Корея Кёнсанбук-до провинциятын кытта бииргэ үлэлиир туһунан

Саха Өрөспүүбүлүкэтигэр бэс ыйын 27-30 күннэригэр Корея Өрөспүүбүлүкэтин Кёнсанбук-до провинциятын парламенын делегацията кэлэ сылдьар. Саха сирин Судаарыстыбаннай Мунньаҕа Кореяттан сылдьар парламены кытта бииргэ үлэлиир санаалаахтарын туһунан меморандумҥа илии баттыыра сабаҕаланар.

Бу сырыы СӨ Ил Түмэнин бэрэссэдээтэлин бастакы солбуйааччыта Александр Жирков уонна Соҕурууҥҥу Корея Кёнсанбук-до провинциятын парламенын бэрэссэдээтэлэ тойон Чан Кён Сик ыам ыйын 1 к. көрсүһүүлэригэр ситиһиллибит сөбүлэһиилэргэ сөп түбэһиннэрэн былааннаммыта.
Санаттахха, Александр Жирков уонна Кëнсанбук-до провинция парламенын бэрэссэдээтэлэ тойон Чан Кëн Сик көрсүһүүгэ култуура, спорт, наука-үөрэх, туризм боппуруостарыгар АРАССВА чэрчитинэн парламеннар икки ардыларынааҕы бииргэ үлэлээһин кыахтарын дьүүллэспиттэрэ. Экология, айылҕа баайыгар харыстабыллаах сыһыан уонна бырамыысыланнас тэтимнээх баһылааһынын усулуобуйаларыгар айылҕа биологическай эйгэтин харыстааһын темалара туспа таарыллыбыттара.
Бырагыраама быһыытынан, Корея парламентарийдара көтөн кэлбит күннэригэр СӨ Баһылыгын Айсен Николаевы кытта көрсүһүүлэрэ былааннаммыта.

Кёнсанбук-до парламенын делегациятын кыттыылаахтара бэс ыйын 29 к. Туймаада ыһыаҕын аһыллыытын сиэригэр-туомугар кыттыахтара. Ил Түмэн уонна Саха сирин Баһылыгын аатыттан Үс Хатыҥҥа ыалдьыттары официальнайдык көрсүү тэриллиэҕэ.
Күн иккис аҥаарыгар РФ СӨ Судаарыстыбаннай Мунньаҕын (Ил Түмэн) уонна Корея Өрөспүүбүлүкэтин Кëнсанбук-до провинциятын Парламенын икки ардыларыгар бииргэ үлэлиир санаалаахтарын туһунан Меморандумҥа илии баттааһын сиэрэ-туома ыытыл­лыаҕа.
Түөрт күннээх сырыыларын кэмигэр Кёнсанбук-до парламент делегациятын кыттыылаахтара “Ирбэт тоҥ саарыстыбата” туристическай комплекска, ХИФУ Мамонт музейыгар сылдьыахтара, “Өлүөнэ очуостара” Национальнай пааркаҕа ыраастаныы уонна алгыс ылыы үгэс буолбут сиэригэр-туомугар кыттыахтара, “Саха Өрөспүүбүлүкэтин кылаата мунньуллар сирэ” быыстапканы көрүөхтэрэ.