Ил Түмэҥҥэ — Уһук Илиҥҥи регионнар спикердэрэ

Сэтинньи 16 күнүгэр Дьокуускайга “Биир ньыгыл Арассыыйа” партия Уһук Илиҥҥи регионнааҕы салааларын салайааччыларын мунньаҕа буолла. Мунньахха сорох регионнар спикердэрэ кыттыыны ыллылар. Александр Жиркову кытары көрсүһүүгэ Камчатка кыраайын Сокуону оҥорор Мунньаҕын бэрэссэдээтэлэ Валерий Раенко, Хабаровскай кыраай Сокуону оҥорор Мунньаҕын бэрэссэдээтэлэ Сергей Луговской, Сахалин уобалаһын Думатын бэрэссэдээтэлэ Андрей Хапочкин, Чукотка автономнай уокуругун Думатын бэрэссэдээтэлэ Александр Маслов сырыттылар. Парламеннар спикердэрэ макрорегион социальнай-экономическай сайдыытын сокуон өттүнэн хааччыйыы, Уһук Илин субъектарын интэриэстэрин таарыйар сокуону айан оҥоруу соруктарын быһаарыыга “Уһук Илин уонна Забайкалье” Парламеннар Ассоциацияларын оруолун үрдэтии бастакы суолталаах боппуруостарын дьүүллэстилэр.
Саха Өрөспүүбүлүкэтин спикерэ Саха сирин олохтоохторун уонна парламент аатыттан Хабаровскай кыраай Сокуону оҥорор Мунньаҕын бэрэссэдээтэлигэр Сергей Луговскойга, Хабаровскай кыраай олохтоохторугар Нелькаҥҥа сөмөлүөт саахалыгар дьон өлбүтүнэн дириҥ кутурҕанын тиэртэ.