Бурятия уонна Приморскай кыраай делегацияларын кытта көрсүһүү

Саха сирин парламенын спикерэ Петр Гоголев муус устар 26 к. СӨ Судаарыстыбаннай Мунньаҕын (Ил Түмэн) 25 сылыгар анаммыт тэрээһиннэргэ ыҥырыллыбыт федерация субъектарын сокуону таһаарар уорганнарын бэрэстэбиитэллэрин кытта көрүстэ.

Көрсүһүүгэ Бурятия Өрөспүүбүлүкэтин уонна Приморскай кыраай парламеннарын бэрэстэбиитэллэрэ кыттыыны ыллылар.
Бурятия Өрөспүүбүлүкэтин делегациятын Норуот Хуралын Бэрэссэдээтэлэ Владимир Павлов салайар. Кинини кытта Дьокуускайга НоруотХуралын бюджекка, нолуоктарга уонна үпкэ кэмитиэтин бэрэссэдээтэлэ Зоригто Цибикмитов, экономика политикатыгар, айылҕаны туһаныыга уонна экологияҕа кэмитиэт бэрэссэдээтэлэ Анатолий Кушнарев, Норуот Хуралыгар ЛДПР фракциятын чилиэнэ, бюджекка, нолуоктарга уонна үпкэ кэмитиэт чилиэнэ Бадмадоржо Жигжигитов, РФКП фракциятын салайааччытын солбуйааччыта, үөһэ этиллэр кэмитиэт чилиэнэ Баир Цыренов уонна Норуот Хуралын Бэрэссэдээтэлин сүбэһитэ Александр Абидуев кэлбиттэр.

Приморскай кыраай Сокуону таһаарар Мунньаҕыттан бэрэстэбиитэлинэн экономика политикатыгар уонна бас билиигэ кэмитиэт бэрэссэдээтэлин солбуйааччыта Джони Авдои кытынна.
Саха сирин парламенын спикерин кытта Ил Түмэн 25 сыллаах үбүлүөйүн тэрээһиннэригэр кэлбит бастакы ыалдьыттары бюджекка, үпкэ, нолуок уонна сыана политикатыгар сис кэмитиэт бэрэссэдээтэлэ Юрий Николаев уонна сир сыһыаннаһыыларыгар, айылҕа ресурсаларыгар уонна экологияҕа сис кэмитиэт бэрэссэдээтэлэ Владимир Прокопьев көрүстүлэр.
Өрүттэр эҕэрдэлэри атастастылар. Петр Гоголев Ил Түмэн үбүлүөйүн тэрээһиннэригэр кыттарга быһаарбыттарынан ыалдьыттарга махталы тиэртэ. Кини Саха сирин парламенын историятын уонна алтыс ыҥырыы үлэтин сүрүн хайысхаларын, парламеннар икки ардыларыгар бииргэ үлэлээһин туһунан кэпсээтэ, хардарыта бииргэ үлэлээһин сокуону оҥоруу боппуруостарыгар уопсай интэриэстэри быһаарыыга көдьүүстээх түмүктэри ситиһэргэ көмөлөһүөҕүн бэлиэтээтэ.
Норуот Хуралын Бэрэссэдээтэлэ Владимир Павлов 2018 сылга Бурятия Өрөспүүбүлүкэтэ Уһук Илиҥҥи федеральнай уокурук састаабыгар киллэриллибитин эттэ. Кини Ил Түмэн уонна Бурятия Норуотун Хуралын икки ардыларыгар бииргэ үлэлээһин туһунан сөбүлэһии түһэрсиллибитин, ол чэрчитинэн салгыы бииргэ үлэлээһин өрүттэрэ көрүллүөхтэрин бэлиэтээтэ. Приморскай кыраай Сокуону таһаарар Мунньаҕыттан кэмитиэт бэрэссэдээтэлин солбуйааччы Джони Авдои бэйэтин өттүттэн кэккэ хайысхаларга субъектар икки ардыларыгар бииргэ үлэлээһин былааннарын билиһиннэрдэ.