569
14 сентября 2018 в 10:07
Тыыл уонна үлэ бэтэрээннэригэр социальнай өйөбүл туһунан
2018 сыл балаҕан ыйын 20 күнүгэр Ил Түмэн бэһис ыҥырыытын дьокутааттара XXXIX уочараттаах мунньахтарыгар «Саха Өрөспүүбүлүкэтигэр тыыл уонна үлэ бэтэрээннэригэр социальнай өйөбүл туһунан» Саха Өрөспүүбүлүкэтин сокуонугар уларытыыны киллэрии туһунан» сокуон барылын көрүөхтэрэ.
Өрөспүүбүлүкэтээҕи сокуон барылын Саха Өрөспүүбүлүкэтин Баһылыгын эбээһинэһин быстах кэмҥэ толорооччу Айсен Николаев Россия Президенэ Владимир Путин быһа эфиргэ аҕа саастаах дьон туһанар чэпчэтиилэрин регионнар бэйэлэрэ быһаарыахтаахтар диэн Анал туһаайан этиитигэр олоҕуран, 2018 сыл балаҕан ыйын 5 күнүгэр парламент көрүүтүгэр киллэрбитэ.
Сокуон барылыгар Саха сиригэр бастайааннай олорор, 50 саастарын туолбут дьахталларга уонна 55 саастаах эр дьоҥҥо чэпчэтиилэри оннунан хаалларыы, чуолаан, ый аайы харчынан 966 солк. төлөбүр уонна олорор дьиэлэрин, коммунальнай өҥөлөр төлөбүрдэригэр ороскуоту толуйуу туһунан этиллэр.
Санатар буоллахха, от ыйын 19 күнүгэр «Пенсияны анааһын уонна төлөөһүн боппуруостарыгар Россия Федерациятын тустаах сокуон суолталаах аакталарыгар уларытыылары киллэрэр туһунан» 489161-7 №-дээх Федеральнай сокуон барыла Россия Федерациятын Федеральнай Мунньаҕын Судаарыстыбаннай Думатыгар бастакы ааҕыыны ааспыта. Сокуон барыла киэҥник ырытыллан, иккис ааҕыы болдьоҕо 2018 сыл балаҕан ыйын 24 күнүгэр диэри уһатыллыбыта. Бүгүҥҥү күҥҥэ сокуон барылыгар 100-тэн тахса көннөрүү киирэн сытар, ол иһигэр 2018 сыл от ыйын 9 күнүгэр Ил Түмэн ылыммыт Саха Өрөспүүбүлүкэтин этиилэрэ бааллар.
Саха сирин парламена уонна бырабыыталыстыбата «Пенсия туһунан сокуоннарга уларытыыны киллэрии» туһунан сокуон барылыгар өрөспүүбүлүкэ бэлэмнээбит этиилэрин олоххо киллэриигэ үлэлэһэллэр. Ил Түмэн спикерэ Александр Жирков дьаһалынан Бырабыыталыстыба Бэрэссэдээтэлин солбуйааччытын эбээһинэһин толорооччу Ольга Балабкина салайааччылаах сокуон барылыгар үлэлэһэр оробуочай бөлөх тэриллибитэ.
Александр Жирков иһитиннэрбитинэн, Саха сириттэн киирбит этиилэри Уһук Илин сокуону оҥорооччулара өйөөннөр докумуоҥҥа киллэрбиттэр. Саха сиригэр, Уһук Хоту сир оройуоннарыгар уонна онно тэҥнэниллибит сирдэргэ үлэлээбит гражданнарга, Хоту сир аҕыйах ахсааннаах төрүт олохтоох норуоттарыгар пенсияҕа тахсар саастарын уларыппакка оннунан хаалларыллар. Итиэннэ Уһук Хоту сир оройуоннарыгар уонна онно тэҥнэниллибит сирдэргэ үлэлээбит дьонтон ураты атын гражданнарга пенсияҕа тахсар сааһы үрдэтии хаамыытын биир сылтан сыл аҥаарыгар диэри уларытыллан биэриллэр.
Ил Түмэн Бэрэссэдээтэлэ Александр Жирков Уһук Илиҥҥи регион олохтоохторун этиилэрин учуоттаан туран, Хотугу эргимтэ дьоно пенсияҕа тахсар саастарын оннунан хаалларыы бу региоҥҥа дьону-сэргэни олохсутуу соругун толорууга сүрүн төһүү буолуоҕа диэн бэлиэтиир.
