Петр Гоголев уонна Сардаана Авксентьева оскуоланы кэҥэтии боппуруоһун дьүүллэстилэр

Бүгүн Дьокуускай куорат 17 №-дээх оскуолатыгар 1683 оҕо үөрэнэр – хас биирдии кылааска 40-нуу курдук. Оттон оскуола дьиэтэ биир симиэнэҕэ 350 миэстэҕэ суоттаммыт, онон үөрэх тэрилтэтэ 5 төгүл элбэх оҕолоох буолан тахсар.

Оҕолор куорат анаабыт икки дьиэтигэр үөрэнэргэ күһэллэллэр. Бастакыта – Петровскай уулуссатын 10/4-гэр уруккута дьиэ кэргэн сынньанар киинэ. Манна бастакы симиэнэҕэ 10-11, оттон иккис симиэнэҕэ – 8-с кылаастар үөрэнэллэр. Барыта 280 оҕо. Оскуола иккис дьиэтэ – Киров уулуссатын 15-гэр политехническай лицей, онно 17 №-дээх оскуола 4 алын сүһүөх кылааһа үөрэнэр. Ити курдук, икки үөрэх тэрилтэтэ кылаастары түҥэттэн олороллор.

Ил Түмэн спикерэ Петр Гоголев, киин куорат Универ­ситеттааҕы уокуругуттан норуот итэҕэллээҕин быһыытынан, бэйэтин быыбар иннинээҕи бырагырааматыгар биир бастакы суолталаах соругунан 17 №-дээх оскуолаҕа үөрэнэр миэстэ тиийбэтин проблематын быһаарыыны киллэрбитэ.

Быйыл олунньуга оскуолаҕа парламент бэрэссэдээтэлэ, куорат Думатын депутаттара, Дьокуускай дьаһалтата, оскуола кэлэктиибэ кыттыылаах  сүбэ мунньахха билигин спорт былаһааккатын оннугар оскуолаҕа эбии сыһыары тутуу боппуруоһа дьүүллэһиллибитэ. Онно биир симиэнэҕэ 250 оҕо үөрэниэн сөп.

Мунньах түмүгүнэн Ил Түмэн бэрэссэдээтэлэ муус устар саҥатыгар боппуруоһу Уокурук дьаһалтатын таһымыгар көрөргө этии киллэрбитэ.

Муус устар 2 к. Дьокуускай баһылыга Сардаана Авксентьеваны кытта көрсүһүүгэ спикер Петр Гоголев куорат депутаттарын күүһүн-кыаҕын толору туһанар наадалааҕын, өрөспүүбүлүкэ народнай депутаттара Уокурук дьаһалтатын, куорат Думатын кытта араас этиилэрин дьүүллэһиигэ бэлэмнэрин туһунан бэлиэтээтэ.

Сардаана Авксентьева алтыс ыҥырыылаах депутаттар куорпустара Уокурук администрациятын өйөөн, оскуолаҕа сыһыары тутууну өрөспүүбүлүкэ инвестиционнай бырагырааматыгар киллэрии боппуруоһун көтөҕөрүгэр эрэлин биллэрдэ.

Кэпсэтии кэмигэр оскуолаҕа сыһыары тутуу бүгүҥҥү барыйаана нормативтарга сөп түбэспэтэ бэлиэтэннэ. Онон эбии үөрэхтээһиҥҥэ анаан туһунан дьиэни тутуу табыгастаах буолуон, административнай уонна үөрэх тэрилтэтин оскуола таһынааҕы салаалара киириэхтэрин сөп, оччоҕо оскуола дьиэтигэр ноҕурууска аччыаҕа диэн этилиннэ. Итини сэргэ оскуолаҕа сыһыары тутуу барыйаанын көрүү эмиэ баар буолуон сөп.

Петр Гоголев кэпсэтии­ни түмүктүүрүгэр бэс ыйыгар өрөспүүбүлүкэ бюджетын көннөрүү былааннанарын, ол чэрчитинэн сыһыары тутууга бырайыак-смета докумуоннарын оҥоруу үлэтин үбүлээһини 2019 сылга көрөр сөптөөҕүн, оттон 2020 сыллааҕы инвестиция бырагырааматыгар тутар-таҥар үлэлэри киллэрэр наадатын бэлиэтээтэ.