Улахан тэрээһини бэлэмнээх көрсөргө

Кулун тутар 15 күнүгэр Ил Түмэн бэрэссэдээтэлэ Александр Жирков Сийиэһи тэрийэр кэмитиэт мунньаҕын ыытта. Манна спикер солбуйааччыта Анатолий Добрянцев, сис кэмитиэттэр бэрэссэдээтэллэрэ Василий Местников, Алексей Еремеев, Юрий Николаев, Юрий Баишев, Елена Голомарёва, норуот депутата Иван Ан­дросов, СӨ Ил Дарханын уонна Бырабыыталыстыбатын дьаһалтатын салайааччы Фёдор Борисов уо.д.а. оробуочай бөлөх чилиэннэрэ кытыннылар.

Сийиэһи тэрийиигэ эппиэт­тээхтэр: Василий Местников, Алексей Еремеев, Юрий Николаев, Юрий Баишев, Иван Андросов, СӨ муниципальнай тэриллиилэрин олохтоох сала­йыныы бэрэстэбиитэллээх уорганнарын Ассоциациятын эппиэттээх сэкирэтээрэ Туйаара Илларионова уо.д.а. сийиэскэ бэлэмнэнии туһунан отчуоту оҥордулар.

Ил Түмэн олохтоох сала­йыныы боппуруостарыгар сис кэмитиэтин бэрэссэдээтэлэ Василий Местников кулун тутар 27-28 күннэригэр «Муни­ципальнай тэриллиилэр бэрэстэбиитэллээх уорганнарын дьокутааттарыгар бырайыагынан салайыыны киллэрии» быра­гырааманан билиилэрин-көрүүлэрин үрдэтэр куурус буоларын иһитиннэрдэ. Оттон кулун тутар 29 күнүгэр «Муниципальнай тэриллиилэр бэрэстэбиитэллээх уорганнарын тустарынан сокуону оҥоруу проблемалара уонна кэскиллэрэ» тиэмэлээх семинар ыытыллыаҕа. Итини таһынан сийиэс кыттыылаахтара араас хайысхалаах «төгүрүк остуолларга» мустан тыын суолталаах кыһалҕалары дьүүллэһиэхтэрэ, уопут атас­таһыахтара. Ил Түмэн иһинэн парламентарий-дьахталлар уопсастыбаннай-политическай кулууптарын көҕүлээһининэн «2017-2022 сс. дьахталлар интэриэстэригэр Национальнай стратегияны олоххо киллэрии» диэн тиэмэлээх «төгүрүк остуол» буолуоҕа. Бу күн улуустар делегациялара минис­тиэристибэлэргэ уон­на биэдэмистибэлэргэ көрсү­һүүлэргэ сылдьыахтара.

Сийиэс пленарнай мунньаҕа кулун тутар 30 күнүгэр Д.К. Сивцев – Суорун Омоллоон аатынан Опера уонна балет театрыгар ыытыллыаҕа. Ман­на Сийиэс резолюциятын ылыныахтара.

Сийиэс СӨ депутаттарын VI Спартакиадатынан түмүктэниэҕэ. Быйылгы спартакиадаҕа номнуо 20 хамаанда кыттар баҕалааҕын биллэрбит. Депутаттар волейбол, буулдьанан ытыы, остуол тенниһэ уонна саахымат көрүҥнэригэр күөн көрсүөхтэрэ.

Александр Жирков тэрийэр кэмитиэт бүтэһиктээх мунньаҕын кулун тутар 27 күнүгэр анаата. Мунньахха сийиэс тэрээһиннэрин хас биирдии пууна ымпыктаан-чымпыктаан ырытылынна. Ити курдук, СӨ муници­пальнай тэриллиилэрин бэрэс­тэбиитэллээх уорганнарын дьокутааттарын I сийиэстэрин үрдүк таһымҥа тэрийэн ыытыыга бэлэмнэнии үлэтэ күүскэ бара турар.