишев өрөспүүбүлүкэ парламе­ныгар «Саха өрөспүүбүлүкэтигэр тыа хаһаайыстыбатын сайдыытын туһунан» диэн өрөспүүбүлүкэ сокуонун барыла киириэхтээҕин санатта уонна бу сокуону олоххо киллэриигэ 2016 сылга СӨ государственнай бюджетыгар үп-харчы угулларын чуолкайдаста.
Норуот депутаттара Анато­лий Добрянцев уонна Василий Местников табаһыттар хам­настарын үбүлээһин уонна ол методикатын уларытыы туһунан боппуруоһу көтөхтүлэр.
Дьүүллэһии түмүгүнэн «2016 сылга СӨ государственнай бюджетын туһунан» сокуон барылын сүнньүнэн ылынарга быһаардылар.
Салгыы норуот депутаттара «Ветеринария туһунан» СӨ Сокуонугар уларытыылары киллэрэр туһунан» өрөспүүбүлүкэ сокуонун барылын көрдүлэр. Бу боппуруоска дакылааты өрөспүүбүлүкэ ветеринарияҕа Департаменын салайааччыта Лариса Макарова иһитиннэрдэ.
Сокуон барыла СӨ ветери­нарияҕа Департаменын салайааччы дуоһунаһыгар кан­ди­да­тураны федеральнай сокуоннарга ылыллыбыт улары­тыыларынан сибээстээн толоруулаах былаас феде­ральнай уорганнарын кытта сөбүлэһиннэриини суох оҥорор­го этэр. Бу сокуон ба­рыла Ил Түмэн уочараттаах пленарнай мунньаҕар көрүүгэ киллэриллиэҕэ.

Бэлэмнээтэ Мария Павлова.