Ыллыктаах этиилэр ыраахха сирдээтиннэр

Муус устар 13 күнүгэр парламеҥҥа ыччаппытыгар үтүө эрэ дьайыылаах үгэс буолбут көрсүһүү ыытылынна. Тэрээһиҥҥэ М.К. Аммосов аатынан Хотугулуу-Илиҥҥи федеральнай университет проректора Михаил Федоров, ити үрдүк үөрэх кыһатын киин приемнай хамыыһыйатын начальнига Елизавета Ильина, өрөспүүбүлүкэ идэлээх буолууга, кадрдары бэлэмнээһиҥҥэ уонна аттаран туруорууга министерствотын отделын салайааччыта Лариса Сивцева, «Уолан» гимназия дириэктэрэ Петр Местников, психолог Галина Матвеева уонна төрөппүттэр кыттыыны ыллылар.

Спикер Александр Жирков киирии тылыгар М.К. Аммосов аатынан Хотугулуу-Илиҥҥи федеральнай университет ыытар үлэтин-хамнаһын кылгастык билиһиннэрдэ. Кини: «Биһиги университеппытыгар тардыһыы Саха сириттэн эрэ буолбакка, кини тас өттүттэн эмиэ күүһүрдэ. Ити чуолкай. Ол гынан баран университеппыт бэлэмнээбэт эбэтэр ситэ бэлэмнээбэт хайысхалара элбэхтэр. Урут-уруккуттан Россияҕа наука, үөрэх кииннэрэ буолбут үрдүк үөрэх кыһалара бааллар. Олору барыларын кытта тэҥҥэ туран, күрэстэһэр, биллэн турар, уустук. Биһиги оҕолорбут ити престижнэй үөрэх кыһаларыгар киирэн үөрэнэллэрэ улахан суолталаах, кэскиллээх буолуо этэ дии саныыбын. Дойдуга биллэр-көстөр үрдүк үөрэх заведениеларын бүтэрбит ыччаттар олус түмсүүлээхтэр. Олохторун тухары бэйэ-бэйэлэрин өйөһөллөр», – диэтэ.

Кини идэни талыыны кытта инники дьылҕаҥ тутулуктааҕын туһунан бэлиэтээтэ. «Идэтин сыыһа талбыт киһи үйэтин тухары эрэйи көрөр. Бу боппуруос сүрдээх дириҥ суолталаах. Профессор Георгий Башарин идэни талыыны олоҕуҥ аргыһын талыыны кытары тэҥниэххэ сөптөөх диир буолара. Кырдьык, идэҕин таба талыыттан, тайаныыттан инники олоҕуҥ быһаччы тутулуктаах, Ити идэҕэр дууһаҥ сытар буолуохтаах. Киһи олоҕун устата үстэ таба тайаныахтаах. Идэтин, олоҕун аргыһын уонна үлэтин, дьарыгын. Үчүгэй идэлээх, үлэлээх-хамнастаах, кэргэннээх, оҕолордоох, дьиэлээх-уоттаах киһи, ама, дьоло суохпун диэ дуо? Ити үстэн биир саамай суолталааҕын, идэҕитин талаары сылдьаҕыт. Булчут сыыһа ытта эрэ, булда, байанайа куотан хаалар. Эһиги ити кэриэтэ, байанайгытын мүлчү тутуо суохтааххыт», – диэн Александр Николаевич эттэ.

Кини хас биирдии гимназист санаатын, инники былааннарын иһиттэ уонна сүбэлэри биэрдэ.

ХИФУ проректора Михаил Федоров гимназия выпускниктарыгар бэйэтин олоҕун холобуругар олоҕуран, эмиэ үгүс сүбэни-аманы биэрдэ. Кини: «Биир кэлим экзаменнарга күүстээхтик бэлэмнэниҥ, үрдүк баалы ыларга кыһаныҥ. Идэҕитин чопчу талан, киирбит үөрэххитигэр тиһэҕэр тиийэ үөрэниэхтээххит. Маны үөрэхтэрин быраҕан кэбиһэр оҕолор баалларын иһин этэбин», – диэтэ. ХИФУ рейтинин кытта билиһиннэрдэ. Ол курдук, университеппыт аан дойду 500, оттон Россия 16 бастыҥ үрдүк үөрэҕин кыһатын иһигэр киирбит.

Университет киин приемнай хамыыһыйатын начальнига Елизавета Ильина быйылгы дьылга үөрэххэ киириигэ ханнык уларыйыылар киирбиттэригэр тохтоото. Оттон өрөспүүбүлүкэ идэлээх буолууга, кадрдары бэлэмнээһиҥҥэ уонна аттаран туруорууга министерствотын отделын салайааччыта Лариса Сивцева киин үрдүк үөрэх кыһаларга үөрэнэ киирии туһунан билиһиннэрдэ.

Маннык көрсүһүүлэр иитиигэ суолталара улахан, үтүө дьайыылара үгүс, түмүктэрэ улахан буолуохтаах дии саныыбын. Оҕо чугас киһитин этэрин, этэргэ дылы, куойатыгар-маҥкытыгар улаханнык оҕустарбата олоххо баар көстүү. Атын киһи, буолаары буолан өрөспүүбүлүкэ бас-көс дьонун ыллыктаах этиилэрэ, сүбэлэрэ-амалара олох киэҥ аартыгар саҥардыы үктэнэн эрэр, этэргэ дылы, муна-тэнэ сылдьар үгүс ыччат өйүгэр өй, күүһүгэр күүс эппитэ, быһаарыныы ылыналларыгар кыах биэрбитэ, тирэх буолбута саарбаҕа суох.

Людмила НОГОВИЦЫНА.