Владимир Путин Саха Өрөспүүбүлүкэтин этиитин өйөөтө

Александр Жирков сокуону оҥорооччулар Сэбиэттэрин хамыыһыйатын икки мунньаҕар этии киллэрэн тыл эттэ, итиэннэ сокуону оҥорооччулар Россия Президенэ Владимир Путины кытта көрсүһүүлэригэр кыттыыны ылла.

Россия Федерациятын Президенин кытта көрсүһүүгэ уустук сырыылаах ыраах сытар нэһилиэнньэлээх пууннар олохтоохторун медицинскэй өҥөнөн хааччыйыы туһунан Саха Өрөспүүбүлүкэтин этиитэ өйөбүлү ылла.

2012 сыллаахха «Россия Федерациятын гражданнарын доруобуйаларын харыстааһын төрүттэрин туһунан» 323 №-дээх Федеральнай сокуон ылыныллан аҕыйах нэһилиэнньэлээх пууннар олохтоохторо бэйэлэрин сирдэригэр-уоттарыгар медицинскэй көмөнү ылалларыгар ыарахаттары үөскэппитэ. Кинилэргэ амбулатория уонна күнүскү стационар усулуобуйатыгар бастакы медицинскэй-санитарнай көмө эрэ оҥоһуллар буолбута. Саха сирин парламена бу боппуруоһу сокуону оҥорууга көҕүлээһин быһыытынан хас да төгүлүн туруорбута уонна Россия Федерациятын Бырабыыталыстыбатын Бэрэссэдээтэлэ Дмитрий Медведев 2015 сыл муус устар ыйыгар Дьокуускайга кэлэ сырыттаҕына бэйэтин санаатын тиэрдибитэ.

Парламент бу туруорсар боппуруоһа 2015 сыл бэс ыйын 26 күнүгэр Дьокуускайга Арктика уонна Антарктика Экспертнэй сэбиэтин Россия Федерациятын Арктикатааҕы зонатыгар киирэр субъектар баһылыктарын уонна сокуону оҥорор уорганнарын бэрэссэдээтэллэрин кытта мунньаҕар Федеральнай Мунньах салалтатыгар тиэрдиллибитэ. Тиһэҕэр, 2017 сыл ахсынньы ыйыгар Федерация Сэбиэтин пленарнай мунньаҕар Ил Түмэн спикерэ Александр Жирков тыа сирин аҕыйах нэһилиэнньэлээх пууннарыгар стационарнай-медицинскэй учреждениелары тэрийии наадатын туһунан өрөспүүбүлүкэ аатыттан тыл эппитэ. Ону тэҥэ Саха сирин парламенын спикерэ Судаарыстыбаннай Дума Бэрэссэдээтэлэ В.Володины кытта сирэй көрсөн бу боппуруоска Саха Өрөспүүбүлүкэтэ киллэрэр этиилэрин тиэрдибитэ. Сокуону оҥорооччулар Сэбиэттэрин Президиумун мунньаҕар Россия Федерациятын Президенин кытта көрсүһүүгэ Судаарыстыбаннай Дума спикерэ Вячеслав Володин Саха Өрөспүүбүлүкэтэ тутуһар санаатын туһунан бэлиэтээн эттэ: «Кэнники сылларга биһиги аныгы, аан дойду бары стандартарыгар эппиэттиир үрдүк технологиялаах медицина көмөтө сайдыытыгар үгүс үлэни ыыттыбыт. Ол эрээри хонтуруол суоҕуттан уонна ылыныллар быһаарыылар хаачыстыбалара суохтарыттан бастакы медицинскэй көмө үлэтин тэрийиигэ улахан харгыстар үөскээтилэр. Ол курдук, кумааҕыны эрэ толорор көрүнньүк сыһыан түмүгэр элбэх эмтиир тэрилтэлэр сабылыннылар. Россия Федерациятын Президенэ бэйэтин Анал этиитигэр доруобуйа харыстабылыгар бастакы медицинскэй көмө дьоҥҥо-сэргэҕэ кыаллымтыа, тоҕоостоох буоларын ситиһэр соругу туруорда. Программа оҥоһуллуо, үп көрүллүө, ол гынан баран сыыһаларбытынхалтыларбытын хатылыа суох тустаахпыт. ФАПтарга дьиэ-уот, медицинскэй тэрил эрэ буолбакка, сүрүннээн, медицинскэй үлэһиттэр наадалар. Билигин үгүс регионнар ФАП-гар уонна быраас амбулаторияларыгар 200 тыһыынчаттан тахса орто медицинскэй персонал тиийбэт. Бастакы сүһүөх медицинскэй тэрилтэлэри сөргүтүү кэнниттэн бу кыһалҕа, ордук тыа сиригэр өссө сытыырхайыа. Бу боппуруоска улахан болҕомтону уурарга, доруобуйа харыстабылын бастакы сүһүөҕэр анаан орто медицинскэй персоналы тус сыаллаахтык талан ылыы уонна бэлэмнээһин программатын оҥорорго уонна регионнар сокуону оҥорор мунньахтарыгар дьүүллэһэргэ этии киллэрэбит».

Бу этиини Россия Федерациятын Уһук Илиҥҥи субъектара, ол иһигэр дойду киин субъектара өйөөтүлэр.

Бүгүҥҥү күҥҥэ Судаарыстыбаннай Думаҕа «Доруобуйа харыстабылын туһунан» сокуоҥҥа уларытыы киллэрэр туһунан» федеральнай сокуон саҥа барыла оҥоһуллар. Сокуону оҥорууга көҕүлээһин биир субъегынан Саха сирин парламена буолла.